Bhujમાં મુસ્લિમ પરિવાર બનાવે છે અવનવી ડિઝાઇનના ગરબા, કોમી એકતાનો સંદેશ

Bhuj: નવરાત્રીના પવિત્ર પર્વને હવે ગણતરીના દિવસો બાકી રહ્યા છે ત્યારે ભુજમાં ગરબાની તૈયારીઓ પણ તેજ બની છે. ખાસ વાત એ છે કે, ભુજમાં મુસ્લિમ પરિવાર પરંપરાગત કુંભારકામ સાથે જોડાઈ ગરબા બનાવવાના વ્યવસાયમાં રોજગારી મેળવી રહ્યો છે. હિન્દુ સમાજના આ પવિત્ર તહેવાર માટે મુસ્લિમ કારીગરો દ્વારા તૈયાર કરવામાં આવતા અવનવા ડિઝાઇનના ગરબા કોમી એકતાનું ઉદાહરણ પણ પૂરું પાડી રહ્યા છે.

ત્રણ મહિના અગાઉથી ગરબા બનાવવાની તૈયારી શરૂ

કચ્છમાં અનેક મુસ્લિમ પરિવારો પરંપરાગત કુંભાર કારીગરી સાથે સંકળાયેલા છે. નવરાત્રી દરમિયાન ગરબાની માંગ વધતી હોવાથી કારીગરો ત્રણ મહિના અગાઉથી જ ગરબા બનાવવાની તૈયારીઓ શરૂ કરી દે છે. ભુજના મુસ્લિમ કુંભાર કારીગરો દ્વારા અલગ-અલગ ડિઝાઇન અને આકર્ષક રંગકામ સાથે ગરબા તૈયાર કરવામાં આવી રહ્યા છે.

મડવર્ક અને કાચના ટીકાથી ગરબાની સજાવટ

સમયની સાથે ગરબાની ડિઝાઇનમાં પણ અનેક ફેરફાર આવ્યા છે. કારીગરો દ્વારા માટીના ગરબા પર મડવર્ક, અવનવી ડિઝાઇન તેમજ કાચના ટીકા લગાવીને આકર્ષક રીતે શણગાર કરવામાં આવે છે. ગ્રાહકોની પસંદગી અને માંગને ધ્યાનમાં રાખીને અલગ-અલગ પ્રકારના ગરબા તૈયાર કરવામાં આવી રહ્યા છે.

પ્રાકૃતિક રંગોનો ઉપયોગ

ગરબા તૈયાર કરતી વખતે પર્યાવરણને નુકસાન ન થાય તેનું પણ ધ્યાન રાખવામાં આવે છે. કારીગરો ગરબા પર પ્રાકૃતિક રંગોનો ઉપયોગ કરતા હોવાનું જણાવે છે. પરંપરાગત માટીકલાને આધુનિક ડિઝાઇન સાથે જોડીને ગરબાને વધુ આકર્ષક બનાવવાનો પ્રયાસ કરવામાં આવી રહ્યો છે.

રોજગારી સાથે પરંપરાગત માટીકલા જીવંત

નવરાત્રીનો તહેવાર આ પરિવારો માટે રોજગારીનું સાધન પણ બની રહ્યો છે. ગરબા બનાવીને તેઓ આવક મેળવવાની સાથે પેઢીઓથી ચાલી આવતી પરંપરાગત માટીકલાને પણ જીવંત રાખી રહ્યા છે. ભુજના આ મુસ્લિમ કારીગરો નવરાત્રી માટે ગરબા બનાવી હિન્દુ-મુસ્લિમ એકતા અને પરસ્પર સહભાગિતાનો સંદેશ આપી રહ્યા છે.

તહેવારથી આગળ, એકતાનો સંદેશ

આજના સમયમાં ધર્મ અને જાતિના ભેદ વચ્ચે પણ ભુજના મુસ્લિમ કારીગરો નવરાત્રી માટે ગરબા બનાવી રહ્યા છે. કારીગરોનું આ કામ માત્ર રોજગારી પૂરતું સીમિત નથી, પરંતુ વિવિધ સમાજો વચ્ચેના સહકાર અને સાંસ્કૃતિક જોડાણનું ઉદાહરણ પણ બની રહ્યું છે.

આ પણ વાંચો : Commercial Pilot Training માટે ગુજરાત બન્યું નેશનલ હબ, વધુ 5 FTO શરૂ થતાં સંખ્યા 10 થશે