China LPAR Radar India Security: ભારત અને ચીન વચ્ચે ચાલી રહેલા વ્યૂહાત્મક તણાવ વચ્ચે ચીને મ્યાનમાર સરહદ નજીક આવેલા પોતાના યુનાન પ્રાંતમાં અત્યાધુનિક લાર્જ ફેઝ્ડ એરે રડાર (LPAR) સક્રિય કર્યું હોવાનું જાણવા મળ્યું છે. 5000 કિલોમીટરથી વધુ રેન્જ ધરાવતું આ રડાર ભારતના મિસાઇલ પરીક્ષણો તેમજ હિંદ મહાસાગરના વિશાળ વિસ્તાર પર નજર રાખવાની ક્ષમતા ધરાવે છે. રક્ષા ક્ષેત્રના જાણકારોના મતે આ રડાર લાંબા અંતરેથી બેલિસ્ટિક મિસાઇલની ઓળખ કરી શકે છે અને તેની ઉડાન સંબંધિત મહત્વપૂર્ણ માહિતી એકત્રિત કરી શકે છે. આ કારણે ભારત માટે આ વિકાસને વ્યૂહાત્મક પડકાર તરીકે જોવામાં આવી રહ્યો છે.

ભારતના મિસાઇલ ટેસ્ટ પર રહેશે નજર
ઓડિશાના ડૉ. એ.પી.જે. અબ્દુલ કલામ દ્વીપ પરથી ભારત અગ્નિ-5, K-4 સહિતની અદ્યતન મિસાઇલોના પરીક્ષણો કરે છે. નવા રડાર દ્વારા આવા પરીક્ષણો દરમિયાન મિસાઇલની ગતિ, માર્ગ અને અન્ય ટેક્નિકલ વિગતો પર નજર રાખી શકાય તેવી શક્યતા વ્યક્ત કરવામાં આવી રહી છે. રક્ષા વિશ્લેષકોનું માનવું છે કે મિસાઇલ પરીક્ષણ દરમિયાન મળતી માહિતી કોઈપણ દેશ માટે અત્યંત મહત્વની હોય છે. આ માહિતીના આધારે સંભવિત વિરોધી દેશ પોતાની સંરક્ષણ વ્યવસ્થાને વધુ મજબૂત બનાવી શકે છે.

હિંદ મહાસાગર પર પણ નજર રાખવાની ક્ષમતા
યુનાનમાં રડારની વ્યૂહાત્મક સ્થિતિને કારણે ચીનને બંગાળની ખાડી અને હિંદ મહાસાગરના મોટા વિસ્તાર પર નજર રાખવાની સુવિધા મળી શકે છે. હિંદ મહાસાગર ભારત માટે વ્યૂહાત્મક અને આર્થિક રીતે અત્યંત મહત્વપૂર્ણ વિસ્તાર છે, જ્યાં ભારતીય નૌકાદળની મજબૂત હાજરી છે અને વૈશ્વિક વેપારના અનેક મહત્વના દરિયાઈ માર્ગો પસાર થાય છે.

ચીનનું સર્વેલન્સ નેટવર્ક વધુ મજબૂત
ચીન પાસે પહેલેથી જ શિનજિયાંગ અને કોરલા વિસ્તારમાં લાંબા અંતરના રડાર તૈનાત છે. હવે યુનાનમાં નવા LPAR રડારના સક્રિય થવાથી તેની દેખરેખ ક્ષમતા વધુ વિસ્તરી છે. જોકે આ રડાર અંગે ભારત અથવા ચીન તરફથી કોઈ સત્તાવાર નિવેદન જાહેર કરવામાં આવ્યું નથી, પરંતુ રક્ષા નિષ્ણાતો માને છે કે ભવિષ્યમાં ભારતે પોતાની એન્ટી-સર્વેલન્સ ટેક્નોલોજી અને સંરક્ષણ ક્ષમતાઓને વધુ મજબૂત બનાવવાની જરૂર પડશે.