Rajkot માં ગણપતિ વિસર્જન સમયે કરુણ દુર્ઘટના, એક જ પરિવારના 3નાં મોત

Rajkot : આ દુર્ઘટનાને પગલે સમગ્ર વિસ્તારમાં શોકનો માહોલ છવાઈ ગયો છે. મળતી માહિતી મુજબ, કુવાડવા-વાંકાનેર રોડ પર ખોડિયાર મંદિર નજીક અજય વે બ્રિજની સામે ગણપતિ વિસર્જન દરમિયાન ત્રણ વ્યક્તિ પાણીમાં ડૂબી ગયા હતા. ઘટનાની જાણ થતાં જ સ્થાનિક સ્તરે તાત્કાલિક બચાવ કામગીરી શરૂ કરવામાં આવી હતી. ત્રણેય લોકો પાણીમાં ડૂબી જતા પરિસ્થિતિ ગંભીર બની હતી.

એક જ પરિવારના 3 લોકોના મોત

ઘટનાની જાણ થતાં રેસ્ક્યુ ટીમ ઘટનાસ્થળે પહોંચી હતી અને પાણીમાં સર્ચ ઓપરેશન હાથ ધરવામાં આવ્યું હતું. બચાવ કામગીરીમાં રાજકોટ ફાયર બ્રિગેડના જવાનોની પણ મદદ લેવામાં આવી હતી. ફાયર બ્રિગેડ અને રેસ્ક્યુ ટીમના જવાનોએ કલાકો સુધી ભારે જહેમત ઉઠાવીને પાણીમાં શોધખોળ કરી હતી.

લાંબા સમય સુધી ચાલેલા સર્ચ ઓપરેશન બાદ પાણીમાંથી ત્રણેય વ્યક્તિઓના મૃતદેહ બહાર કાઢવામાં આવ્યા હતા. મૃતકોની ઓળખ નયનભાઈ ચૌહાણ, ધીરુભાઈ ચૌહાણ અને નરેન્દ્રભાઈ ચૌહાણ તરીકે થઈ છે. પ્રાથમિક માહિતી મુજબ ત્રણેય એક જ પરિવારના હોવાનું સામે આવ્યું છે.

પોલીસે અકસ્માતે મોતનો ગુનો નોંધ્યો

ગણપતિ વિસર્જન માટે ગયેલા પરિવાર પર અચાનક આ દુર્ઘટનાથી દુઃખનો પહાડ તૂટી પડ્યો છે. ઘટનાની જાણ થતાં પરિવારજનો અને સંબંધીઓ પણ ઘટનાસ્થળે દોડી આવ્યા હતા. ત્રણેય મૃતદેહોને જરૂરી કાર્યવાહી માટે રાજકોટ સિવિલ હોસ્પિટલ ખાતે પોસ્ટમોર્ટમ અર્થે ખસેડવામાં આવ્યા છે. ગણપતિ વિસર્જન દરમિયાન પાણીમાં ડૂબી જવાની આ ઘટનાએ વિસર્જન દરમિયાન સુરક્ષાના મહત્વને ફરી એકવાર સામે લાવ્યું છે.

ખાસ કરીને ઊંડા પાણી, નદી, તળાવ કે અન્ય જળાશયોમાં વિસર્જન કરતી વખતે સાવચેતી રાખવી અને રેસ્ક્યુ ટીમની હાજરીમાં જ પ્રક્રિયા કરવી જરૂરી બને છે. હાલ સમગ્ર ઘટનાને લઈને પોલીસ અને સંબંધિત તંત્ર દ્વારા જરૂરી કાર્યવાહી હાથ ધરવામાં આવી રહી છે. દુર્ઘટના કયા સંજોગોમાં બની અને ત્રણેય લોકો પાણીમાં કેવી રીતે ડૂબ્યા તે અંગેની વધુ વિગતો તપાસ બાદ સામે આવશે. રાજકોટમાં ગણપતિ વિસર્જન દરમિયાન સર્જાયેલી આ દુર્ઘટનાથી એક પરિવારના ત્રણ સભ્યોના મોત થતાં સમગ્ર વિસ્તારમાં શોકની લાગણી પ્રસરી છે.

આ પણ વાંચો : Gujarat Latest News Live : MS યુનિવર્સિટીમાં પદવીદાન સમારોહ યોજાયો, રાષ્ટ્રપતિના હસ્તે 30 વિદ્યાર્થીને ગોલ્ડ મેડલ અપાયા