Arvalli માં જંગલી ભૂંડનો આતંક, ખેડૂતોના ઊભા પાકને પહોંચાડી રહ્યાં છે ભારે નુકસાન
Arvalli
Arvalli માં જંગલી ભૂંડનો આતંક, ખેડૂતોના ઊભા પાકને પહોંચાડી રહ્યાં છે ભારે નુકસાન
Arvalli
Arvalli : એક તરફ વરસાદની અછતને કારણે ખેડૂતો ચિંતામાં છે, ત્યારે બીજી તરફ જંગલી ભૂંડ ખેતરોમાં ઘૂસી ઊભા પાકને નુકસાન પહોંચાડી રહ્યા હોવાના આક્ષેપો સામે આવ્યા છે. ખાસ કરીને મકાઈના તૈયાર થઈ રહેલા પાકને ભૂંડ દ્વારા નષ્ટ કરવામાં આવતા ખેડૂતોને મોટું આર્થિક નુકસાન ભોગવવાનો વારો આવ્યો છે.
મેઘરજમાં રાત પડતાં જંગલી ભૂંડનું આક્રમણ
ખેડૂતોના જણાવ્યા મુજબ, રાત્રિના સમયે જંગલી ભૂંડના ટોળાં ખેતરોમાં ઘૂસી જાય છે. ખેતરમાં ઊભેલા મકાઈના પાકને નુકસાન પહોંચાડતા ભૂંડ પાકને જમીનદોસ્ત કરી દે છે. લાંબા સમયથી મહેનત કરીને ઉગાડેલો પાક તૈયાર થવાના સમયે જ નષ્ટ થવાથી ખેડૂતોની મહેનત અને ખર્ચ બંને પર પાણી ફરી વળે છે.
મેઘરજ તાલુકાના ગ્રામ્ય વિસ્તારોમાં જંગલી પ્રાણીઓથી પાકને થતા નુકસાનની સમસ્યા ખેડૂતો માટે ચિંતાનો વિષય બની રહી છે. ખેડૂતોનું કહેવું છે કે ખેતીમાં બિયારણ, ખાતર, દવા, મજૂરી અને સિંચાઈ સહિતનો ખર્ચ કર્યા બાદ જ્યારે પાક તૈયાર થવા આવે છે ત્યારે જંગલી ભૂંડના કારણે નુકસાન થાય તો તેમની આર્થિક સ્થિતિ વધુ કથળી શકે છે. વરસાદની અછતના કારણે પહેલેથી જ ખેતી પર અસર પડી રહી છે.
ખેતરમાં રાતોરાત ઘૂસી જાય છે ભૂંડ
આવા સંજોગોમાં ઊભા પાકને જંગલી ભૂંડથી નુકસાન પહોંચતા ખેડૂતો પર બેવડો માર પડ્યો છે. ખેડૂતોના માથે જાણે આભ ફાટ્યું હોય તેવી સ્થિતિ સર્જાઈ છે. જંગલી ભૂંડના સતત વધતા ત્રાસને કારણે ખેડૂતોમાં ચિંતા સાથે રોષ પણ જોવા મળી રહ્યો છે. ખેડૂતોનું કહેવું છે કે રાત્રિના સમયે ખેતરોની દેખરેખ રાખવી મુશ્કેલ બની રહે છે. એક તરફ જંગલી પ્રાણીઓથી પાકને બચાવવાની ચિંતા છે તો બીજી તરફ પરિવાર અને ખેતીની જવાબદારી પણ ખેડૂતોના માથે છે.
મેઘરજ તાલુકાના અસરગ્રસ્ત ખેડૂતો દ્વારા પાકને જંગલી પ્રાણીઓથી બચાવવા માટે યોગ્ય સુરક્ષા વ્યવસ્થા કરવાની માંગ કરવામાં આવી છે. ખેડૂતોની માંગ છે કે સંબંધિત તંત્ર દ્વારા આ સમસ્યાનું ગંભીરતાથી નિરાકરણ લાવવામાં આવે અને જંગલી ભૂંડથી થતા પાકના નુકસાન સામે અસરકારક વ્યવસ્થા કરવામાં આવે. હાલમાં ખેડૂતો માટે સૌથી મોટી ચિંતા એ છે કે મહેનતથી તૈયાર કરેલો પાક સુરક્ષિત રીતે ઘરે પહોંચે. વરસાદની અછત અને જંગલી ભૂંડના ત્રાસ વચ્ચે ખેડૂતો સરકાર અને તંત્ર પાસેથી તાત્કાલિક રાહત અને સુરક્ષાની આશા રાખી રહ્યા છે.
Vivek Shah
વિવેક શાહ મિડીયા ક્ષેત્રે બહોળો અનુભવ ધરાવે છે, TV9 Gujaratiમાં તેમણે રીપોર્ટર અને પ્રોડયુસર તરીકે પણ 7 વર્ષ કરતા વધુ સમય કામ કર્યુ છે, સાથે સાથે ABP Asmitaમાં 2 વર્ષ જેટલો સમય Associate Producer તરીકે કામ કર્યુ છે અને Sandesh NEWS Digitalમાં છેલ્લા 2 વર્ષ Senior Sub Editor તરીકે કામ કર્યુ છે. ગુજરાત ફર્સ્ટમાં Assistant Ediotor તરીકે તેમણે 3 મહિના કામ કર્યુ અને હાલમાં તેઓ Growthnow NEWS માં Senior Assignment Editor તરીકે ડિજિટલ વિભાગમાં કામ કરી રહ્યાં છે.
