નવસારીમાં માર્ગ સલામતી માટે વિશાળ બાઈક રેલી, 480 લોકોએ આપ્યો ટ્રાફિક નિયમ પાલનનો સંદેશ

Navsari Bike Rally Road Safety: માર્ગ સલામતી અને ટ્રાફિક નિયમોના પાલન અંગે લોકોમાં જાગૃતિ ફેલાવવા નવસારીમાં અનોખો પ્રયાસ કરવામાં આવ્યો હતો. સેવા સંકલ્પ અભિયાન અંતર્ગત જિલ્લા વહીવટી તંત્ર અને જિલ્લા પોલીસ દ્વારા ‘રાઈડ વિથ પ્રાઈડ, ફોલો ધ રૂલ્સ’ થીમ સાથે વિશાળ બાઈક રેલીનું આયોજન કરવામાં આવ્યું હતું. સર્કિટ હાઉસથી શરૂ થયેલી આ બાઈક રેલીમાં 240 બાઈક સાથે અંદાજે 480 લોકો જોડાયા હતા. રેલીમાં SOG પોલીસ, સાઇબર ક્રાઈમ પોલીસ, RTO કર્મચારીઓ, GRD જવાનો, સ્થાનિક NGOના પ્રતિનિધિઓ સહિત મોટી સંખ્યામાં શહેરીજનોએ ભાગ લીધો હતો.

રેલી પહેલાં લેવાયા માર્ગ સલામતીના શપથ

બાઈક રેલી શરૂ થાય તે પહેલાં ઉપસ્થિત તમામ લોકોએ ટ્રાફિક નિયમોનું પાલન કરવા અને માર્ગ સલામતી અંગે લોકોમાં જાગૃતિ ફેલાવવાના શપથ લીધા હતા. ત્યારબાદ ગુજરાત સરકારના કેબિનેટ મંત્રી નરેશ પટેલે લીલી ઝંડી આપી બાઈક રેલીને પ્રસ્થાન કરાવ્યું હતું. આ પ્રસંગે જિલ્લા કલેકટર, જિલ્લા વિકાસ અધિકારી, ધારાસભ્ય, જિલ્લા પ્રમુખ, મ્યુનિસિપલ કમિશનર, નવસારીના મેયર અને ડેપ્યુટી મેયર સહિતના આગેવાનો ઉપસ્થિત રહ્યા હતા.

વિવિધ માર્ગો પરથી પસાર થઈ રેલી સર્કિટ હાઉસ પહોંચી

સર્કિટ હાઉસથી શરૂ થયેલી બાઈક રેલી ઇટાળવા, છાપરા રોડ અને ટેકનિકલ સ્કૂલ સહિતના માર્ગો પરથી પસાર થઈ હતી. ત્યારબાદ રેલી ફરી સર્કિટ હાઉસ ખાતે પૂર્ણ કરવામાં આવી હતી. રેલી દરમિયાન લોકોને ટ્રાફિક નિયમોનું પાલન કરવા, માર્ગ સલામતી જાળવવા અને જવાબદારીપૂર્વક વાહન ચલાવવા અંગે જાગૃત કરવામાં આવ્યા હતા.

‘ટ્રાફિક નિયમોનું પાલન કરો અને સુરક્ષિત રહો’નો સંદેશ

આ બાઈક રેલીનો મુખ્ય ઉદ્દેશ ‘ટ્રાફિક નિયમોનું પાલન કરો અને સુરક્ષિત રહો’નો સંદેશ લોકો સુધી પહોંચાડવાનો હતો. મોટી સંખ્યામાં બાઈક સવારો અને વિવિધ સરકારી વિભાગોના કર્મચારીઓની ભાગીદારીએ માર્ગ સલામતી અંગે જનજાગૃતિનો સંદેશ શહેરમાં પહોંચાડ્યો હતો.