ડુંગળીના ભાવમાં ઉછાળો: ‘ગરીબોની કસ્તુરી’ હવે બની મોંઘી, સુરતમાં ભાવ ₹1100 સુધી પહોંચ્યો

Onion Price Hike Surat: સામાન્ય રીતે ‘ગરીબોની કસ્તુરી’ તરીકે ઓળખાતી ડુંગળીના ભાવમાં છેલ્લા કેટલાક દિવસોથી વધારો જોવા મળી રહ્યો છે. મહારાષ્ટ્રમાં વરસાદના કારણે ડુંગળીના પાકને નુકસાન પહોંચતા બજારમાં આવક ઘટી હોવાનું વેપારીઓ જણાવી રહ્યા છે. તેની સીધી અસર ગુજરાતના બજારો પર પણ જોવા મળી રહી છે.

15 દિવસથી ભાવમાં સતત વધારો

ગુજરાતમાં ડુંગળીનો મોટો જથ્થો મહારાષ્ટ્રથી આવતો હોય છે. જોકે, છેલ્લા કેટલાક સમયથી મહારાષ્ટ્રમાંથી આવકમાં ઘટાડો થતાં સુરત સહિતના બજારોમાં ડુંગળીના ભાવમાં વધારો થયો છે. વેપારીઓના જણાવ્યા મુજબ, છેલ્લા 15 દિવસથી ડુંગળીના ભાવમાં સતત વધારો જોવા મળી રહ્યો છે. એક મહિના અગાઉ જે ડુંગળીનો ભાવ આશરે ₹500થી ₹700 સુધી હતો, તે હાલમાં વધીને ₹800થી ₹1100 સુધી પહોંચ્યો છે.

સુરત APMCમાં આવક ઘટી

સુરતની APMC માર્કેટમાં અગાઉ દરરોજ આશરે 30 જેટલી ગાડીઓમાં ડુંગળીની આવક થતી હતી. હવે આ આવક ઘટીને આશરે 18થી 20 ગાડીઓ સુધી પહોંચી હોવાનું વેપારીઓ જણાવી રહ્યા છે. આવકમાં ઘટાડો થતાં બજારમાં ડુંગળીની ઉપલબ્ધતા પર અસર પડી છે અને તેના કારણે ભાવમાં વધારો નોંધાઈ રહ્યો છે.

મહારાષ્ટ્રમાં વરસાદથી પાકને નુકસાન

વેપારીઓના જણાવ્યા મુજબ, મહારાષ્ટ્રમાં ડુંગળીનો પાક લેવાના સમયગાળા દરમિયાન વરસાદ પડતાં પાકને નુકસાન થયું હતું. હવામાનમાં આવેલા ફેરફારને કારણે ઉત્પાદન ઘટ્યું હોવાનું માનવામાં આવે છે. ઉત્પાદન અને આવકમાં ઘટાડાની અસર હવે હોલસેલ માર્કેટના ભાવ પર જોવા મળી રહી છે.

સામાન્ય ગ્રાહકોના બજેટ પર અસર

ડુંગળીના ભાવ વધતાં તેની અસર હવે માત્ર વેપારીઓ પૂરતી સીમિત રહી નથી. છૂટક બજારમાં ખરીદી કરતા સામાન્ય ગ્રાહકોને પણ વધુ ભાવ ચૂકવવો પડી રહ્યો છે. રોજિંદા રસોઈમાં નિયમિત ઉપયોગમાં આવતી ડુંગળી મોંઘી થતાં ઘરગથ્થુ બજેટ પર વધારાનો બોજ પડી રહ્યો છે. વેપારીઓના જણાવ્યા મુજબ, બજારમાં ડુંગળીની આવક સામાન્ય થતા અને સપ્લાય સ્થિર થયા બાદ ભાવમાં સ્થિરતા આવવામાં આશરે એક મહિના જેટલો સમય લાગી શકે છે.