Delhi : યુદ્ધજહાજો માટે બ્રહ્મોસ લોન્ચર અને ફાયર કંટ્રોલ સિસ્ટમની ડિલ, 661 કરોડ રૂપિયાનો થશે ખર્ચ

Delhi : ભારતીય નૌકાદળની દરિયાઈ મારક ક્ષમતા વધુ મજબૂત બનાવવા માટે રક્ષા મંત્રાલયે મહત્વપૂર્ણ કરાર કર્યો છે. મંત્રાલયે બ્રહ્મોસ એરોસ્પેસ પ્રાઈવેટ લિમિટેડ સાથે યુદ્ધજહાજો માટે બ્રહ્મોસ ફાયર કંટ્રોલ સિસ્ટમ અને લોન્ચરની ખરીદી માટે ₹661.50 કરોડનો કરાર કર્યો છે. આ કરાર ભારતીય નૌકાદળના અગ્રિમ પંક્તિના યુદ્ધજહાજોને વધુ સક્ષમ બનાવવાની દિશામાં મહત્વપૂર્ણ પગલું માનવામાં આવે છે.

રોજગારીની તકો ઊભી થવાની પણ આશા

રક્ષા મંત્રાલયના જણાવ્યા અનુસાર, આ કરાર 'ભારતીય ખરીદી, ભારતીય રીતે ડિઝાઈન, વિકસિત અને નિર્મિત' શ્રેણી હેઠળ કરવામાં આવ્યો છે. રક્ષા સચિવ રાજેશ કુમાર સિંહની હાજરીમાં કરાર પર હસ્તાક્ષર કરવામાં આવ્યા હતા. પ્રોજેક્ટની ખાસિયત એ છે કે તેમાં ઓછામાં ઓછા 68 ટકા સ્વદેશી સામગ્રીનો ઉપયોગ કરવામાં આવશે. આ કરારથી દેશના સ્થાનિક રક્ષા ઉદ્યોગને પણ પ્રોત્સાહન મળશે. પ્રોજેક્ટમાં અનેક સૂક્ષ્મ, લઘુ અને મધ્યમ ઉદ્યોગો એટલે કે MSME એકમોની ભાગીદારી થવાની શક્યતા છે. સાથે જ આગામી ત્રણ વર્ષ દરમિયાન રોજગારીની તકો ઊભી થવાની પણ અપેક્ષા છે. આ પગલું રક્ષા ક્ષેત્રમાં આત્મનિર્ભરતાને વધુ વેગ આપશે.

જમીન પરના લક્ષ્યોને લાંબા અંતરેથી નિશાન બનાવવાની ક્ષમતા

બ્રહ્મોસ સિસ્ટમ ભારતીય નૌકાદળના વિવિધ અગ્રિમ યુદ્ધજહાજો પર તૈનાત મુખ્ય સપાટીથી સપાટી પર પ્રહાર કરનારી મિસાઈલ સિસ્ટમ છે. તેની ઝડપી ગતિ અને ચોકસાઈ તેને મહત્વપૂર્ણ બનાવે છે. બ્રહ્મોસ દ્વારા સમુદ્ર તેમજ જમીન પર રહેલા લક્ષ્યોને લાંબા અંતરેથી નિશાન બનાવવાની ક્ષમતા છે. નવા ફાયર કંટ્રોલ સિસ્ટમ અને લોન્ચરની ખરીદીથી યુદ્ધજહાજોની આક્રમક અને પ્રહાર ક્ષમતા વધુ મજબૂત થવાની અપેક્ષા છે. આ કરાર ભારતની દરિયાઈ સુરક્ષા, સ્વદેશી રક્ષા ઉત્પાદન અને હિંદ મહાસાગર ક્ષેત્રમાં નૌકાદળની ભવિષ્યની યુદ્ધક ક્ષમતાને મજબૂત બનાવવાની દિશામાં મહત્વપૂર્ણ પગલું છે.

આ પણ વાંચો : Commercial Pilot Training માટે ગુજરાત બન્યું નેશનલ હબ, વધુ 5 FTO શરૂ થતાં સંખ્યા 10 થશે