Passport Rules 2026: બાળકોના પાસપોર્ટની માન્યતા બદલાઈ, ફીમાં પણ થયો મોટો વધારો

Passport Rules 2026: વિદેશ મંત્રાલયે પાસપોર્ટને લઈને મહત્વપૂર્ણ ફેરફારો જાહેર કર્યા છે. ખાસ કરીને બાળકોના પાસપોર્ટની માન્યતા અને પાસપોર્ટ ફીમાં ફેરફાર કરવામાં આવ્યો છે. નવા નિયમો મુજબ, 15 વર્ષ કે તેથી ઓછી ઉંમરના બાળકને 36 પેજનો પાસપોર્ટ આપવામાં આવે તો તે 5 વર્ષ અથવા બાળક 18 વર્ષનું થાય ત્યાં સુધી, બેમાંથી જે પહેલાં આવે ત્યાં સુધી માન્ય રહેશે.

મંત્રાલય દ્વારા 17 સપ્ટેમ્બર 2026ના રોજ આ અંગે નિયમ જાહેર કરવામાં આવ્યો છે. અગાઉ 15 વર્ષ કે તેથી ઓછી ઉંમરના બાળકો માટે પાસપોર્ટની માન્યતાને લઈને અલગ જોગવાઈ હતી. હવે નવા નિયમ હેઠળ બાળક 18 વર્ષનું થાય અથવા પાસપોર્ટની 5 વર્ષની માન્યતા પૂર્ણ થાય, ત્યારબાદ નવો પાસપોર્ટ બનાવવો પડશે.

પાસપોર્ટ ફીમાં પણ વધારો

નવા નિયમો સાથે પાસપોર્ટની ફીમાં પણ વધારો કરવામાં આવ્યો છે. 15 વર્ષ કે તેથી ઓછી ઉંમરના બાળક માટે 36 પેજના સામાન્ય પાસપોર્ટની ફી ₹1,000થી વધારીને ₹1,750 કરવામાં આવી છે. જ્યારે 36 પેજના તત્કાલ પાસપોર્ટ માટે હવે ₹4,250 ચૂકવવા પડશે, જે અગાઉ ₹3,000 હતી. પુખ્ત વયના અરજદારો માટે 36 પેજના પાસપોર્ટની ફી ₹1,500થી વધારીને ₹2,500 કરવામાં આવી છે. જ્યારે 36 પેજના તત્કાલ પાસપોર્ટની ફી હવે ₹5,000 રહેશે, જે અગાઉ ₹3,500 હતી.

60 પેજના પાસપોર્ટની ફી પણ વધી

18 વર્ષથી વધુ ઉંમરના વ્યક્તિ માટે 60 પેજના પાસપોર્ટની ફી હવે ₹3,500 રહેશે, જે અગાઉ ₹2,000 હતી. 60 પેજના તત્કાલ પાસપોર્ટ માટે હવે ₹6,000 ચૂકવવાના રહેશે, જ્યારે અગાઉ તેની ફી ₹4,000 હતી. આ ઉપરાંત ડુપ્લિકેટ પાસપોર્ટની ફી પણ ₹5,500થી વધારીને ₹8,500 કરવામાં આવી છે. તેથી આગામી દિવસોમાં પાસપોર્ટ માટે અરજી કરતા પહેલાં નવી ફી અને માન્યતાના નિયમો ધ્યાનમાં રાખવા જરૂરી રહેશે.

આ પણ વાંચો: Online Ride બુક કરાવતા પહેલા ટિપ્સ માગવા પર સરકારે મૂક્યો પ્રતિબંધ, ઓલા, ઉબેર, રેપિડોને મોટો ઝટકો