Surat News : ગન અને ચપ્પાની અણીએ મહિલાને લૂંટવાનો પ્રયાસ કરનાર બે આરોપી ઝડપાયા

Surat News : મહિલાના ગળા પર ચપ્પુ અને માથા પર દેશી તમંચો તાકી સોનાની ચેઇન અને બંગડીઓ લૂંટવાનો પ્રયાસ કરવામાં આવ્યો હતો. જોકે, મહિલાએ હિંમતપૂર્વક પ્રતિકાર કરતાં આરોપીઓનો પ્રયાસ નિષ્ફળ ગયો હતો. પેટ્રોલિંગ કરી રહેલી વેસુ પોલીસે તાત્કાલિક કાર્યવાહી કરીને બંને આરોપીઓને ઝડપી પાડ્યા છે.

પોલીસે બાતમીના આધારે આરોપીને ઝડપ્યા

મહિલા પોતાની કારમાં બેઠી હતી ત્યારે બે શખ્સોએ તેને નિશાન બનાવી હતી. આરોપીઓએ મહિલાને ડરાવવા માટે ચપ્પુ અને દેશી તમંચાનો ઉપયોગ કર્યો હતો અને તેની પાસેથી સોનાના દાગીના લૂંટવાની કોશિશ કરી હતી. આ દરમિયાન મહિલાએ હિંમત દાખવીને પ્રતિકાર કરતાં બંને પક્ષ વચ્ચે ઝપાઝપી થઈ હતી. જેમાં મહિલાને કાંડાના ભાગે સામાન્ય ઇજા પહોંચી હોવાનું જાણવા મળ્યું છે.

આરોપીઓ મહિલાની કાર લઈને ભાગી જવામાં નિષ્ફળ રહ્યા હતા. ત્યારબાદ તેઓ નજીકમાં આવેલી એક નિર્માણાધીન બિલ્ડિંગમાં સંતાઈ ગયા હતા. બીજી તરફ, મહિલાની બૂમાબૂમ સાંભળીને પેટ્રોલિંગ કરી રહેલી વેસુ પોલીસ તાત્કાલિક ઘટનાસ્થળે પહોંચી હતી. પોલીસે આસપાસના વિસ્તારમાં કોમ્બિંગ હાથ ધરીને બંને શખ્સોને ઝડપી પાડ્યા હતા.

મહિલાએ હિંમતપૂર્વક પ્રતિકાર કરતાં લૂંટનો પ્રયાસ નિષ્ફળ ગયો હતો

પકડાયેલા આરોપીઓની ઓળખ ઉત્તર પ્રદેશના મેરઠના રહેવાસી મહતાબ અબ્દુલ સલામ અને રોશન બુન્દુ સેફી તરીકે થઈ છે. પોલીસ દ્વારા બંનેની ધરપકડ કરીને આગળની તપાસ હાથ ધરવામાં આવી છે. આરોપીઓ પાસેથી દેશી તમંચો, જીવતા કારતૂસ અને ગુનામાં વપરાયેલાં હથિયારો કબજે કરવામાં આવ્યાં છે. પ્રાથમિક તપાસ મુજબ, બંને આરોપીઓ 6 ઓક્ટોબરે મેરઠથી સુરત આવ્યા હતા અને રેલવે સ્ટેશન નજીક આવેલી એક હોટલમાં રોકાયા હતા.

પોલીસની પૂછપરછ દરમિયાન સુરતમાંથી ચોરી કરવામાં આવેલી એક એક્ટિવા અને એક બાઈક પણ મળી આવ્યાં હોવાનું સામે આવ્યું છે. પોલીસે બંને વાહનો રિકવર કરીને આ મામલે વધુ તપાસ શરૂ કરી છે. આ વાહનોની ચોરી કયા સ્થળેથી અને કયા સંજોગોમાં કરવામાં આવી હતી તે સહિતની વિગતો તપાસમાં સ્પષ્ટ થઈ શકે છે. વેસુ વિસ્તારમાં બનેલી આ ઘટનામાં મહિલાએ હિંમતપૂર્વક પ્રતિકાર કરતાં લૂંટનો પ્રયાસ નિષ્ફળ ગયો હતો. પેટ્રોલિંગ કરી રહેલી પોલીસની ઝડપી કામગીરીથી બંને આરોપીઓ પણ ઝડપાઈ ગયા હતા. હવે પોલીસ દ્વારા આરોપીઓની પૂછપરછ કરીને લૂંટના પ્રયાસ અને વાહનચોરી સંબંધિત અન્ય વિગતોની તપાસ કરવામાં આવી રહી છે.

આ પણ વાંચો : Jamnagar Crime News : જામનગર દારૂકાંડમાં મોટી કાર્યવાહી, રાજકોટ રેન્જ ટીમે બે ફરાર આરોપીઓને ઝડપી પાડ્યા