માત્ર 4 સેકન્ડમાં 11.2 લાખ લીટરની ટાંકી તોડી પડાઈ: નડિયાદ મનપાએ ત્રણ દિવસના પ્લાનિંગ બાદ 1991ની જર્જરીત પાણીની ટાંકી જમીનદોસ્ત કરી

Nadiad Water Tank Demolition: નડિયાદ શહેરના સિવિલ રોડ પર આવેલી વર્ષ 1991માં નિર્માણ પામેલી વિશાળ પાણીની ટાંકી આખરે ઉતારી પાડવામાં આવી છે. અંદાજે 35 વર્ષ જૂની અને 11.2 લાખ લિટરની સંગ્રહ ક્ષમતા ધરાવતી આ ટાંકી લાંબા સમયથી જર્જરિત હાલતમાં હોવાથી નડિયાદ મહાનગરપાલિકા દ્વારા તેને ઉતારી પાડવાનો નિર્ણય લેવામાં આવ્યો હતો.

જર્જરિત ટાંકીના કારણે લેવાયો નિર્ણય

સિવિલ રોડ પર આવેલી આ પાણીની ટાંકી સમય જતાં અત્યંત જર્જરિત બની ગઈ હતી. ટાંકી કોઈપણ સમયે ધરાશાયી થવાની સંભાવનાને ધ્યાનમાં રાખીને મનપા તંત્ર દ્વારા સાવચેતીના ભાગરૂપે તેને ઉતારી પાડવાની કામગીરી હાથ ધરવામાં આવી હતી. ટાંકી જે વિસ્તારમાં આવેલી હતી તે ભરચક વિસ્તાર હોવાથી કામગીરી દરમિયાન કોઈ જાનહાનિ કે નુકસાન ન થાય તે માટે ખાસ તકેદારી રાખવામાં આવી હતી.

ત્રણ દિવસથી ચાલી રહ્યું હતું પ્લાનિંગ

ટાંકી ઉતારી પાડવાની કામગીરી સરળતાથી અને સુરક્ષિત રીતે પૂર્ણ થાય તે માટે નડિયાદ મહાનગરપાલિકાની ટેકનિકલ અને એન્જિનિયરિંગ ટીમ છેલ્લા ત્રણ દિવસથી સમગ્ર કામગીરીનું પ્લાનિંગ કરી રહી હતી. ટીમ દ્વારા સ્થળની સ્થિતિ, ટાંકીની જર્જરિત સ્થિતિ અને તેને નીચે ઉતારવાની પ્રક્રિયા સહિતની બાબતોનું સચોટ આયોજન કરવામાં આવ્યું હતું. ત્યારબાદ ભારે સાવચેતીપૂર્વક ટાંકી ઉતારી પાડવાની કામગીરી હાથ ધરાઈ હતી.

કોઈ અનિચ્છનીય બનાવ ન બન્યો

નડિયાદ મનપાની ટીમે સફળતાપૂર્વક 11.2 લાખ લિટરની ક્ષમતા ધરાવતી વિશાળ પાણીની ટાંકી જમીનદોસ્ત કરી હતી. કામગીરી દરમિયાન સદનસીબે કોઈપણ પ્રકારનો અનિચ્છનીય બનાવ બન્યો નહોતો. ભરચક વિસ્તારમાં જર્જરિત ટાંકી ઉતારી પાડવાની કામગીરી કોઈ જાનમાલના નુકસાન વિના પૂર્ણ થતાં નડિયાદ મહાનગરપાલિકા તંત્રએ રાહતનો શ્વાસ લીધો હતો.