Gujaratના તમામ અભયારણ્ય અને નેશનલ પાર્ક 9 ઓક્ટોબરથી પ્રવાસીઓ માટે ખુલશે, વનવિહારની મજા ફરી માણી શકાશે

Gujarat National Parks Open 2026: ગુજરાતમાં વરસાદી સિઝન દરમિયાન બંધ રાખવામાં આવેલા અભયારણ્ય અને નેશનલ પાર્ક હવે ફરી પ્રવાસીઓ માટે ખુલવા જઈ રહ્યા છે. 9 ઓક્ટોબરથી રાજ્યના તમામ અભયારણ્ય અને નેશનલ પાર્કમાં પ્રવાસીઓને પ્રવેશ આપવામાં આવશે. ચોમાસાની સિઝન પૂર્ણ થયા બાદ રોડ-રસ્તાઓ પણ અનુકૂળ બનતા વનવિહારનો માર્ગ મોકળો થયો છે. ચોમાસા દરમિયાન ભારે વરસાદ અને વન્યજીવોની સુરક્ષાને ધ્યાનમાં રાખીને જંગલ વિસ્તારોમાં પ્રવાસીઓના પ્રવેશ પર નિયંત્રણ રાખવામાં આવે છે. હવે વરસાદી માહોલ પૂર્ણ થતાં વન વિભાગ દ્વારા પ્રવાસીઓ માટે ફરી પ્રવેશ શરૂ કરવાની તૈયારી કરવામાં આવી છે.

વન્યજીવોની સુરક્ષા માટે માર્ગદર્શિકાનું પાલન જરૂરી

અભયારણ્ય અને નેશનલ પાર્કમાં પ્રવાસીઓના પ્રવેશ બાદ વન્યજીવોને કોઈ પ્રકારની ખલેલ ન પહોંચે તે માટે વન વિભાગની માર્ગદર્શિકાનું પાલન કરવું પડશે. પ્રવાસ દરમિયાન જંગલના નિયમોનું પાલન, વન્યજીવોથી યોગ્ય અંતર જાળવવું અને પ્રકૃતિને નુકસાન ન થાય તેનું ખાસ ધ્યાન રાખવું પડશે.

સ્થાનિક રોજગારીને પણ મળશે વેગ

રાજ્યના વિવિધ વન વિસ્તારો પ્રવાસીઓ માટે ખુલતા સ્થાનિક પ્રવાસન વ્યવસાયને પણ વેગ મળવાની આશા છે. પ્રવાસીઓની અવરજવર વધતા સ્થાનિક ગાઈડ, વાહનચાલકો, હોટેલ-રિસોર્ટ, હોમસ્ટે સહિતના વ્યવસાય સાથે સંકળાયેલા લોકોને રોજગારીની તકો મળી શકે છે.

દેશના અનેક ટાઈગર રિઝર્વ અગાઉથી ખુલ્યા

ગુજરાતની સાથે દેશના અન્ય કેટલાક જાણીતા અભયારણ્ય અને નેશનલ પાર્ક 1 ઓક્ટોબરથી જ પ્રવાસીઓ માટે ખુલ્લા મુકવામાં આવ્યા છે. તેમાં રણથંભોર, સતપુરા, બાંદીપુર, નાગરહોલ, સરિસ્કા, પેન્ચ અને તાડોબા-અંધારી જેવા જાણીતા ટાઈગર રિઝર્વનો સમાવેશ થાય છે. હવે ગુજરાતમાં પણ 9 ઓક્ટોબરથી વનવિહાર શરૂ થતાં વન્યજીવપ્રેમીઓ અને પ્રવાસીઓને રાજ્યના જંગલોમાં પ્રકૃતિ તથા વન્યજીવનનો નજારો માણવાની તક મળશે.