Gurugram Hit and Run Case : બંને આરોપીઓને 14 દિવસની ન્યાયિક કસ્ટડીમાં મોકલાયા

Gurugram Hit and Run Case : ગુરુગ્રામમાં ગોલ્ફ કોર્સ રોડ પર મહિલા બાઈકરને કારથી ટક્કર મારવાના હિટ-એન્ડ-રન કેસમાં કોર્ટે બંને આરોપીઓને 14 દિવસની ન્યાયિક કસ્ટડીમાં મોકલી દીધા છે. શુક્રવારે ગુરુગ્રામની અદાલતમાં આરોપી ડ્રાઈવર કલ્યાણ બંસલા અને તેના પિતરાઈ ભાઈ લવનીશને રજૂ કરવામાં આવ્યા હતા. બંનેને હવે 14 દિવસ બાદ ફરી કોર્ટમાં રજૂ કરવામાં આવશે.

ઘટનાના સમયે લવનીશ પણ કલ્યાણ સાથે કારમાં હાજર હતો

આ અગાઉ બંને આરોપીઓને જ્યુડિશિયલ મેજિસ્ટ્રેટ ફર્સ્ટ ક્લાસ નિધિ બેનીવાલ સમક્ષ રજૂ કરવામાં આવ્યા હતા, જ્યાં તેમને બે દિવસની પોલીસ કસ્ટડીમાં મોકલવામાં આવ્યા હતા. ગુરુગ્રામ પોલીસે હિટ-એન્ડ-રન કેસમાં કલ્યાણ બંસલાની રાજસ્થાનના દૌસાથી અને લવનીશની હરિયાણાના પલવલથી ધરપકડ કરી હતી. પોલીસના જણાવ્યા અનુસાર, ઘટનાના સમયે લવનીશ પણ કલ્યાણ સાથે કારમાં હાજર હતો. આ સમગ્ર મામલો ગોલ્ફ કોર્સ રોડ પર કાર દ્વારા મહિલા બાઈકરને ટક્કર મારતો વીડિયો સામે આવ્યા બાદ પ્રકાશમાં આવ્યો હતો. પોલીસે વીડિયોના આધારે સ્વયં સંજ્ઞાન લઈને કેસ નોંધ્યો હતો. બાદમાં તપાસ દરમિયાન સીસીટીવી ફૂટેજ સહિતના પુરાવાઓનું વિશ્લેષણ કરવામાં આવ્યું હતું.

4 લોકો સામે કડક કાર્યવાહી કરવાની માગ

પીડિતા સિયા અને તેના પરિવારજનોએ આરોપીઓ સામે કડક કાર્યવાહી કરવાની માગ કરી હતી. ત્યારબાદ પોલીસે એફઆઈઆરમાં ભારતીય ન્યાય સંહિતા (BNS)ની કલમ 109 પણ ઉમેરી હતી. તપાસ આગળ વધતા પોલીસે હત્યાના પ્રયાસનો આરોપ પણ ઉમેર્યો છે, જેમાં કાયદા મુજબ 10 વર્ષ સુધીની સજાની જોગવાઈ થઈ શકે છે. સિયાએ કારમાં સવાર તમામ 4 લોકો સામે કડક કાર્યવાહી કરવાની માગ કરી છે. સિયાએ વધુમાં જણાવ્યું કે તેને કોર્ટ પાસેથી ન્યાયની આશા છે. તેમણે કહ્યું કે કારમાં સવાર તમામ ચાર લોકોને પકડીને તેમની સામે કડક કાર્યવાહી થવી જોઈએ, જેથી મહિલાઓની સુરક્ષા અંગે સમાજમાં યોગ્ય સંદેશ જાય. ગુરુગ્રામ પોલીસે પણ જવાબદારો સામે કાયદા મુજબ કડક કાર્યવાહી કરવાની વાત કહી છે.

આ પણ વાંચો : Nithari Case : નિઠારી હત્યાકાંડમાં નિર્દોષ છૂટેલા સુરેન્દ્ર કોલીએ કર્યો આપઘાત, મૃતદેહ ચાની દુકાનમાંથી મળી આવ્યો