Junagadh News: જૂનાગઢના અંબાપુશી ડેમના પાણીનો વેડફાટ રોકવા ખેડૂતોની કલેક્ટર અને DDO સમક્ષ રજૂઆત

Junagadh News: જૂનાગઢના અંબાપુશી ડેમમાંથી પાણી છોડવામાં આવતું હોવાના મુદ્દે સ્થાનિક ખેડૂતોમાં નારાજગી જોવા મળી રહી છે. ડેમના પાણીનો બિનજરૂરી વેડફાટ બંધ કરી પાણીનો યોગ્ય ઉપયોગ કરવામાં આવે તેવી માગ સાથે ખેડૂતોએ કલેક્ટર અને જિલ્લા વિકાસ અધિકારી (DDO) સમક્ષ રજૂઆત કરી છે. ખેડૂતો દ્વારા DDOને આ અંગે ફરી લેખિત આવેદનપત્ર આપવામાં આવ્યું છે.

પીવાના પાણીની તંગી સર્જાવાની ભીતિ

ખેડૂતોના જણાવ્યા અનુસાર, આ વર્ષે વરસાદ નહીવત થયો હોવાથી આગામી સમયમાં સિંચાઈ તેમજ પીવાના પાણીની તંગી સર્જાવાની ભીતિ છે. આવી પરિસ્થિતિમાં અંબાપુશી ડેમમાંથી પાણી છોડવામાં આવે તો ઉપલબ્ધ જળસંગ્રહમાં ઘટાડો થઈ શકે છે અને ભવિષ્યમાં ખેડૂતો તથા સ્થાનિક લોકોને મુશ્કેલીનો સામનો કરવો પડી શકે છે. ખેડૂતોએ રજૂઆતમાં જણાવ્યું છે કે ડેમના પાણીનો ઉપયોગ વેડફાટરૂપે ન થાય અને સિંચાઈ માટે પાણીનો બિનજરૂરી નિકાલ અટકાવવામાં આવે. જો આ રીતે પાણી છોડવાનું ચાલુ રહેશે તો આગામી દિવસોમાં પાણીની અછત ઊભી થવાની શક્યતા છે.

ખેડૂતોમાં અસંતોષ ફેલાયો

ખેડૂતોએ જંગલ વિભાગના ઉદાહરણ સાથે પણ સવાલ ઉઠાવ્યો છે. તેમના જણાવ્યા મુજબ, જંગલ વિભાગ દ્વારા અન્ય જળાશયોમાં વન્યજીવો માટે પાણી અનામત રાખવામાં આવે છે, તો અંબાપુશી ડેમમાં પણ વન્યજીવો માટે પાણી અનામત રાખવાની વ્યવસ્થા કેમ કરવામાં આવતી નથી? ખેડૂતોનું કહેવું છે કે આ મુદ્દે અગાઉ પણ સંબંધિત તંત્રને લેખિત રજૂઆત કરવામાં આવી હતી. તેમ છતાં ડેમમાંથી પાણી છોડવામાં આવતાં ખેડૂતોમાં અસંતોષ ફેલાયો છે.

આથી ગંભીર બાબતને ધ્યાનમાં લઈને DDO સમક્ષ ફરીથી આવેદનપત્ર આપવામાં આવ્યું છે. આ ઉપરાંત ખેડૂતો દ્વારા સ્થાનિક રાજકીય કિન્નાખોરી બંધ કરવાની પણ માગ કરવામાં આવી છે. ખેડૂતોનું કહેવું છે કે પાણી જેવા મહત્વના મુદ્દે રાજકીય બાબતોને બદલે લોકો અને ખેડૂતોના હિતને પ્રાથમિકતા આપવી જોઈએ. હવે તંત્ર આ રજૂઆતને ધ્યાનમાં લઈને શું નિર્ણય લે છે તેના પર સૌની નજર છે.

આ પણ વાંચો: Surat News: શહેરની સિવિલ હોસ્પિટલમાં દર્દીઓની ભારે ભીડ, આરોગ્ય વિભાગના એક્શન પ્લાન પર સવાલ