ભુજમાં સસ્તું સોનું આપવાના નામે છેતરપિંડી કરતી ગેંગ ઝડપાઈ, 1.62 કરોડથી વધુનો મુદ્દામાલ જપ્ત

Bhuj Gold Fraud Gang: બજારભાવ કરતાં ઓછા ભાવે સોનાના બિસ્કિટ આપવાની લાલચ આપી લોકો સાથે છેતરપિંડી કરવાનો પ્રયાસ કરતી ગેંગનો પશ્ચિમ કચ્છ LCBએ પર્દાફાશ કર્યો છે. પોલીસે પાંચ આરોપીઓને ઝડપી પાડ્યા છે. આરોપીઓ સોશિયલ મીડિયા મારફતે લોકોને સસ્તું સોનું આપવાની લાલચ આપતા હોવાનું પોલીસ તપાસમાં સામે આવ્યું છે.

પોલીસના જણાવ્યા મુજબ, આરોપીઓએ Instagram પર “madhav571” નામની ફેક ID બનાવી હતી. આ ID પરથી સોનાના બિસ્કિટના ફોટા અને વીડિયો પોસ્ટ કરીને બજારભાવ કરતાં ખૂબ જ ઓછા ભાવે સોનું આપવાની જાહેરાતો કરવામાં આવતી હતી. સોશિયલ મીડિયા પર આવી લોભામણી જાહેરાતો કરીને સંભવિત ગ્રાહકોને પોતાના સંપર્કમાં લેવાનો પ્રયાસ કરવામાં આવતો હતો.

અસલી અને નકલી સોનાના બિસ્કિટ મળ્યા

પશ્ચિમ કચ્છ LCBની કાર્યવાહીમાં આરોપીઓ પાસેથી કુલ 1 કિલો વજનના 10 અસલી સોનાના બિસ્કિટ મળી આવ્યા હતા. આ ઉપરાંત 15 નકલી સોનાના બિસ્કિટ પણ પોલીસે કબજે કર્યા છે. આમ, સોનાના નામે લોકોને છેતરવા માટે અસલી તેમજ નકલી બિસ્કિટનો ઉપયોગ કરવામાં આવતો હોવાની વિગતો સામે આવી છે.

₹1.62 કરોડથી વધુનો મુદ્દામાલ જપ્ત

પોલીસે પાંચ આરોપીઓ પાસેથી કુલ ₹1.62 કરોડથી વધુનો મુદ્દામાલ જપ્ત કર્યો છે. જેમાં સોનાના બિસ્કિટ ઉપરાંત એક ક્રેટા કાર, ત્રણ ટુ-વ્હીલર અને 9 મોબાઈલ ફોનનો સમાવેશ થાય છે.

પાંચ આરોપીઓ પોલીસના સકંજામાં

આ કાર્યવાહી દરમિયાન પોલીસે સુલતાન કુંભાર, બસીર કાતીયર, સાજીદ કુંભાર, અસગર કાતીયર અને ફહીમ સોઢાને ઝડપી પાડ્યા છે. આરોપીઓ સોશિયલ મીડિયા મારફતે કેવી રીતે લોકોને નિશાન બનાવતા હતા અને આ પ્રકરણમાં અન્ય કોઈ વ્યક્તિ સંડોવાયેલી છે કે કેમ તે અંગે પોલીસ દ્વારા વધુ તપાસ હાથ ધરવામાં આવી છે. પશ્ચિમ કચ્છ LCBની આ કાર્યવાહીને પગલે સસ્તા ભાવે સોનું આપવાની લાલચ આપતી સોશિયલ મીડિયા જાહેરાતોથી સાવચેત રહેવા માટે પણ લોકોને ચેતવણી મળી છે.