Mehsana News: મહેસાણામાં 108 ઈમરજન્સી સેવામાં અવરોધનો પ્રયાસ, બે પૂર્વ કર્મચારીઓ સામે ફરિયાદ

Mehsana News: મહેસાણામાં 108 ઈમરજન્સી સેવાની કામગીરીમાં વિક્ષેપ ઊભો કરવાનો પ્રયાસ કરવા બદલ બે પૂર્વ કર્મચારીઓ સામે ફરિયાદ નોંધાવવામાં આવી છે. ટર્મિનેટ કરાયેલા કર્મચારીઓ ખોડાજી ચૌહાણ અને હરેશ વાણિયા સામે 108 ઈમરજન્સી સેવાને બદનામ કરવા, અન્ય કર્મચારીઓને ઉશ્કેરવા અને ધમકી આપવાના આક્ષેપો કરવામાં આવ્યા છે. આ મામલે 108 સેવાના મેનેજર દ્વારા ફરિયાદ નોંધાવવામાં આવતાં તપાસ શરૂ કરવામાં આવી છે.

મળતી માહિતી મુજબ, ખોડાજી ચૌહાણ પાયલોટ તરીકે અને હરેશ વાણિયા સુપરવાઈઝર તરીકે ફરજ બજાવતા હતા. શિસ્ત જાળવવામાં નિષ્ફળ રહેવાના કારણે બંનેને અગાઉ નોકરીમાંથી ટર્મિનેટ કરવામાં આવ્યા હતા. ત્યારબાદ બંનેએ 108 ઈમરજન્સી સેવાની કામગીરીમાં અવરોધ ઊભો કરવાનો પ્રયાસ કર્યો હોવાનો આક્ષેપ છે.

સોશિયલ મીડિયા મારફતે ઉશ્કેરણીનો આક્ષેપ

ફરિયાદ અનુસાર, બંને પૂર્વ કર્મચારીઓએ સોશિયલ મીડિયા પર 108 ઇમરજન્સી સેવાને બદનામ કરવાનો પ્રયાસ કર્યો હતો. આ ઉપરાંત, સેવામાં ફરજ બજાવતા અન્ય કર્મચારીઓને ઉશ્કેરીને હડતાળ પર ઉતરવા માટે દબાણ કરવામાં આવ્યું હોવાનો પણ આક્ષેપ કરવામાં આવ્યો છે. વધુમાં, બંને પૂર્વ કર્મચારીઓ 108ની ઓફિસે પહોંચ્યા હતા અને ત્યાં હાજર અન્ય કર્મચારીઓને ધમકી આપી હોવાની ફરિયાદમાં વિગતો સામે આવી છે. કર્મચારીઓને હડતાળ પર નહીં ઉતરે તો જાનથી મારી નાખવાની ધમકી આપવામાં આવી હોવાનો પણ આક્ષેપ છે.

મેનેજરની ફરિયાદ બાદ તપાસ શરૂ

108 ઈમરજન્સી સેવાના મેનેજર દ્વારા બંને સામે સેવાની કામગીરીમાં વિક્ષેપ ઊભો કરવા મામલે ફરિયાદ નોંધાવવામાં આવી છે. આ મામલે સંબંધિત તંત્ર દ્વારા આગળની તપાસ અને કાયદેસરની કાર્યવાહી હાથ ધરવામાં આવી રહી છે. 108 ઈમરજન્સી સેવા અકસ્માતો, ગંભીર બીમારીઓ અને અન્ય તાત્કાલિક પરિસ્થિતિઓમાં નાગરિકોને મદદ પૂરી પાડે છે. આવી સેવાની કામગીરીમાં અવરોધ ઊભો થવાથી દર્દીઓને સમયસર મદદ પહોંચાડવામાં મુશ્કેલી સર્જાઈ શકે છે. હાલ સમગ્ર મામલે તપાસ ચાલી રહી છે અને ફરિયાદમાં કરવામાં આવેલા આક્ષેપોની ખરાઈ તપાસ બાદ થશે.

આ પણ વાંચો: Vadodara News: એક જ પરિવારના ત્રણ સભ્યોના મોત, માતા-પુત્ર-પુત્રીએ ફાંસો ખાઈ જીવન ટૂંકાવ્યાની આશંકા