Gir Somnath : સાસણમાં વન રક્ષક અને વનપાલ કર્મચારીઓનું આંદોલન યથાવત, માંગણીઓ નહીં સંતોષાય તો અનિશ્ચિત હડતાળની ચીમકી

Gir Somnath : જુનાગઢ અને ગીર સોમનાથ જિલ્લાના વન રક્ષકો તથા વનપાલ કર્મચારીઓએ સાસણ ખાતે બેઠક યોજીને સરકાર દ્વારા તેમની માંગણીઓ સંતોષવામાં ન આવી હોવા અંગે ચર્ચા કરી હતી. બેઠકમાં આગામી સમયમાં આંદોલનને વધુ ઉગ્ર બનાવવાના વિકલ્પો અંગે પણ ચર્ચા થઈ હોવાનું જાણવા મળ્યું છે.

બંને જિલ્લાના વન રક્ષકો અને વનપાલ કર્મચારીઓ એકત્ર થયા હતા. બેઠક દરમિયાન કર્મચારીઓની પડતર માંગણીઓ અને સરકાર તરફથી તેના ઉકેલ માટે લેવામાં આવેલા પગલાં અંગે ચર્ચા કરવામાં આવી હતી. માંગણીઓ સંતોષવામાં નહીં આવે તો તબક્કાવાર વિરોધ કાર્યક્રમો યોજવાની ચીમકી આપવામાં આવી છે.

માગણીઓ નહીં સંતોષાય તો તબક્કાવાર વિરોધ થશે

કર્મચારીઓ દ્વારા જણાવવામાં આવ્યું છે કે, આગામી સમયમાં તેમની માંગણીઓનો ઉકેલ નહીં આવે તો સૌપ્રથમ પેન ડાઉન કાર્યક્રમ યોજવામાં આવશે. ત્યારબાદ તમામ સરકારી વોટ્સએપ ગ્રુપમાંથી બહાર નીકળીને રેસ્ક્યૂ કામગીરી સિવાયની અન્ય કામગીરી બંધ કરવાની દિશામાં પગલાં લેવામાં આવશે.

આ ઉપરાંત, વિરોધને વધુ વ્યાપક બનાવવા માટે માસ C.L.એટલે કે સામૂહિક રજા પર ઉતરવાનો કાર્યક્રમ યોજવાની પણ તૈયારી દર્શાવવામાં આવી છે. જો તેમ છતાં માંગણીઓનો ઉકેલ નહીં આવે તો અનિશ્ચિત કાળની હડતાળ કરીને વિરોધ પ્રદર્શન કરવામાં આવશે તેવી ચીમકી આપવામાં આવી છે.

માગણીઓ નહીં સંતોષાય તો પેન ડાઉન આંદોલન થશે

વન રક્ષક અને વનપાલ કર્મચારીઓની આ ચેતવણી બાદ હવે સરકાર અને સંબંધિત વિભાગ તરફથી શું પ્રતિસાદ મળે છે તેના પર નજર રહેશે. કર્મચારીઓ દ્વારા તબક્કાવાર આંદોલનની જે રૂપરેખા રજૂ કરવામાં આવી છે, તે અમલમાં આવે તો વન વિભાગની કેટલીક નિયમિત કામગીરી પર અસર પડી શકે છે.

જોકે, રેસ્ક્યૂ કામગીરી ચાલુ રાખવાની વાત કર્મચારીઓના જણાવેલા આયોજનમાં સામેલ છે. સાસણ ખાતે યોજાયેલી આ બેઠકમાં જુનાગઢ અને ગીર સોમનાથ જિલ્લાના કર્મચારીઓની એકતા અને માંગણીઓના ઉકેલ માટે આગળની રણનીતિ પર ભાર મૂકાયો હતો. હવે આગામી દિવસોમાં સરકાર સાથે કોઈ ચર્ચા થાય છે કે નહીં અને કર્મચારીઓના પ્રશ્નોનું નિરાકરણ આવે છે કે નહીં તે મહત્ત્વનું રહેશે.

આ પણ વાંચો : Ambaji Mohanthal Prasad GI Tag : બનાસકાંઠાના અંબાજી મંદિરના મોહનથાળ પ્રસાદને મળ્યો ઐતિહાસિક GI ટેગ, રાષ્ટ્રીય સ્તરે મળી વિશિષ્ટ ઓળખ