BRICS 2026: નવી દિલ્હીમાં આજથી 12મો BRICS સંસદીય મંચ, PM મોદી વિવિધ દેશોના પ્રતિનિધિઓને મળશે

BRICS 2026: નવી દિલ્હી ખાતે આજથી 12મા BRICS સંસદીય મંચનો પ્રારંભ થઈ રહ્યો છે. સંસદ ભવન સંકુલના 'સંવિધાન સદન'ના સેન્ટ્રલ હોલમાં 26 અને 27 ઓક્ટોબર દરમિયાન યોજાનારા આ બે દિવસીય કાર્યક્રમમાં BRICSના સભ્ય અને ભાગીદાર દેશોના સંસદીય નેતાઓ ભાગ લેશે. આ મંચનો મુખ્ય ઉદ્દેશ સંસદીય સહયોગને મજબૂત બનાવવાનો અને જનકેન્દ્રિત વિકાસ અંગે ચર્ચા કરવાનો છે. વડાપ્રધાન નરેન્દ્ર મોદી પણ આ કાર્યક્રમમાં હાજરી આપશે અને વિવિધ દેશોમાંથી આવેલા પ્રતિનિધિમંડળોના નેતાઓ સાથે મુલાકાત કરશે.

રશિયાના સંસદીય અધ્યક્ષ ભારત પહોંચ્યા

રશિયન સ્ટેટ ડુમાના અધ્યક્ષ વ્યાચેસ્લાવ વોલોદિન રવિવારે ભારત પહોંચ્યા હતા. તેમણે લોકસભાના અધ્યક્ષ ઓમ બિરલા સાથે મહત્વપૂર્ણ બેઠક કરી હતી. બેઠક દરમિયાન ભારત અને રશિયાના સંસદીય પ્રતિનિધિમંડળોએ વૈશ્વિક મંચો પર સહયોગ વધારવા અને આતંકવાદ સામે સંયુક્ત પ્રયાસો કરવાની જરૂરિયાત પર ભાર મૂક્યો હતો.

આતંકવાદ સામે એકતાનો સંદેશ

ઓમ બિરલાએ ભારત અને રશિયા વચ્ચેના લાંબા સમયથી ચાલતા મૈત્રીપૂર્ણ સંબંધોનો ઉલ્લેખ કર્યો હતો. તેમણે આતંકવાદ સામેની લડાઈમાં રશિયાના સતત સમર્થનની પ્રશંસા કરી હતી. સાથે જ વૈશ્વિક શાંતિ જાળવવા અને આતંકવાદના ખતરાનો સામનો કરવા આંતરરાષ્ટ્રીય સમુદાયે એકતા અને દૃઢ સંકલ્પ સાથે કામ કરવું જોઈએ તેમ જણાવ્યું હતું.

2027માં ભારત-રશિયા સંબંધોના 80 વર્ષ પૂર્ણ થશે

ભારત અને રશિયા વચ્ચે 2027માં રાજદ્વારી સંબંધોના 80 વર્ષ પૂર્ણ થશે. ઓમ બિરલાના જણાવ્યા અનુસાર, વડાપ્રધાન નરેન્દ્ર મોદી અને રશિયાના રાષ્ટ્રપતિ વ્લાદિમીર પુતિનના નેતૃત્વ હેઠળ બંને દેશો વચ્ચેની વિશેષ વ્યૂહાત્મક ભાગીદારી વધુ મજબૂત બની છે.

જનકેન્દ્રિત વિકાસ પર રહેશે મુખ્ય ચર્ચા

આ સંમેલનની મુખ્ય થીમ 'જનકેન્દ્રિત વિકાસ માટે સંસદોને સશક્ત બનાવવી' છે. તેમાં લોકોની જરૂરિયાતો અને આકાંક્ષાઓને ધ્યાનમાં રાખીને વિકાસને આગળ વધારવામાં સંસદીય સંસ્થાઓની ભૂમિકા પર ચર્ચા થશે. કાર્યક્રમમાં BRICS દેશોના સંસદીય નેતાઓ ઉપરાંત કેન્દ્રીય મંત્રીઓ, રાજ્યસભાના ઉપસભાપતિ હરિવંશ, રાજ્ય વિધાનસભાઓના અધ્યક્ષો, સાંસદો અને અન્ય મહાનુભાવો પણ ભાગ લેશે.

આ સંમેલન દ્વારા વિવિધ દેશો વચ્ચે સંસદીય સંવાદ, પરસ્પર સહયોગ અને વૈશ્વિક મુદ્દાઓ પર સંયુક્ત ચર્ચાને નવી દિશા આપવાનો પ્રયાસ કરવામાં આવશે.

આ પણ વાંચો : Mann Ki Baatમાં PM મોદીએ મહર્ષિ વાલ્મીકિ અને ભાઈ પરમાનંદને કર્યા યાદ, કહ્યું- તેમનું જીવન આજે પણ પ્રેરણાદાયી