Sheikh Ahmed Bin Rashid Passed Away : શેખ અહમદ બિન રાશિદનું નિધન, દુબઈમાં 10 દિવસનો રાષ્ટ્રીય શોક જાહેર

Sheikh Ahmed Bin Rashid Passed Away : દુબઈના શાહી પરિવારના વરિષ્ઠ સભ્ય અને લેફ્ટનન્ટ જનરલ શેખ અહમદ બિન રાશિદ અલ મક્તૂમનું સોમવારે સવારે નિધન થયું છે. તેમના નિધનથી દુબઈ સહિત સંયુક્ત આરબ અમીરાતમાં શોકની લાગણી ફેલાઈ છે. દુબઈના સેકન્ડ ડેપ્યુટી રુલર અને દુબઈ મીડિયા કાઉન્સિલના ચેરમેન શેખ અહમદ બિન મોહમ્મદ બિન રાશિદ અલ મક્તૂમે શોક વ્યક્ત કરતાં તેમના નિધન પર દુઃખ વ્યક્ત કર્યું હતું.

સરકારી ઈમારતો પર રાષ્ટ્રધ્વજ અડધી કાઠીએ ફરકાવાશે

યુએઈના ઉપરાષ્ટ્રપતિ, વડાપ્રધાન અને દુબઈના શાસક શેખ મોહમ્મદ બિન રાશિદ અલ મક્તૂમના દરબારે પણ શેખ અહમદ બિન રાશિદ અલ મક્તૂમના નિધન પર શોક વ્યક્ત કર્યો છે. દુબઈમાં તેમના નિધન બાદ 10 દિવસનો સત્તાવાર શોક જાહેર કરવામાં આવ્યો છે. આ સમયગાળા દરમિયાન સરકારી ઈમારતો પર રાષ્ટ્રધ્વજ અડધી કાઠીએ ફરકાવવામાં આવશે.

કારકિર્દીમાં મહત્વપૂર્ણ જવાબદારીઓ સંભાળી

શેખ અહમદ બિન રાશિદ અલ મક્તૂમ દુબઈ પોલીસ અને પબ્લિક સિક્યુરિટીના પૂર્વ ડેપ્યુટી ચેરમેન, A.R.M. હોલ્ડિંગના ચેરમેન અને અલ વસલ સ્પોર્ટ્સ ક્લબના ચેરમેન રહી ચૂક્યા હતા. તેમણે યુએઈના સૈન્ય, સુરક્ષા, રમતગમત અને સામાજિક ક્ષેત્રમાં લાંબા સમય સુધી મહત્વપૂર્ણ યોગદાન આપ્યું હતું. શેખ અહમદે બ્રિટનની રોયલ મિલિટરી એકેડેમી સેન્ડહર્સ્ટમાંથી સૈન્ય શિક્ષણ મેળવ્યું હતું. ત્યારબાદ તેઓ દુબઈ પરત ફર્યા અને સેન્ટ્રલ મિલિટરી કમાન્ડમાં જોડાયા. કારકિર્દીમાં આગળ વધતાં તેમણે વિવિધ મહત્વપૂર્ણ જવાબદારીઓ સંભાળી અને બાદમાં દુબઈ પોલીસ તથા પબ્લિક સિક્યુરિટીના ડેપ્યુટી ચેરમેન તરીકે પણ સેવા આપી હતી.

રમતગમત ક્ષેત્રે પણ મહત્વપૂર્ણ યોગદાન

રમતગમત ક્ષેત્રે પણ શેખ અહમદનું મહત્વપૂર્ણ યોગદાન રહ્યું છે. અલ વસલ સ્પોર્ટ્સ ક્લબ સાથે તેમનો સંબંધ ક્લબના શરૂઆતના સમયથી રહ્યો હતો. વર્ષ 1962માં તેઓ ક્લબના ચેરમેન બન્યા અને તેના પ્રથમ બોર્ડ ઓફ ડિરેક્ટર્સની રચના કરી હતી. રમતગમતને તેઓ માત્ર સ્પર્ધા નહીં પરંતુ યુવાનોમાં પ્રતિભા વિકસાવવાનું માધ્યમ માનતા હતા. ઘોડે સવારી અને અશ્વારોહણ ક્ષેત્રે પણ તેમનું વિશેષ યોગદાન રહ્યું હતું. 1990ના દાયકાની શરૂઆતમાં તેમણે જેબેલ અલી રેસકોર્સની સ્થાપનામાં મહત્વની ભૂમિકા ભજવી હતી. વર્ષ 1982માં તેમના ઘોડા વસલે આઈરિશ 2,000 ગિનીઝ રેસ જીતી હતી.

માનવતાવાદી કાર્યો માટે પણ જાણીતા હતા

મરીન સ્પોર્ટ્સમાં પણ તેમણે મહત્વની ભૂમિકા ભજવી હતી. 1988માં દુબઈ ઈન્ટરનેશનલ મરીન ક્લબની સ્થાપના સાથે તેઓ જોડાયા હતા. 1989માં વિક્ટરી ટીમની શરૂઆત સાથે પણ તેમનું નામ જોડાયેલું રહ્યું. શેખ અહમદ બિન રાશિદ અલ મક્તૂમ સેવાભાવી અને માનવતાવાદી કાર્યો માટે પણ જાણીતા હતા. યુવાનો, રમતવીરો અને જરૂરિયાતમંદોને મદદ કરવા માટે તેમણે વિવિધ પહેલોને સમર્થન આપ્યું હતું. તેમનું જીવન રાષ્ટ્રસેવા, સુરક્ષા, રમતગમત અને સમાજસેવાના અનેક ક્ષેત્રોમાં યોગદાનથી ભરેલું રહ્યું.

આ પણ વાંચો : Pakistan Air Strike on Afghanistan : અફઘાનિસ્તાનમાં પાકિસ્તાની હવાઈ હુમલા, તાલિબાને કડક શબ્દોમાં કરી નિંદા