Valsad : માંડવામાં ગ્રામસભાના ઠરાવના ધજાગરા! વિરોધ છતાં સ્ટોન ક્રશર ક્વોરી ધમધમી?
Valsad Stone Quarry
Valsad : માંડવામાં ગ્રામસભાના ઠરાવના ધજાગરા! વિરોધ છતાં સ્ટોન ક્રશર ક્વોરી ધમધમી?
Valsad Stone Quarry
Valsad : સ્થાનિકો દ્વારા હવે ક્વોરીને કાયમી ધોરણે બંધ કરવાની માગ કરવામાં આવી રહી છે. મળતી માહિતી મુજબ, માંડવા ગામના સર્વે નંબર 1547ની જમીન પર ચાલતી પથ્થર દળવાની ક્વોરી બંધ કરાવવા માટે 5 જૂન 2026ના રોજ ખાસ ગ્રામસભાનું આયોજન કરવામાં આવ્યું હતું.
ગ્રામસભામાં ક્વોરીના કારણે ઊભી થતી સમસ્યાઓ અંગે ગ્રામજનોએ ગંભીર વાંધા રજૂ કર્યા હતા.
55 મત છતાં ક્વોરી બંધ નહીં
ગ્રામજનોના જણાવ્યા મુજબ, ક્વોરીની નજીક જ પવિત્ર હનુમાનજીનું મંદિર અને હાટ બજાર આવેલાં છે. ક્વોરીમાંથી નીકળતી ધૂળ અને અવાજને કારણે આસપાસના વિસ્તારમાં રહેતા લોકો તથા વેપારીઓને મુશ્કેલી પડતી હોવાનો સ્થાનિકોનો આક્ષેપ છે.
આ ઉપરાંત ક્વોરીથી માત્ર આશરે 500 મીટરની ત્રિજ્યામાં પ્રાથમિક શાળા માંડવા અને સરસ્વતી કન્યા વિદ્યાલય આવેલી હોવાનું ગ્રામજનોનું કહેવું છે. પથ્થર દળવાની કામગીરી દરમિયાન થતી ધૂળ અને ભારે અવાજના કારણે વિદ્યાર્થીઓના અભ્યાસ પર પણ અસર થતી હોવાની ચિંતા વ્યક્ત કરવામાં આવી છે.
ઠરાવનો અમલ ક્યારે થશે?
ખેતીને લઈને પણ ગ્રામજનોમાં ચિંતા છે. ક્વોરીમાંથી નીકળતા ધૂળ-પ્રદૂષણને કારણે આસપાસની ખેતીલાયક જમીનને નુકસાન થવાની અને ભવિષ્યમાં જમીન બંજર બનવાની ભીતિ ગ્રામજનો દ્વારા વ્યક્ત કરવામાં આવી છે. ખાસ ગ્રામસભામાં ક્વોરી ચાલુ રાખવાની તરફેણમાં એક પણ મત પડ્યો ન હતો, જ્યારે ક્વોરી બંધ રાખવાની તરફેણમાં 55 મત પડ્યા હતા.
આ રીતે ગ્રામસભામાં ક્વોરી બંધ કરવાનો ઠરાવ મંજૂર કરવામાં આવ્યો હતો. ગ્રામજનોનો આક્ષેપ છે કે તમામ જરૂરી સરકારી સહી-સિક્કા સાથે ઠરાવ પસાર થયા બાદ પણ ક્વોરીની કામગીરી બંધ થઈ નથી. પરિણામે ગ્રામસભાના ઠરાવ અને તેના અમલને લઈને હવે ગંભીર સવાલો ઊભા થયા છે.
માંડવામાં ક્વોરી સામે ગ્રામજનોનો રોષ
સ્થાનિકોએ સરપંચ અને તંત્રની કામગીરી સામે પણ આક્ષેપો કર્યા છે અને ક્વોરી ચાલુ રહેવા પાછળ મિલીભગત તથા હપ્તાખોરી હોવાના ગંભીર આક્ષેપો કર્યા છે. જોકે, આ આક્ષેપોની સ્વતંત્ર પુષ્ટિ થવાની બાકી છે અને સંબંધિત પક્ષનો જવાબ સામે આવ્યો નથી.
હવે ગ્રામજનો દ્વારા તંત્ર સમક્ષ સ્પષ્ટ માંગ કરવામાં આવી રહી છે કે ગ્રામસભાના ઠરાવનો અમલ કરવામાં આવે અને વિવાદિત સ્ટોન ક્રશર ક્વોરીને કાયમી ધોરણે બંધ કરવામાં આવે. માંડવા ગામમાં ક્વોરી મુદ્દે સ્થાનિકોનો વિરોધ આગામી દિવસોમાં વધુ ઉગ્ર બને છે કે નહીં અને તંત્ર દ્વારા શું કાર્યવાહી કરવામાં આવે છે તેના પર સૌની નજર છે.
Vivek Shah
વિવેક શાહ મિડીયા ક્ષેત્રે બહોળો અનુભવ ધરાવે છે, TV9 Gujaratiમાં તેમણે રીપોર્ટર અને પ્રોડયુસર તરીકે પણ 7 વર્ષ કરતા વધુ સમય કામ કર્યુ છે, સાથે સાથે ABP Asmitaમાં 2 વર્ષ જેટલો સમય Associate Producer તરીકે કામ કર્યુ છે અને Sandesh NEWS Digitalમાં છેલ્લા 2 વર્ષ Senior Sub Editor તરીકે કામ કર્યુ છે. ગુજરાત ફર્સ્ટમાં Assistant Ediotor તરીકે તેમણે 3 મહિના કામ કર્યુ અને હાલમાં તેઓ Growthnow NEWS માં Senior Assignment Editor તરીકે ડિજિટલ વિભાગમાં કામ કરી રહ્યાં છે.
