Uttar Pradesh : CM યોગીએ અખિલેશ યાદવના પડકારને સ્વીકાર્યો, કહ્યું 'હું તૈયાર છું, તમે પણ અયોધ્યાથી ચૂંટણી લડો'

Uttar Pradesh : ઉત્તર પ્રદેશના મુખ્યમંત્રી યોગી આદિત્યનાથે શનિવારે બલરામપુરમાં વિકાસ કાર્યોના કાર્યક્રમ દરમિયાન સમાજવાદી પાર્ટી (SP)ના પ્રમુખ અખિલેશ યાદવ પર આકરા પ્રહાર કર્યા હતા. અયોધ્યાથી ચૂંટણી લડવાના મુદ્દે યોગી આદિત્યનાથે અખિલેશ યાદવને સીધો પડકાર ફેંક્યો હતો. તેમણે કહ્યું કે જો અખિલેશ યાદવ અયોધ્યાથી ચૂંટણી લડવા તૈયાર હોય તો તેઓ પણ ત્યાંથી ચૂંટણી લડીને પોતાનું નસીબ અજમાવવા તૈયાર છે.

કાયદો અને વ્યવસ્થાની સ્થિતિમાં સુધારો થયો

મુખ્યમંત્રી યોગી આદિત્યનાથ બલરામપુરમાં ₹803 કરોડથી વધુના ખર્ચની 78 વિકાસ યોજનાઓના લોકાર્પણ અને શિલાન્યાસ કાર્યક્રમમાં હાજર રહ્યા હતા. આ દરમિયાન તેમણે વર્ષ 2017 પહેલાની સરકાર પર નિશાન સાધતા આરોપ લગાવ્યો કે તે સમયે ઉત્તર પ્રદેશમાં ગુનાખોરી, તસ્કરી અને માફિયાઓનો પ્રભાવ હતો. તેમણે દાવો કર્યો કે વર્તમાન સરકારના કાર્યકાળમાં કાયદો અને વ્યવસ્થાની સ્થિતિમાં સુધારો થયો છે અને વિકાસને નવી ગતિ મળી છે.

અયોધ્યા આપણું પવિત્ર ધામ છે

અખિલેશ યાદવની અયોધ્યાને લઈને કરવામાં આવેલી રાજકીય ટિપ્પણીઓનો જવાબ આપતાં યોગીએ કહ્યું કે તેઓ અયોધ્યા એટલા માટે જાય છે, જેથી શહેરના વિકાસમાં કોઈ કચાશ ન રહે અને ઉત્તર પ્રદેશની ઓળખ પર કોઈ કલંક ન લાગે. તેમણે અખિલેશ યાદવને પડકાર આપતાં કહ્યું, “હું તમને ઓફર કરું છું, તમે પણ અયોધ્યાથી ઉમેદવારી નોંધાવો અને હું પણ નોંધાવું. ચાલો, એકવાર નસીબ અજમાવી લઈએ.” તેમણે ઉમેર્યું કે રાજકીય મુકાબલો સીધો થવો જોઈએ અને સામસામે સ્પર્ધા થવી જોઈએ.

જૂની સરકાર પર પણ કર્યા પ્રહાર

યોગી આદિત્યનાથે અગાઉની સમાજવાદી પાર્ટીની સરકાર પર અયોધ્યામાં વીજળી અને સ્વચ્છતાની સ્થિતિ તેમજ માફિયાઓ સામે નરમ વલણ રાખવાના આરોપ લગાવ્યા હતા. તેમણે વેપારીઓને ધમકીઓ આપવા અને જમીનો પર ગેરકાયદે કબજાના મુદ્દે પણ અગાઉની સરકારને ઘેરી હતી. મુખ્યમંત્રીએ બલરામપુરમાં રસ્તાઓ અને પાયાની સુવિધાઓમાં થયેલા સુધારાનો ઉલ્લેખ કરીને કહ્યું કે સરકારનો ઉદ્દેશ વિકાસ યોજનાઓનો લાભ ગામડાં અને સામાન્ય નાગરિકો સુધી પહોંચાડવાનો છે.

આ પણ વાંચો : Tripura-Mizoramમાં નશા વિરોધી કાર્યવાહી, ₹11.30 કરોડથી વધુનો ડ્રગ્સનો જથ્થો જપ્ત