Ambajiમાં તરુણ ચૂઘના પંજાબ સરકાર પર ગંભીર આક્ષેપ, કહ્યું- ‘AAPએ પંજાબને લૂંટનું ATM બનાવ્યું’

Tarun Chugh Punjab Government Allegations: ભાજપના રાષ્ટ્રીય મહાસચિવ, સાંસદ અને ગુજરાત પ્રભારી તરુણ ચૂઘ અંબાજી પહોંચ્યા હતા. તેમણે અંબાજી મંદિરમાં માતાજીના દર્શન કર્યા હતા. આ દરમિયાન તેમણે પંજાબની આમ આદમી પાર્ટીની સરકાર પર ગંભીર આક્ષેપો કર્યા હતા.

‘AAPએ પંજાબને લૂંટનું ATM બનાવ્યું’

તરુણ ચૂઘે આક્ષેપ કરતા કહ્યું કે, આમ આદમી પાર્ટીએ પંજાબને લૂંટનું ATM બનાવી દીધું છે. તેમણે આરોપ લગાવ્યો કે પંજાબના સાધનોનો ઉપયોગ કરીને ક્યારેક ગોવા તો ક્યારેક ગુજરાતની ચૂંટણી માટે પૈસા મોકલવામાં આવ્યા છે. તેમણે કહ્યું કે પંજાબના સાધનોને લૂંટીને અન્ય રાજ્યોની ચૂંટણીમાં તેનો ઉપયોગ કરવો આમ આદમી પાર્ટીની આદત બની ગઈ છે.

મુખ્યમંત્રી કાર્યાલય સામે પણ ગંભીર આરોપ

તરુણ ચૂઘે એક ફરિયાદનો ઉલ્લેખ કરતા જણાવ્યું કે ફરિયાદીએ ખુદ પુરાવા સાથે ફરિયાદ કરી છે. તેમના જણાવ્યા મુજબ, આ ફરિયાદમાં મુખ્યમંત્રી કાર્યાલય અને પરિવાર સાથે જોડાયેલા લોકો દ્વારા બળાત્કારના આરોપીને બચાવવા માટે લાંચ આપવાના ગંભીર આક્ષેપો કરવામાં આવ્યા છે. તેમણે આક્ષેપ કર્યો કે બળાત્કારના આરોપીને બચાવવા માટે સમગ્ર મુખ્યમંત્રી કાર્યાલય કામે લાગી ગયું હોવાના આરોપો ફરિયાદમાં કરવામાં આવ્યા છે.

‘દોષી કોઈ પણ હોય, તેની સામે કાર્યવાહી થવી જોઈએ’

તરુણ ચૂઘે વધુમાં જણાવ્યું કે આ ફરિયાદ બાદ એન્ફોર્સમેન્ટ ડિરેક્ટોરેટ (ED) દ્વારા પણ તપાસ અંગે કાર્યવાહી કરવામાં આવી રહી છે. તેમણે માંગ કરી કે દોષી કોઈપણ હોય તેની સામે કાયદેસરની કાર્યવાહી થવી જોઈએ. તેમણે CBI દ્વારા મુખ્યમંત્રી કાર્યાલય, સંદિગ્ધ અધિકારીઓ અને એજન્ટો સામે તપાસ કરવાની પણ માંગ કરી હતી. પંજાબના સાધનોનો દુરુપયોગ કરીને લૂંટ કરવામાં આવી હોવાના આક્ષેપો અંગે જવાબદારો સામે કાયદેસરની કાર્યવાહી થવી જોઈએ તેવી તેમણે માગણી કરી.

હાઇકોર્ટના આદેશનો પણ કર્યો ઉલ્લેખ

તરુણ ચૂઘે પોતાના નિવેદનમાં પંજાબ-હરિયાણા હાઇકોર્ટના એક મામલાનો પણ ઉલ્લેખ કર્યો હતો. તેમણે જણાવ્યું કે હાઇકોર્ટ દ્વારા CBI તપાસ અંગે કાર્યવાહી કરવા અને દોષિતો સામે કાયદેસરની કાર્યવાહી કરવાની દિશામાં આદેશ આપવામાં આવ્યો છે. અંબાજી ખાતે તરુણ ચૂઘના આ નિવેદન બાદ પંજાબની રાજનીતિને લઈને ફરી એકવાર રાજકીય ચર્ચા તેજ થવાની શક્યતા છે.