IIT બોમ્બે વિદ્યાર્થી આત્મહત્યા કેસની તપાસ હવે ક્રાઈમ બ્રાન્ચ કરશે, ડિજિટલ પુરાવા કરશે એકત્ર

IIT Bombay : મુંબઈ પોલીસની ક્રાઈમ બ્રાન્ચે આઈઆઈટી બોમ્બેના વિદ્યાર્થી સાહિલ વાકોડેના આત્મહત્યા કેસની તપાસ પોતાના હાથમાં લીધી છે. 18 સપ્ટેમ્બરે પવઈ કેમ્પસના હોસ્ટેલ નંબર-4માં સાહિલ મૃત હાલતમાં મળી આવ્યો હતો. કેસની તપાસ એસીપી કક્ષાના અધિકારીની આગેવાની હેઠળ ચાલી રહી છે.

ડિજિટલ ડેટા, ચેટ્સ અને અન્ય પુરાવાઓની થશે તપાસ

તપાસ દરમિયાન પોલીસ સાહિલના મોબાઈલ ફોન સહિત જપ્ત કરાયેલા ડિજિટલ ઉપકરણોનું ટેક્નિકલ વિશ્લેષણ કરી રહી છે. હોસ્ટેલના રૂમમાંથી કોઈ સ્યુસાઈડ નોટ મળી ન હોવાથી પોલીસ ડિજિટલ ડેટા, ચેટ્સ અને અન્ય પુરાવાઓની તપાસ કરી રહી છે. સાથે જ ઘટનાસ્થળની પણ તપાસ કરવામાં આવી રહી છે.

સાહિલના માતા-પિતાએ આરોપ લગાવ્યો છે કે મૃત્યુ પહેલાના કેટલાક મહિનાઓ દરમિયાન તેને કથિત રીતે જાતિ આધારિત ટિપ્પણીઓ અને માનસિક સતામણીનો સામનો કરવો પડ્યો હતો. તેમની ફરિયાદના આધારે પ્રોફેસર સૂર્યનારાયણ દુલા સહિત અન્ય લોકો સામે આત્મહત્યા માટે ઉશ્કેરવાના આરોપ અને SC/ST અત્યાચાર નિવારણ કાયદાની જોગવાઈઓ હેઠળ FIR નોંધાઈ છે. જોકે, આ આરોપોની પોલીસ તપાસ ચાલી રહી છે અને તેને હજુ સાબિત થયેલા તથ્ય તરીકે ગણાવી શકાય નહીં.

સંસ્થાએ પ્રોફેસર સૂર્યનારાયણ દુલાને ડીન પદેથી સસ્પેન્ડ પણ કર્યા

સાહિલના મૃત્યુના થોડા કલાકો પહેલા પરીક્ષા દરમિયાન મોબાઈલ ફોન અને ChatGPTના કથિત ઉપયોગને લઈને ઘટના બની હતી. આ મામલે પ્રોફેસર દુલા પરીક્ષાના ઈન્વિજિલેટર હતા. IIT બોમ્બેના ફેકલ્ટી ફોરમે દુલાનું સમર્થન કરતાં જણાવ્યું હતું કે તેમણે સંસ્થાની મંજૂર શૈક્ષણિક પ્રક્રિયા મુજબ પોતાની ફરજ બજાવી હતી. આ દરમિયાન IIT બોમ્બેએ પોતાના અગાઉના નિવેદન અંગે માફી માગી છે. સંસ્થાએ જણાવ્યું કે તપાસ પૂર્ણ થાય તે પહેલાં સાહિલના મૃત્યુ પહેલાંની ઘટનાઓ અંગે ચોક્કસ નિષ્કર્ષ આપવો યોગ્ય નહોતો. સંસ્થાએ પ્રોફેસર સૂર્યનારાયણ દુલાને ડીન પદેથી સસ્પેન્ડ પણ કર્યા છે. હવે ક્રાઈમ બ્રાન્ચ દ્વારા તમામ ડિજિટલ અને ભૌતિક પુરાવાઓની તપાસ બાદ સાહિલના મૃત્યુ સાથે જોડાયેલા સમગ્ર ઘટનાક્રમ અંગે વધુ સ્પષ્ટતા થવાની શક્યતા છે.

આ પણ વાંચો : Delhi TownHall : ચાંદની ચોકના ઐતિહાસિક ટાઉન હોલનો બદલાશે અવતાર, બનશે ‘ગ્લોબલ હેરિટેજ સેન્ટર’