Jamnagarમાં ઉનાળામાં પાણીની તંગી ન સર્જાય તે માટે તંત્રનું આગોતરું આયોજન, જૂન સુધીના જથ્થા પર ચર્ચા

Jamnagar Drinking Water Planning: જામનગર શહેર અને જિલ્લામાં આગામી ઉનાળા દરમિયાન પીવાના પાણીની તકલીફ ન પડે તે માટે તંત્ર દ્વારા આગોતરું આયોજન શરૂ કરવામાં આવ્યું છે. આ મુદ્દે જામનગરમાં મહત્વની વિસ્તૃત બેઠક યોજાઈ હતી, જેમાં પાણીની ઉપલબ્ધતા, પુરવઠાનું આયોજન અને આગામી મહિનાઓમાં પાણીની જરૂરિયાત અંગે ચર્ચા કરવામાં આવી હતી. બેઠકમાં રાજ્યકક્ષાના મંત્રી રિવાબા જાડેજા, ધારાસભ્ય દિવ્યેશભાઈ અકબરી, મેયર મોનિકાબેન વ્યાસ, મહાનગરપાલિકા કમિશનર દીપેશ કેડિયા સહિત સિંચાઈ વિભાગ અને સૌની યોજનાના અધિકારીઓ ઉપસ્થિત રહ્યા હતા.

જૂન મહિના સુધી પાણીની વ્યવસ્થા માટે આયોજન

બેઠકમાં રજૂ કરાયેલી માહિતી મુજબ, હાલ નવેમ્બર-ડિસેમ્બર સુધીનો પાણીનો જથ્થો ઉપલબ્ધ છે. આગામી જૂન મહિના સુધી શહેર અને જિલ્લામાં પીવાના પાણીની જરૂરિયાત સંતોષી શકાય તે માટે અત્યારથી જ આયોજન કરવા પર ભાર મૂકવામાં આવ્યો હતો. સૌની યોજના અને સિંચાઈ વિભાગના અધિકારીઓ સાથે પાણીની ઉપલબ્ધતા તથા પુરવઠાની વ્યવસ્થા અંગે વિસ્તૃત ચર્ચા કરવામાં આવી હતી. ઉનાળામાં નાગરિકોને પાણીની સમસ્યાનો સામનો ન કરવો પડે તે માટે સરકાર અને સ્થાનિક તંત્ર વચ્ચે સંકલન જાળવીને કામગીરી કરવા અંગે પણ ભાર મૂકાયો હતો.

ખેતી અને સિંચાઈના પ્રશ્નો અંગે પણ આયોજન

પીવાના પાણીની વ્યવસ્થા ઉપરાંત આગામી દિવસોમાં ખેતી અને સિંચાઈ સંબંધિત પ્રશ્નોને ધ્યાનમાં રાખીને પણ આયોજન કરવાની ચર્ચા કરવામાં આવી હતી. પાણીના ઉપલબ્ધ જથ્થાનું યોગ્ય આયોજન અને જરૂરિયાત મુજબ વ્યવસ્થા જળવાઈ રહે તે દિશામાં તંત્ર દ્વારા કામગીરી હાથ ધરવામાં આવી રહી છે. આગોતરા આયોજનના ભાગરૂપે યોજાયેલી આ બેઠકમાં આગામી ઉનાળા દરમિયાન જામનગર શહેર અને જિલ્લામાં પાણી પુરવઠો સુચારુ રાખવા માટે વિવિધ વિભાગો વચ્ચે સંકલન પર ભાર મૂકવામાં આવ્યો હતો.