Navratri 2026: અમદાવાદમાં નવરાત્રિ પહેલાં મોટી દુર્ઘટના ટળી, કિર્તીદાન ગઢવીના ‘પરંપરા નવરાત્રિ’નો ડોમ ધરાશાયી

Parampara Navratri Dome Collapse Ahmedabad: નવરાત્રિ શરૂ થાય તે પહેલાં અમદાવાદમાં ગરબાના એક મોટા આયોજન સ્થળે ડોમનો એક ભાગ ધરાશાયી થતાં અફરાતફરીનો માહોલ સર્જાયો હતો. જાણીતા લોકગાયક કિર્તીદાન ગઢવીના ‘પરંપરા નવરાત્રિ’ ગરબા મહોત્સવ માટે ઊભા કરવામાં આવેલા ડોમનો એક હિસ્સો 9 ઓક્ટોબરે અચાનક નીચે બેસી ગયો હતો. સદનસીબે ઘટનાસમયે ગરબા શરૂ થયા ન હોવાથી કોઈ જાનહાનિ કે ઈજા થઈ ન હોવાનું પોલીસ દ્વારા જણાવાયું છે.

ગરબાની તૈયારીઓ વચ્ચે ડોમનો ભાગ તૂટી પડ્યો

અમદાવાદમાં 11 ઓક્ટોબરથી શરૂ થનારા ‘પરંપરા નવરાત્રિ’ મહોત્સવ માટે તૈયારીઓ ચાલી રહી હતી. આ દરમિયાન ગરબા રમવા માટે ઊભા કરાયેલા ડોમનો એક ભાગ અચાનક ધરાશાયી થયો હતો. ઘટનાની જાણ થતાં આયોજકો અને પોલીસની ટીમ સ્થળ પર પહોંચી હતી અને પરિસ્થિતિની તપાસ શરૂ કરી હતી. નવરાત્રિ પહેલાં બનેલી આ ઘટનામાં કોઈ ખેલૈયા હાજર ન હોવાથી મોટી દુર્ઘટના ટળી હતી. જોકે, ડોમના ભાગના ધરાશાયી થવાની ઘટનાને પગલે આયોજન સ્થળની સુરક્ષા અને બાંધકામની મજબૂતી અંગે સવાલો ઊભા થયા છે.

300થી 400 ચોરસ ફૂટનો ભાગ ધરાશાયી

સરખેજ પોલીસ સ્ટેશનના પોલીસ ઇન્સ્પેક્ટર (PI)ના જણાવ્યા મુજબ, અંદાજે 300થી 400 ચોરસ ફૂટનો ગરબા રમવાનો ડોમ ધરાશાયી થયો હતો. આ ઘટનામાં કોઈ જાનહાનિ થઈ નથી અને કોઈને ઈજા પણ પહોંચી નથી.

ડોમ પડવાનું કારણ જાણવા તપાસ

ડોમનો ભાગ કયા કારણોસર ધરાશાયી થયો તે અંગે હાલ તપાસ કરવામાં આવી રહી છે. તપાસ બાદ જ ઘટનાનું ચોક્કસ કારણ સ્પષ્ટ થશે. બીજી તરફ, નવરાત્રિ શરૂ થવામાં ગણતરીના દિવસો બાકી હોવાથી આ ઘટનાની અસર ગરબાના આયોજન અને નિર્ધારિત કાર્યક્રમ પર પડે છે કે નહીં તે અંગે પણ નજર રહેશે. નવરાત્રિ દરમિયાન મોટી સંખ્યામાં ખેલૈયાઓ એકત્રિત થતા હોવાથી આવા આયોજન સ્થળોએ સુરક્ષા વ્યવસ્થા અને માળખાની મજબૂતી સુનિશ્ચિત કરવી અત્યંત જરૂરી છે.