Mann Ki Baatમાં PM મોદીએ મહર્ષિ વાલ્મીકિ અને ભાઈ પરમાનંદને કર્યા યાદ, કહ્યું- તેમનું જીવન આજે પણ પ્રેરણાદાયી

Mann Ki Baat: વડાપ્રધાન નરેન્દ્ર મોદીએ રવિવારે પોતાના માસિક રેડિયો કાર્યક્રમ ‘મન કી બાત’માં મહર્ષિ વાલ્મીકિ અને સ્વાતંત્ર્ય સેનાની ભાઈ પરમાનંદને યાદ કર્યા હતા. તેમણે કહ્યું કે હજારો વર્ષ વીતી ગયા હોવા છતાં મહર્ષિ વાલ્મીકિની રામાયણ આજે પણ લોકોને જીવનના નવા પાઠ શીખવે છે. સાથે જ તેમણે ભાઈ પરમાનંદના જીવન, સ્વાતંત્ર્ય સંગ્રામમાં તેમના યોગદાન અને આર્ય સમાજ સાથેના જોડાણનો ઉલ્લેખ કર્યો હતો.

વાલ્મીકિ રામાયણમાંથી સેવા અને સમરસતાની શીખ

વડાપ્રધાન મોદીએ કહ્યું કે મહર્ષિ વાલ્મીકિએ રામાયણ દ્વારા સતત પ્રયત્ન કરતા રહેવા, સેવા, કરુણા અને સામાજિક સમરસતાનું મહત્ત્વ સમજાવ્યું છે. તેમણે ભગવાન રામના જીવનના પ્રસંગોનો ઉલ્લેખ કરતાં કહ્યું કે ભગવાન રામે માતા શબરીની ભક્તિનો સ્વીકાર કર્યો અને નિષાદરાજની મિત્રતાને સન્માન આપ્યું હતું.

મોદીના જણાવ્યા મુજબ, સૌને સાથે લઈને ચાલવાનો આ વિચાર આજે પણ સમાજને દિશા આપે છે. તેમણે અયોધ્યાના ભવ્ય રામમંદિરનો ઉલ્લેખ કરતાં કહ્યું કે ત્યાં મહર્ષિ વાલ્મીકિ, નિષાદરાજ અને માતા શબરીનાં મંદિરો પણ બનાવવામાં આવ્યાં છે. અયોધ્યાના એરપોર્ટનું નામ મહર્ષિ વાલ્મીકિના નામ પર રાખવામાં આવ્યું હોવાનો પણ તેમણે ઉલ્લેખ કર્યો હતો.

ભાઈ પરમાનંદની 150મી જન્મજયંતીનો ઉલ્લેખ

વડાપ્રધાન મોદીએ જણાવ્યું કે 4 નવેમ્બરે ભાઈ પરમાનંદની 150મી જન્મજયંતી મનાવવામાં આવશે. તેમણે કહ્યું કે ભાઈ પરમાનંદના વિચારો અને પ્રેરણાના મુખ્ય સ્ત્રોતોમાં આર્ય સમાજ સાથેનું તેમનું ગાઢ જોડાણ સામેલ હતું.

મોદીએ જણાવ્યું કે વીસમી સદીની શરૂઆતમાં ભાઈ પરમાનંદ આર્ય સમાજના કાર્ય માટે દક્ષિણ આફ્રિકા ગયા હતા, જ્યાં તેમની મુલાકાત મહાત્મા ગાંધી સાથે પણ થઈ હતી. તેમણે ગુયાનામાં ગિરમિટિયા સમુદાય વચ્ચે પણ કાર્ય કર્યું હતું. વડાપ્રધાને પોતાની ગુયાના મુલાકાત દરમિયાન આર્ય સમાજના સ્મારકની મુલાકાત લીધી હોવાની વાત પણ યાદ કરી હતી.

સ્વાતંત્ર્ય સંગ્રામમાં મહત્ત્વપૂર્ણ યોગદાન

ભાઈ પરમાનંદે ભારતના સ્વાતંત્ર્ય સંગ્રામમાં મહત્વપૂર્ણ ભૂમિકા ભજવી હતી. વડાપ્રધાને જણાવ્યું કે તેઓ ગદર પાર્ટીના સ્થાપક સભ્યોમાં સામેલ હતા અને અંગ્રેજ શાસન દરમિયાન તેમને કાળા પાણીની સજા પણ થઈ હતી.

તેમણે ભાઈ પરમાનંદના પુસ્તક ‘આપબીતી: કાલે પાની કે કારાવાસ કી કહાની’નો ઉલ્લેખ કરીને યુવાનોને સ્વાતંત્ર્ય સેનાનીઓના બલિદાન વિશે જાણવા માટે આ પુસ્તક વાંચવાની અપીલ કરી હતી. સજા પૂર્ણ થયા બાદ ભાઈ પરમાનંદે શિક્ષણના ક્ષેત્રમાં પણ કાર્ય કર્યું હતું. મોદીએ જણાવ્યું કે તેમણે ભગતસિંહને પણ ભણાવ્યા હતા અને જીવનના વિવિધ તબક્કાઓમાં તેમનું યોગદાન પ્રેરણાદાયી રહ્યું છે.

અંતમાં વડાપ્રધાને યુવાનોને ભાઈ પરમાનંદના જીવન અને વિચારો વિશે જાણવા તેમજ તેમની પ્રેરણાને અન્ય લોકો સુધી પહોંચાડવા અનુરોધ કર્યો હતો.

આ પણ વાંચો : Andhra Pradeshના દરિયાકાંઠે વાવાઝોડાનું જોખમ, 28 ઑક્ટોબરે ત્રાટકવાની શક્યતા