મુંબઈ: રિલાયન્સ ઇન્ડસ્ટ્રીઝ લિમિટેડ (RIL)ની પેટાકંપની જિયો પ્લેટફોર્મ્સ લિમિટેડ (JPL)ના બોર્ડે IPO (ઇનિશિયલ પબ્લિક ઓફરિંગ) માટે મંજૂરી આપી છે. કંપની SEBI સમક્ષ ડ્રાફ્ટ રેડ હેરિંગ પ્રોસ્પેક્ટસ (DRHP) ફાઇલ કરશે. આ સાથે જિયોના શેરબજારમાં લિસ્ટિંગ તરફનું મહત્વપૂર્ણ પગલું ભરાયું છે.

રિલાયન્સ ઇન્ડસ્ટ્રીઝની 49મી વાર્ષિક સામાન્ય સભા (AGM) દરમિયાન ચેરમેન અને મેનેજિંગ ડિરેક્ટર Mukesh Ambaniએ આ જાહેરાત કરી હતી. કંપની 10 રૂપિયાની ફેસ વેલ્યૂ ધરાવતા 27 કરોડ નવા ઇક્વિટી શેર જાહેર કરવા જઈ રહી છે. શેરની કિંમત બુક બિલ્ડિંગ પ્રક્રિયા દ્વારા નક્કી કરવામાં આવશે.

મુકેશ અંબાણીએ જણાવ્યું હતું કે જિયોના IPOની પ્રક્રિયાનું નેતૃત્વ આગામી પેઢી સંભાળી રહી છે. તેમણે કહ્યું કે આકાશ, ઈશા અને અનંત અંબાણી જિયો IPO પ્રક્રિયાનું નેતૃત્વ કરી રહ્યા છે અને ભવિષ્યમાં મૂલ્ય નિર્માણની નવી તકોનું માર્ગદર્શન આપશે.

તેમણે વધુમાં જણાવ્યું હતું કે જિયોનું જાહેર લિસ્ટિંગ ભારતના ટેક્નોલોજી ક્ષેત્ર માટે એક મહત્વપૂર્ણ સીમાચિહ્ન સાબિત થશે અને વિશ્વ સમક્ષ ભારત વૈશ્વિક સ્તરની ટેક્નોલોજી કંપનીઓ ઉભી કરી શકે છે તે સાબિત કરશે.

જિયોની શરૂઆતનો ઉદ્દેશ દેશમાં ડિજિટલ અસમાનતા દૂર કરવાનો હતો. કંપનીએ સસ્તા દરે હાઇ-સ્પીડ ડેટા અને મફત વૉઇસ સેવા આપીને કરોડો ભારતીયોને ડિજિટલ જીવન સાથે જોડ્યા હોવાનું અંબાણીએ જણાવ્યું હતું.

હાલમાં જિયો પાસે 52.4 કરોડથી વધુ ગ્રાહકો છે, જે તેને ભારતનું સૌથી મોટું ડિજિટલ પ્લેટફોર્મ બનાવે છે. જિયોની 5G સેવાનો ઉપયોગ 26.8 કરોડથી વધુ લોકો કરી રહ્યા છે, જ્યારે JioAirFiber દ્વારા દેશભરમાં લગભગ 1.3 કરોડ ઘરોને કનેક્ટ કરવામાં આવ્યા છે.

બજાર નિષ્ણાતોના મતે, જિયોનું IPO ભારતના ઇતિહાસનું સૌથી મોટું IPO બની શકે છે.