Sara Ali Khan: સારાએ નેપોટિઝમ પર તોડ્યું મૌન, કહ્યું- 'પિતાએ મારા માટે કોઈ ભલામણ કરી નથી...'

Sara Ali Khan: બોલીવુડ એક્ટ્રેસ સારા અલી ખાન હાલમાં પોતાની નવી ફિલ્મ 'ઉડતા તીર'ને લઈને ચર્ચામાં છે. 23 ઓક્ટોબરે થિયેટરમાં રિલીઝ થયેલી આ ફિલ્મમાં તે આયુષ્માન ખુરાના સાથે જોવા મળી રહી છે. ફિલ્મની ચર્ચા વચ્ચે સારાએ બોલીવુડમાં નેપોટિઝમ એટલે કે પરિવારવાદ અંગે પોતાનો અભિપ્રાય વ્યક્ત કર્યો છે. તેણે સ્વીકાર્યું કે ફિલ્મી પરિવારમાંથી આવવાનો ફાયદો તેને મળ્યો છે, પરંતુ સાથે જ તેણે કહ્યું કે વારંવાર પોતાની પ્રતિભા સાબિત કરવાની જવાબદારી માત્ર તેના પર નાખવી યોગ્ય નથી.

ફિલ્મી પરિવારમાં જન્મવાનો ફાયદો મળ્યો છે: સારા

'ફિલ્મફેર' સાથેની વાતચીત દરમિયાન સારાને પૂછવામાં આવ્યું કે તેના પરિવારની ઓળખ અને વારસાએ તેના કરિયરમાં કેટલી મદદ કરી છે. તેના જવાબમાં એક્ટ્રેસે કહ્યું કે આ બાબતના સકારાત્મક અને નકારાત્મક બંને પાસાં છે.

સારાએ સ્વીકાર્યું કે ફિલ્મી પરિવારમાંથી આવવાને કારણે તેના માટે અનેક દરવાજા ખુલ્યા, તેને કામની તકો મળી અને અભિનય કારકિર્દી શરૂ થાય તે પહેલાં જ ઓળખ મળી ગઈ હતી. પરંતુ તેની સાથે અપેક્ષાઓનું સ્તર પણ ઘણું ઊંચું રહ્યું છે.

'નેપોટિઝમના નામે કલાકારોની મહેનતને અવગણવી યોગ્ય નથી': સારા

સારાએ કહ્યું કે આજે નેપોટિઝમ શબ્દને નકારાત્મક રીતે જોવામાં આવે છે. તેને સૌથી વધુ વાંધો એ વાત સામે છે કે નેપોટિઝમની ચર્ચામાં કલાકારની પોતાની મહેનતને અવગણવામાં આવે છે. તેણે જાહ્નવી કપૂર અને અનન્યા પાંડેનો ઉલ્લેખ કરતાં કહ્યું કે કોઈ વ્યક્તિનો જન્મ કયા પરિવારમાં થશે તે તેના હાથમાં નથી. ફિલ્મી પરિવારમાં જન્મવું નસીબની વાત છે અને આ કારણે મળેલી તકો માટે તે આભારી છે.

પરંતુ સારાના મતે, ડેબ્યૂ માટે મળેલી તક અને લાંબા સમય સુધી કરિયરમાં ટકી રહેવા માટે પોતાની પ્રતિભા સાબિત કરવી એ બે અલગ બાબતો છે. તેણે કહ્યું કે કારકિર્દીનાં આઠ વર્ષ પછી પણ જો તેને વારંવાર નેપોટિઝમ અંગે સ્પષ્ટતા આપવી પડે, તો તેને આ યોગ્ય લાગતું નથી.

'મારા કોઈ ગોડફાધર ન હતો': સારા

સારાએ પોતાના અંગત જીવન વિશે વાત કરતાં જણાવ્યું કે સૈફ અલી ખાન અને અમૃતા સિંહના છૂટાછેડા બાદ તે પોતાની માતા સાથે મોટી થઈ છે. તેના જણાવ્યા અનુસાર, તેના પિતાએ તેના માટે કોઈ ફિલ્મ કે પ્રોજેક્ટ મેળવવા ભલામણ કરી ન હતી.

એક્ટ્રેસે કહ્યું કે તેની પાસે એવા પિતા ન હતા, જે તેની ફિલ્મના કોન્ટ્રાક્ટ અંગે વાતચીત કરે અથવા નિર્માતાઓને તેને ફિલ્મોમાં લેવા માટે વિનંતી કરે. તેણે પોતાની પહેલી ફિલ્મ 'કેદારનાથ' દરમિયાન આવેલી મુશ્કેલીઓનો ઉલ્લેખ કરતાં કહ્યું કે તે સમયે તેણે પોતાની સમસ્યાઓ જાતે ઉકેલવી પડી હતી. સારાના શબ્દોમાં ફિલ્મ ઈન્ડસ્ટ્રીમાં તેનો કોઈ ગોડફાધર ન હતો અને તેણે પોતાના કરિયરમાં આવતી મુશ્કેલીઓનો સામનો જાતે કર્યો છે.

નેપોટિઝમની ચર્ચા ફરી શરૂ

સારાના આ નિવેદન બાદ બોલીવુડમાં નેપોટિઝમ અને કલાકારોને મળતી તકો અંગેની ચર્ચા ફરી સામે આવી છે. એક તરફ ફિલ્મી પરિવારમાંથી આવતા કલાકારોને શરૂઆતમાં ઓળખ અને તકો મળવાનો ફાયદો હોય છે, તો બીજી તરફ તેમની પાસેથી અપેક્ષાઓ પણ વધુ રાખવામાં આવે છે. સારાએ પોતાના નિવેદનમાં બંને પાસાં સ્વીકારીને પોતાની મહેનતને પણ યોગ્ય મહત્ત્વ આપવાની વાત કરી છે.

આ પણ વાંચો: Katrina Kaif: ડિલિવરી પછી કેટરિના કૈફના વજન પર ઉઠ્યા સવાલ, એક્ટ્રેસે ટ્રોલર્સને આપ્યો જવાબ