Suratના ટેક્સટાઇલ ઉદ્યોગકારો નિકાસ પર ધ્યાન કેન્દ્રિત કરે: કેન્દ્રીયમંત્રી ગિરિરાજ સિંહ

PM MITRA Park Surat Textile Export: સુરતના કાપડ ઉદ્યોગને વૈશ્વિક સ્તરે વધુ મજબૂત બનાવવા અને નવસારીના વાંસીબોરસીમાં સાકાર થઈ રહેલા પીએમ મિત્ર પાર્કને વિશ્વકક્ષાની સુવિધાઓથી સજ્જ કરવા માટે કેન્દ્રીય કાપડ મંત્રી ગિરિરાજ સિંહના અધ્યક્ષસ્થાને સુરત સર્કિટ હાઉસ ખાતે ઉદ્યોગકારો અને રોકાણકારો સાથે બેઠક યોજાઈ હતી. બેઠકમાં પીએમ મિત્ર પાર્કના વિકાસ, રોકાણની તકો અને કાપડની નિકાસ વધારવા અંગે ચર્ચા કરવામાં આવી હતી.

કેન્દ્રીય મંત્રી ગિરિરાજ સિંહે સુરતના ટેક્સટાઇલ ઉદ્યોગકારો અને રોકાણકારોને કાપડની નિકાસ પર વિશેષ ધ્યાન કેન્દ્રિત કરવા અનુરોધ કર્યો હતો. તેમણે જણાવ્યું હતું કે સુરતના ઉદ્યોગપતિઓ ઉચ્ચ ગુણવત્તાનું કાપડ તૈયાર કરવા માટે નવીનતમ ટેકનોલોજી અને આધુનિક મશીનરીનો ઉપયોગ કરીને સરાહનીય પ્રયોગો કરી રહ્યા છે. ગુજરાત, ખાસ કરીને સુરત પાસે વૈશ્વિક બજારમાં કાપડની નિકાસ વધારવાની વિશાળ ક્ષમતા છે.

2,100 એકરમાં આકાર લઈ રહ્યો છે પીએમ મિત્ર પાર્ક

મંત્રી ગિરિરાજ સિંહે જણાવ્યું હતું કે નવસારી જિલ્લાના વાંસીબોરસીમાં આશરે 2,100 એકર વિસ્તારમાં વિકસાવવામાં આવી રહેલો પીએમ મિત્ર પાર્ક ગુજરાતના ટેક્સટાઇલ ઉદ્યોગ માટે મહત્ત્વપૂર્ણ સાબિત થઈ શકે છે. આ પાર્કનો હેતુ કાપડ ઉદ્યોગને આધુનિક માળખાકીય સુવિધાઓ પૂરી પાડવાની સાથે ઉત્પાદન અને નિકાસને વેગ આપવાનો છે. પાર્કમાં રસ્તા, પાણી, વીજળી અને અન્ય ઔદ્યોગિક માળખાકીય સુવિધાઓ ઊભી કરવા માટે કામગીરી ચાલી રહી હોવાનું મંત્રીએ જણાવ્યું હતું. તેમણે પાર્કને પ્રદૂષણમુક્ત અને વિશ્વકક્ષાના ઔદ્યોગિક કેન્દ્ર તરીકે વિકસાવવા માટે સુરતના ઉદ્યોગપતિઓના સહયોગની અપેક્ષા પણ વ્યક્ત કરી હતી.

વૈશ્વિક બજારમાં સુરતના કાપડની પહોંચ વધારવા પર ભાર

બેઠક દરમિયાન રોકાણકારો અને ઉદ્યોગકારોનાં સૂચનો તથા રજૂઆતો સાંભળવામાં આવી હતી. ટેક્સટાઇલ ક્ષેત્રમાં નવી ટેકનોલોજીનો ઉપયોગ, ઉચ્ચ ગુણવત્તાવાળા કાપડનું ઉત્પાદન અને આંતરરાષ્ટ્રીય બજારમાં સ્પર્ધાત્મકતા વધારવા જેવા મુદ્દાઓ પર ભાર મૂકવામાં આવ્યો હતો. મંત્રીના જણાવ્યા અનુસાર, આધુનિક મશીનરી અને નવીન ઉત્પાદન પદ્ધતિઓના કારણે ભારતીય કાપડ ઉદ્યોગને વૈશ્વિક સ્તરે આગળ વધવાની તકો મળી રહી છે. સુરતના ઉદ્યોગકારો આ તકોનો લાભ લઈને નિકાસમાં વધારો કરે તે જરૂરી છે. આ બેઠકમાં રાજ્યનાં ટેક્સટાઇલ કમિશનર વૃંદા દેસાઈ સહિત સુરતના અગ્રણી ટેક્સટાઇલ ઉદ્યોગકારો અને રોકાણકારો ઉપસ્થિત રહ્યા હતા. પીએમ મિત્ર પાર્કને વધુ ઉદ્યોગલક્ષી બનાવવા માટે ઉદ્યોગજગતનાં સૂચનો અને સહયોગને મહત્ત્વપૂર્ણ ગણાવવામાં આવ્યાં હતાં.