અમદાવાદ: રાજ્યના યુવાનોને ઉદ્યોગલક્ષી અને આધુનિક કૌશલ્યોથી સજ્જ બનાવવા માટે મારુતિ સુઝુકી ઇન્ડિયા લિમિટેડ (MSIL) અને ગુજરાત સરકાર વચ્ચે મહત્વપૂર્ણ કરાર થયો છે. કંપનીએ ગુજરાતના પાંચ ઇન્ડસ્ટ્રીયલ ટ્રેનિંગ ઇન્સ્ટિટ્યૂટ (ITI)માં એડવાન્સ્ડ મેન્યુફેક્ચરિંગ લેબ (AML) સ્થાપવા માટે રાજ્યના રોજગાર અને તાલીમ નિયામક (DET) સાથે MoU પર હસ્તાક્ષર કર્યા છે.

આ પ્રોજેક્ટ હેઠળ પાલનપુર, ભાવનગર, સુરેન્દ્રનગર, ગોધરા અને દાહોદની ITIમાં આધુનિક મેન્યુફેક્ચરિંગ લેબ બનાવવામાં આવશે. આ લેબ દ્વારા વિદ્યાર્થીઓને નવીનતમ ઉત્પાદન ટેક્નોલોજી અને મશીનો પર પ્રેક્ટિકલ તાલીમ આપવામાં આવશે, જેથી તેઓ ઉદ્યોગોની જરૂરિયાતોને અનુરૂપ કૌશલ્ય મેળવી શકે.

મારુતિ સુઝુકીના સિનિયર એક્ઝિક્યુટિવ ઓફિસર (કોર્પોરેટ અફેર્સ) રાહુલ ભારતીએ જણાવ્યું હતું કે, “એડવાન્સ્ડ મેન્યુફેક્ચરિંગ લેબ દ્વારા વિદ્યાર્થીઓને અનુભવ આધારિત શિક્ષણ અને આધુનિક સાધનો પર કામ કરવાની તક મળશે. આ પહેલથી એવા કુશળ વ્યાવસાયિકો તૈયાર થશે, જે બદલાતી ઓટોમોબાઇલ ઇન્ડસ્ટ્રીમાં સરળતાથી જોડાઈ શકશે.”

તેમણે વધુમાં જણાવ્યું કે ગુજરાતમાં કંપનીના નવા મેન્યુફેક્ચરિંગ યુનિટ્સના વિસ્તરણ સાથે ભવિષ્ય માટે તૈયાર અને તાલીમબદ્ધ માનવબળની જરૂરિયાત વધી રહી છે. આવી સ્થિતિમાં આ લેબ્સ ઉદ્યોગોને જરૂરી કૌશલ્ય ધરાવતા યુવાનો પૂરા પાડવામાં મહત્વની ભૂમિકા ભજવશે.

આ પહેલથી રાજ્યના ITI વિદ્યાર્થીઓને રોજગારલક્ષી તાલીમ મળશે અને તેમને ઓટોમોબાઇલ તેમજ મેન્યુફેક્ચરિંગ ક્ષેત્રમાં કારકિર્દી બનાવવામાં મોટી મદદ મળશે.