Vadodara Gotri Murder: ગોત્રીમાં ધોળાદહાડે યુવકની હત્યા, ખંજરના ઘા ઝીંકી હુમલાખોર ફરાર

Vadodara Gotri Murder: શહેરના ગોત્રી વિસ્તારમાં જાહેર માર્ગ પર ધોળાદહાડે યુવકની હત્યાની સનસનાટીભરી ઘટના સામે આવી છે. જય ઉર્ફે ટિંકુ નામના શખ્સે યુવરાજ ડોડિયા નામના યુવક પર ખંજર વડે ઉપરાછાપરી હુમલો કરતાં તેનું ઘટનાસ્થળે જ કરુણ મોત નીપજ્યું હતું. આ ઘટનાને પગલે સમગ્ર ગોત્રી વિસ્તારમાં ભય અને અફરાતફરીનો માહોલ સર્જાયો છે.

હત્યાનું કારણ ક્યારે સ્પષ્ટ થશે?

પ્રાથમિક માહિતી અનુસાર, દારૂના ધંધાની હરીફાઈને લઈને આ હત્યાની ઘટનાને અંજામ આપવામાં આવ્યો હોવાની આશંકા વ્યક્ત કરવામાં આવી રહી છે. જોકે, હત્યા પાછળનું ચોક્કસ કારણ પોલીસ તપાસ બાદ જ સ્પષ્ટ થશે. જાહેર માર્ગ પર અચાનક થયેલા હુમલામાં યુવરાજ ડોડિયા ગંભીર રીતે ઘવાયો હતો. હુમલાખોરે ખંજરના અનેક ઘા ઝીંકતાં યુવરાજને જીવલેણ ઈજાઓ પહોંચી હતી અને તેનું ઘટનાસ્થળે જ મોત થયું હતું.

હુમલાની ઘટનાને અંજામ આપ્યા બાદ આરોપી જય ઉર્ફે ટિંકુ સ્થળ પરથી ફરાર થઈ ગયો હતો. બનાવની જાણ થતાં જ ગોત્રી પોલીસનો કાફલો તાત્કાલિક ઘટનાસ્થળે પહોંચી ગયો હતો. પોલીસે જરૂરી કાર્યવાહી હાથ ધરી યુવરાજ ડોડિયાના મૃતદેહને પોસ્ટમોર્ટમ માટે સરકારી હોસ્પિટલમાં ખસેડ્યો હતો. બીજી તરફ, ફરાર આરોપીને ઝડપી પાડવા પોલીસે અલગ-અલગ દિશામાં તપાસ શરૂ કરી છે.

હત્યાની ઘટનાથી ગોત્રી વિસ્તારમાં ચકચાર મચી

આરોપી શહેર છોડીને ભાગી ન જાય તે માટે પોલીસ દ્વારા નાકાબંધી કરવામાં આવી છે. સાથે જ ઘટનાસ્થળ અને આસપાસના વિસ્તારોમાં લાગેલા CCTV કેમેરાના ફૂટેજ તપાસવામાં આવી રહ્યા છે. પ્રત્યક્ષદર્શીઓની પૂછપરછ કરીને પણ પોલીસ મહત્વની કડીઓ મેળવવાનો પ્રયાસ કરી રહી છે. ધોળાદહાડે જાહેર માર્ગ પર બનેલી આ હત્યાની ઘટનાથી ગોત્રી વિસ્તારમાં ચકચાર મચી ગઈ છે. હવે પોલીસ તપાસમાં હત્યા પાછળનું સાચું કારણ અને આરોપી સાથે સંકળાયેલા અન્ય લોકોની ભૂમિકા અંગે વધુ વિગતો સામે આવવાની શક્યતા છે.

આ પણ વાંચો: Gujarat Fake Doctors: બોગસ ડોક્ટરો સામે આરોગ્ય વિભાગની મેગા ડ્રાઈવ, 38 ઝડપાયા, 35 સામે FIR