Russia-Ukraine વચ્ચે થયું 'એનર્જી સીઝફાયર', ડોનાલ્ડ ટ્રમ્પે કહ્યું 'બંને દેશો આને તોડે નહીં'

Russia-Ukraine : રશિયા અને યુક્રેન વચ્ચે ચાલી રહેલા યુદ્ધને લઈને અમેરિકાના રાષ્ટ્રપતિ ડોનાલ્ડ ટ્રમ્પે 'એનર્જી સીઝફાયર'નો દાવો કર્યો છે. ટ્રમ્પે પોતાના સોશિયલ મીડિયા પ્લેટફોર્મ ટ્રુથ સોશિયલ પર જણાવ્યું કે બંને પક્ષો ઊર્જા માળખા પર હુમલા રોકવા માટે સંમત થયા છે અને આ સીઝફાયર તાત્કાલિક અસરથી લાગુ થશે. જોકે, આ દાવા અંગે બંને દેશો તરફથી સત્તાવાર પુષ્ટિ થઈ છે કે નહીં તે સ્પષ્ટ થવું હજુ બાકી છે.

ટ્રમ્પે બંને પક્ષોને આ સમજૂતીનું ઉલ્લંઘન ન કરવાની અપીલ કરી છે. આ પહેલાં યુક્રેનના રાષ્ટ્રપતિ વોલોદિમિર ઝેલેન્સ્કીએ જણાવ્યું હતું કે જો રશિયા યુક્રેનના વીજળી અને ઊર્જા માળખાં પર હુમલા બંધ કરે, તો યુક્રેન પણ રશિયાની તેલ રિફાઈનરીઓ પર હુમલા રોકવા તૈયાર છે.

ડીઝલના ભાવ અને યુદ્ધ વચ્ચે કડી

ટ્રમ્પે શનિવારે રશિયાની તેલ રિફાઈનરીઓ પર યુક્રેનના હુમલાઓને અમેરિકામાં ડીઝલના ભાવ વધવા માટે જવાબદાર ગણાવ્યા હતા. તેમણે ઝેલેન્સ્કીને આવા હુમલા બંધ કરવાની અપીલ કરી હતી. ટ્રમ્પે યુક્રેનના નેતૃત્વ અંગે પણ ટીકા કરતાં કહ્યું હતું કે ઝેલેન્સ્કીએ મોસ્કો સાથે સમજૂતી કરવાની અનેક તકો ગુમાવી છે. ઈરાન યુદ્ધ શરૂ થયા બાદ ઊર્જા બજારમાં સર્જાયેલી અસ્થિરતા અને ડીઝલના ભાવમાં થયેલો વધારો અમેરિકામાં રાજકીય મુદ્દો બન્યો છે. આગામી મધ્યસત્ર ચૂંટણી પહેલાં આ સ્થિતિ ટ્રમ્પની રિપબ્લિકન પાર્ટી માટે પડકારરૂપ બની શકે છે.

ઝેલેન્સ્કીએ રશિયાને ગણાવ્યું જવાબદાર

ઝેલેન્સ્કીએ સ્પષ્ટ કર્યું હતું કે ઊર્જા માળખાં પર હુમલા રોકવા માટે કોઈપણ સમજૂતી સાથે 'વાસ્તવિક ગેરંટી' હોવી જરૂરી છે. તેમણે રશિયાને યુદ્ધ માટે જવાબદાર ગણાવતાં કહ્યું કે યુક્રેનના ઊર્જા માળખા પરના હુમલા આજથી જ બંધ થઈ શકે છે, પરંતુ રશિયાના રાષ્ટ્રપતિ વ્લાદિમીર પુતિન આવું કરવા તૈયાર નથી. હવે ટ્રમ્પના એનર્જી સીઝફાયરના દાવા પર બંને દેશોની પ્રતિક્રિયા અને જમીની સ્તરે હુમલાઓ અટકે છે કે નહીં તેના પર સમગ્ર વિશ્વની નજર રહેશે.

આ પણ વાંચો : UAEના રાસ અલ ખૈમાહ કિનારે દુર્ઘટનાગ્રસ્ત જહાજમાંથી 22 ભારતીયને બચાવી લેવામાં આવ્યા