China Europe Deal : ચીન અને યુરોપ વચ્ચે હાઈબ્રિડ-ઈલેક્ટ્રિક વાહનોના વેપાર પર સહમતી, ચીનના વાણિજ્ય મંત્રાલયે આપી પ્રતિક્રિયા

China Europe Deal : ચીન અને યુરોપ વચ્ચે હાઈબ્રિડ તથા ઈલેક્ટ્રિક વાહનોના વેપારને લઈને મહત્વપૂર્ણ સહમતી સધાઈ છે. બંને પક્ષો વચ્ચે વેપાર અને રોકાણ પરામર્શ વ્યવસ્થા હેઠળ થયેલી ચર્ચાથી વેપાર સંબંધોમાં વધતા તણાવને ટાળવા અને સ્થિર ભાગીદારી જાળવવાનો માર્ગ મોકળો થયો છે. આ અંગે ચીનના વાણિજ્ય મંત્રાલયના પ્રવક્તાએ મીડિયા સાથે વાતચીત દરમિયાન પ્રતિક્રિયા આપી હતી.

હાઈબ્રિડ તથા ઈલેક્ટ્રિક વાહનોના વેપાર અંગે વિસ્તૃત ચર્ચા થઈ

ચીનના વાણિજ્ય મંત્રાલયના પ્રવક્તાએ જણાવ્યું હતું કે, બંને પક્ષોએ સતત સંવાદ અને પરામર્શ દ્વારા અનેક મુદ્દાઓ પર સહમતી બનાવી છે. પરસ્પર સન્માન અને સમાન પરામર્શના સિદ્ધાંતોના આધારે હાઈબ્રિડ તથા ઈલેક્ટ્રિક વાહનોના વેપાર અંગે વિસ્તૃત ચર્ચા કરવામાં આવી હતી. આ ઉપરાંત, આર્થિક અને વેપારી મતભેદોનો સંતુલિત ઉકેલ લાવવા પર પણ ભાર મૂકવામાં આવ્યો હતો.

વેપારના આંકડાઓને આધારે સહમતી

યુરોપિયન યુનિયનના આંકડાકીય કાર્યાલયના આંકડા મુજબ, યુરોપિયન યુનિયને ચીનમાંથી વર્ષ 2024માં 1.07 લાખ અને વર્ષ 2025માં 3.02 લાખ હાઈબ્રિડ વાહનોની આયાત કરી હતી. બંને પક્ષોએ વર્ષ 2025ના આંકડાઓને આધાર બનાવી વેપાર વ્યવસ્થા અંગે સહમતી દર્શાવી હતી. આ વ્યવસ્થાનો હેતુ ચીનની કંપનીઓ માટે નિકાસની તકો અને સ્થિર વૃદ્ધિ જાળવવાની સાથે બંને પક્ષોના ઉદ્યોગોની વાસ્તવિક સ્થિતિ તથા વાજબી ચિંતાઓને ધ્યાનમાં રાખવાનો છે.

ત્રણ મુખ્ય સિદ્ધાંતો પર ભાર

ચીનના પ્રવક્તાએ જણાવ્યું હતું કે, બંને પક્ષોએ ત્રણ મુખ્ય સિદ્ધાંતોની પુષ્ટિ કરી છે. પ્રથમ, વેપાર સંબંધિત નિર્ણયો લેતી વખતે તથ્યોનું સન્માન કરવું. બીજું, ભેદભાવ ન રાખવો અને ખાસ કરીને ચીનનાં ઉત્પાદનો કે કંપનીઓને નિશાન બનાવતાં પગલાં ટાળવાં. ત્રીજું, વિશ્વ વેપાર સંગઠન (WTO)ના નિયમોનું પાલન કરવું. ચીનના વાણિજ્ય મંત્રાલયે જણાવ્યું હતું કે, આ સિદ્ધાંતો ચીનની કંપનીઓના કાયદેસર અધિકારો અને હિતોના રક્ષણ માટે મહત્વપૂર્ણ આધાર પૂરો પાડે છે. બંને પક્ષો વચ્ચેની આ સહમતીથી ચીન અને યુરોપના વેપાર સંબંધોમાં સ્થિરતા જાળવવામાં મદદ મળી શકે છે.

આ પણ વાંચો : Russia-Ukraine વચ્ચે થયું 'એનર્જી સીઝફાયર', ડોનાલ્ડ ટ્રમ્પે કહ્યું 'બંને દેશો આને તોડે નહીં'