New Delhi : હથિયારો અને રક્ષા સાધનોનું પરીક્ષણ હવે વધુ સરળ બનશે, રાજનાથ સિંહે સુધારેલી SOPને આપી મંજૂરી

New Delhi : ભારતીય રક્ષા ઉદ્યોગ માટે કેન્દ્ર સરકારે મહત્વપૂર્ણ નિર્ણય લીધો છે. રક્ષા મંત્રી રાજનાથ સિંહે પ્રૂફ રેન્જ, ફીલ્ડ ફાયરિંગ રેન્જ અને ટેસ્ટિંગ સુવિધાઓના ઉપયોગ માટેની સુધારેલી સ્ટાન્ડર્ડ ઓપરેટિંગ પ્રોસિજર (SOP)ને મંજૂરી આપી છે. નવી વ્યવસ્થાનો હેતુ સ્વદેશી રીતે વિકસાવવામાં આવતી રક્ષા ટેક્નોલોજી અને હથિયારોના પરીક્ષણની પ્રક્રિયાને સરળ અને ઝડપી બનાવવાનો છે.

આ પ્રોજેક્ટ્સ માટે પ્રૂફ અને ટેસ્ટિંગ ફી માફ કરવામાં આવી

નવી SOP હેઠળ ભારતીય કંપનીઓ દ્વારા વિકસાવવામાં આવતા નવા હથિયારો, રક્ષા સાધનો અને સૈન્ય ટેક્નોલોજીના પરીક્ષણ માટે જરૂરી સુવિધાઓ સરળતાથી ઉપલબ્ધ કરાવવામાં આવશે. ખાસ કરીને iDEX, TDF, Make અને રક્ષા મંત્રાલયની અન્ય વિકાસ યોજનાઓને મોટી રાહત મળશે. આ પ્રોજેક્ટ્સ માટે પ્રૂફ અને ટેસ્ટિંગ ફી માફ કરવામાં આવી છે. સુધારેલી પ્રક્રિયામાં ભારતીય રક્ષા ઉદ્યોગ કઈ પ્રૂફ રેન્જ, ફીલ્ડ ફાયરિંગ રેન્જ અને લેબોરેટરી ટેસ્ટિંગ સુવિધાઓનો ઉપયોગ કરી શકે તે પણ સ્પષ્ટ કરવામાં આવ્યું છે. તેમાં DRDO, સરકારી ક્વોલિટી એશ્યોરન્સ એજન્સીઓ અને ત્રણેય સેનાઓ પાસે ઉપલબ્ધ ટેસ્ટિંગ સુવિધાઓનો સમાવેશ થાય છે.

કંપનીઓ માટે દસ્તાવેજી પ્રક્રિયા સરળ બનશે

જે સ્થળોએ પરીક્ષણ માટે ફી લાગુ પડશે ત્યાં ફી નક્કી કરવા અને ચૂકવણી કરવાની પ્રક્રિયા પણ સ્પષ્ટ કરવામાં આવી છે. જેના કારણે કંપનીઓ માટે દસ્તાવેજી પ્રક્રિયા સરળ બનશે અને પરીક્ષણ પહેલાં જરૂરી પ્રક્રિયાની સ્પષ્ટ માહિતી મળી શકશે. નવી SOPમાં વિવાદોના ઉકેલ માટેની વ્યવસ્થામાં પણ ફેરફાર કરવામાં આવ્યો છે. અગાઉની આર્બિટ્રેશન વ્યવસ્થાને બદલે હવે સરળ સમાધાન પ્રક્રિયા અપનાવવામાં આવશે.

આત્મનિર્ભર ભારતના પ્રયાસોને પણ મજબૂતી મળશે

આ ઉપરાંત દર ત્રિમાસિક ગાળામાં પ્રૂફ રેન્જમાં ત્રણ દિવસ વિકાસલક્ષી પ્રોજેક્ટ્સની પ્રૂફ ફાયરિંગ માટે અનામત રાખવામાં આવશે. તેમાં iDEX, TDF, Make ઉપરાંત ભારતીય રક્ષા ઉદ્યોગ દ્વારા પોતાની પહેલથી વિકસાવવામાં આવતા પ્રોજેક્ટ્સનો પણ સમાવેશ થશે. રક્ષા મંત્રાલયનું માનવું છે કે આ સુધારાથી ટેસ્ટિંગ સુવિધાઓ સુધી પહોંચ વધુ સરળ, પારદર્શક અને ઉદ્યોગલક્ષી બનશે. આ નિર્ણયથી સ્વદેશીકરણ, રક્ષા ક્ષેત્રમાં નવીનતા અને રક્ષા નિકાસને વેગ મળવાની સાથે આત્મનિર્ભર ભારતના પ્રયાસોને પણ મજબૂતી મળશે.

આ પણ વાંચો : Congress Protest : દિલ્હીમાં વિપક્ષનો વિરોધ, રાહુલ ગાંધીને પોલીસે લીધા કસ્ટડીમાં