Suratમાં 17 ફૂટના બાપ્પાનું અનોખી રીતે વિસર્જન, પંચામૃત અભિષેક બાદ થશે વિદાય

Surat 17 Feet Ganesh Idol Visarjan: સુરતમાં ગણેશોત્સવ બાદ ગણપતિ બાપ્પાના વિસર્જનને લઈને અનોખી તૈયારીઓ કરવામાં આવી છે. પાર્લે પોઈન્ટ ખાતે આવેલા કેશવ ગ્રાઉન્ડમાં સરકાર ગ્રુપ દ્વારા 17 ફૂટ ઊંચી ગણેશ પ્રતિમાનું અનોખી રીતે વિસર્જન કરવામાં આવશે. સરકાર ગ્રુપ દ્વારા તૈયાર કરવામાં આવેલી આ વિશાળ ગણેશ પ્રતિમા 551 કિલો ટિશ્યુ પેપરથી બનાવવામાં આવી છે. બાપ્પાની આ પ્રતિમાનું વિસર્જન પરંપરાગત રીતે પાણીમાં નહીં પરંતુ વિશેષ ધાર્મિક વિધિ સાથે કરવામાં આવશે.

પંચામૃત અભિષેક બાદ બાપ્પાને અપાશે વિદાય

ગણપતિ બાપ્પાના વિસર્જન પ્રસંગે સૌપ્રથમ ભગવાન ગણેશને પંચામૃતનો અભિષેક કરવામાં આવશે. ત્યારબાદ ધાર્મિક વિધિ અને આરતી સાથે બાપ્પાને વિદાય આપવામાં આવશે. આ પ્રસંગને ભવ્ય બનાવવા માટે વારાણસીથી ગંગા આરતી કરનારા 7 પંડિતોને સુરત બોલાવવામાં આવ્યા છે. આ પંડિતો દ્વારા બાપ્પાની વિશેષ આરતી કરવામાં આવશે.

વિસર્જનનું લાઇવ પ્રસારણ, એક લાખ લોકો દર્શન કરશે

પાર્લે પોઈન્ટના કેશવ ગ્રાઉન્ડ ખાતે યોજાનારા આ અનોખા વિસર્જનનું જીવંત પ્રસારણ પણ કરવામાં આવશે. આયોજકોના જણાવ્યા મુજબ, લાઇવ પ્રસારણના માધ્યમથી અંદાજે એક લાખ જેટલા લોકો બાપ્પાના અંતિમ દર્શનનો લાભ લઈ શકશે. 17 ફૂટની વિશાળ પ્રતિમા, 551 કિલો ટિશ્યુ પેપરનો ઉપયોગ અને પંચામૃત અભિષેક બાદ કરવામાં આવનાર વિસર્જનને કારણે સુરતનું આ ગણેશ વિસર્જન વિશેષ આકર્ષણનું કેન્દ્ર બન્યું છે.