Sabarkantha : ઈડરના લક્ષ્મણગઢના યુવકે લોકઅપમાં આપઘાત કર્યો, પોલીસે ઘટનાને લઈ તપાસ હાથ ધરી

Sabarkantha : સાબરકાંઠા જિલ્લાના ઈડરમાં પોલીસ લોકઅપમાં એક યુવકનું શંકાસ્પદ સંજોગોમાં મોત થતાં ચકચાર મચી ગઈ છે. ઈડર તાલુકાના લક્ષ્મણગઢ ગામના યુવકે પોલીસ લોકઅપમાં ગળેફાંસો ખાઈ આપઘાત કર્યો હોવાની પ્રાથમિક માહિતી સામે આવી છે. ઘટનાની જાણ થતાં પોલીસ તંત્રમાં દોડધામ મચી ગઈ હતી અને ઉચ્ચ પોલીસ અધિકારીઓ સહિતનો કાફલો સિવિલ હોસ્પિટલ પહોંચ્યો હતો.

યુવકને ઈડર પોલીસ સ્ટેશન લઈ જઈ લોકઅપમાં રાખવામાં આવ્યો હતો

મળતી માહિતી અનુસાર, યુવક અને તેની પત્ની વચ્ચે ઘરેલું બાબતને લઈને કંકાસ થયો હતો. આ દરમિયાન પત્નીએ ઈમરજન્સી હેલ્પલાઈન નંબર 112 પર ફોન કરીને મદદ માગી હતી. ત્યારબાદ 112ની ટીમ ઘટનાસ્થળે પહોંચી હતી અને યુવકને ઈડર પોલીસ સ્ટેશન લઈ જઈ લોકઅપમાં રાખવામાં આવ્યો હતો. પ્રાથમિક વિગતો મુજબ, લોકઅપમાં રાખવામાં આવ્યા બાદ યુવકે પોતાના લેંઘાના નાડાનો ઉપયોગ કરીને ગળેફાંસો ખાઈ લીધો હતો. આ ઘટનામાં યુવકનું મોત નીપજ્યું હતું. જોકે, યુવકે કયા સંજોગોમાં આ પગલું ભર્યું અને ઘટનાની ચોક્કસ પરિસ્થિતિ શું હતી તે અંગે હજુ સ્પષ્ટતા થઈ નથી.

પોલીસ તપાસના તારણોની રાહ જોવી જરૂરી

ઘરેલું કંકાસ અને પત્ની દ્વારા પોલીસને જાણ કરવામાં આવતાં યુવકને લોકઅપમાં રાખવામાં આવ્યો હોવાની બાબત સામે આવી છે. જોકે, આ ઘટનાને ઘરેલું વિવાદ સાથે સીધી રીતે જોડતા પહેલાં પોલીસ તપાસના તારણોની રાહ જોવી જરૂરી છે. ઘટનાની જાણ થતાં ઈડરના ડીવાયએસપી સહિતના પોલીસ અધિકારીઓ સિવિલ હોસ્પિટલ ખાતે પહોંચ્યા હતા. યુવકના મૃતદેહને પોસ્ટમોર્ટમ માટે ઈડર સિવિલ હોસ્પિટલ ખસેડવામાં આવ્યો હતો, જેથી મોતનું ચોક્કસ કારણ જાણી શકાય. હાલ ઈડર પોલીસે સમગ્ર મામલે તપાસ હાથ ધરી છે.

લોકઅપમાં યુવકનું મોત કયા સંજોગોમાં થયું, સુરક્ષાની વ્યવસ્થા કેવી હતી અને ઘટનામાં કોઈ બેદરકારી રહી હતી કે નહીં તે સહિતના મુદ્દાઓ તપાસના કેન્દ્રમાં રહેશે. આ ઘટનાને પગલે અનેક સવાલો ઊભા થયા છે. હવે પોસ્ટમોર્ટમ રિપોર્ટ અને પોલીસ તપાસ બાદ જ સમગ્ર ઘટનાની હકીકત સ્પષ્ટ થશે.

આ પણ વાંચો : Dahod : હાંડા હોસ્પિટલમાં રૂપિયા 15.15 લાખની ઘરફોડ ચોરીનો ભેદ ઉકેલાયો, બે આરોપીઓ ઝડપાયા