Bharuch Jail Development Project: ભરૂચ જિલ્લા જેલ ખાતે ગુજરાત રાજ્ય પોલીસ આવાસ નિગમ દ્વારા રૂ.16 કરોડના ખર્ચે તૈયાર કરવામાં આવેલા વિવિધ નવનિર્મિત પ્રકલ્પો અને કમ્પાઉન્ડ વોલનું રાજ્યકક્ષાના મંત્રી કમલેશ પટેલના હસ્તે લોકાર્પણ કરવામાં આવ્યું હતું. આ પ્રસંગે રાજ્યકક્ષાના મંત્રી ઈશ્વરસિંહ પટેલ પણ વિશેષ ઉપસ્થિત રહ્યા હતા.

ભરૂચ જેલમાં આધુનિક સુવિધાઓનો ઉમેરો

લોકાર્પણ કાર્યક્રમ દરમિયાન દીપ પ્રાગટ્ય અને તકતી અનાવરણ કરવામાં આવ્યું હતું. ત્યારબાદ મંત્રી કમલેશ પટેલે જેલ પરિસરમાં તૈયાર કરવામાં આવેલી વિવિધ સુવિધાઓનું નિરીક્ષણ કર્યું હતું. નવનિર્મિત પ્રકલ્પોમાં ફિમેલ બેરેક, હાર્ડકોર સેલ, બાળકો માટે આંગણવાડી, કેન્ટીન, લાયબ્રેરી, ઇન્ડોર ગેમ્સ રૂમ, જનસેવા કેન્દ્ર અને એડમિનિસ્ટ્રેશન ઓફિસનો સમાવેશ થાય છે.

8 એકર વિસ્તારમાં નવી કમ્પાઉન્ડ વોલ

ભરૂચ જિલ્લા જેલની આશરે 8 એકર જમીન ફરતે મજબૂત નવી કમ્પાઉન્ડ વોલ તૈયાર કરવામાં આવી છે. સુરક્ષા વ્યવસ્થાને વધુ મજબૂત બનાવવા ફ્લેગ પોસ્ટ, સંત્રી બોક્સ અને ગાર્ડ રૂમનું પણ નિર્માણ કરવામાં આવ્યું છે. આ ઉપરાંત કિચન અને ડાઇનિંગની સુવિધા સાથેની અદ્યતન SRP બેરેક પણ કાર્યરત કરવામાં આવી છે.

કેદીઓ અને જેલ પરિવાર માટે સુવિધાઓ વધારવાનો પ્રયાસ

મંત્રી કમલેશ પટેલે જણાવ્યું હતું કે, જેલોના આધુનિકીકરણ અને સુધારાત્મક અભિગમ માટે રાજ્ય સરકાર પ્રતિબદ્ધ છે. કેદીઓ તેમજ જેલ પરિવાર માટે જરૂરી સુવિધાઓ ઉપલબ્ધ કરાવવા સરકાર સતત પ્રયાસ કરી રહી છે. રૂ.16 કરોડના આ વિવિધ પ્રકલ્પોથી ભરૂચ જેલની સુરક્ષા વ્યવસ્થા, માળખાકીય સુવિધાઓ અને વહીવટી કાર્યક્ષમતા વધુ મજબૂત બનશે.

કાર્યક્રમમાં અધિકારીઓ અને જનપ્રતિનિધિઓ ઉપસ્થિત

આ પ્રસંગે જિલ્લા પંચાયત પ્રમુખ ડિમ્પલબેન રાજ, ધારાસભ્ય રમેશ મિસ્ત્રી, અરૂણસિંહ રણા, વડોદરા ઝોન જેલના ડીઆઈજી સરોજ કુમારી, વડોદરા મધ્યસ્થ જેલ અધિક્ષક ઉષાબેન રાડા અને ભરૂચ જેલના ઇન્ચાર્જ અધિક્ષક એન.સી. રાઠોડ સહિતના અધિકારીઓ અને જનપ્રતિનિધિઓ ઉપસ્થિત રહ્યા હતા.