ગણેશ વિસર્જન યાત્રા પહેલાં આમોદ પોલીસનો ચુસ્ત બંદોબસ્ત: 321 જવાનો, 18 ધાબા પોઈન્ટ અને 5 બોડીકેમેરાથી નજર

Amod Ganesh Visarjan Police Bandobast: ગણેશ વિસર્જન શોભાયાત્રાને પગલે આમોદ નગરમાં પોલીસ દ્વારા ચુસ્ત બંદોબસ્ત ગોઠવવામાં આવ્યો હતો. કાયદો અને વ્યવસ્થા જળવાઈ રહે તેમજ શોભાયાત્રા શાંતિપૂર્ણ માહોલમાં સંપન્ન થાય તે માટે પોલીસ દ્વારા સમગ્ર રૂટ પર સુરક્ષા વ્યવસ્થા વધારવામાં આવી હતી. વિસર્જન યાત્રા દરમિયાન કોઈ અનિચ્છનીય બનાવ ન બને તે માટે કુલ 321 પોલીસ જવાનોને બંદોબસ્તમાં તૈનાત કરવામાં આવ્યા હતા. જેમાં 1 ડી.વાય.એસ.પી., 2 પોલીસ ઈન્સ્પેક્ટર અને 6 પી.એસ.આઈ. સહિતનો પોલીસ સ્ટાફ સામેલ હતો. સંવેદનશીલ વિસ્તારોમાં ખાસ તકેદારી રાખી રૂટ પર સતત પેટ્રોલિંગ કરવામાં આવ્યું હતું.

CCTVથી શોભાયાત્રાના રૂટ પર સતત નજર

આમોદ નગરમાં વિવિધ સ્થળોએ લગાવવામાં આવેલા CCTV કેમેરા મારફતે કંટ્રોલ રૂમમાંથી શોભાયાત્રાના સમગ્ર રૂટ પર નજર રાખવામાં આવી હતી. ભીડની સ્થિતિ, વાહનવ્યવહાર તેમજ કોઈપણ અનિચ્છનીય હિલચાલ પર પોલીસ દ્વારા સતત મોનિટરિંગ કરવામાં આવ્યું હતું.

18 ધાબા પોઈન્ટ અને 5 બોડીવોર્ન કેમેરા

શોભાયાત્રા દરમિયાન સુરક્ષા વ્યવસ્થાને વધુ મજબૂત બનાવવા માટે કુલ 18 ધાબા પોઈન્ટ નક્કી કરવામાં આવ્યા હતા. આ ઉપરાંત પોલીસ કર્મચારીઓ દ્વારા 5 બોડીવોર્ન કેમેરાનો ઉપયોગ કરવામાં આવ્યો હતો. આ વ્યવસ્થાના માધ્યમથી શોભાયાત્રાના રૂટ અને આસપાસના વિસ્તારોમાં પોલીસની સતત નજર રહી હતી. આમોદ પોલીસ ઈન્સ્પેક્ટર રાજેન્દ્ર કરમટીયા દ્વારા બંદોબસ્તમાં તૈનાત પોલીસ જવાનોને જરૂરી સૂચનાઓ આપવામાં આવી હતી. પોલીસ તંત્ર દ્વારા શોભાયાત્રા શાંતિપૂર્ણ રીતે પૂર્ણ થાય અને કાયદો-વ્યવસ્થા જળવાઈ રહે તે માટે જરૂરી તમામ તૈયારીઓ પૂર્ણ કરવામાં આવી હતી.