Annamalai Resignation From BJP: ભારતીય જનતા પાર્ટીએ તમિલનાડુના ભૂતપૂર્વ રાજ્ય પ્રમુખ કે. અન્નામલાઈનું રાજીનામું સ્વીકારી લીધું છે. ભાજપના રાષ્ટ્રીય અધ્યક્ષ નીતિન નવીને અન્નામલાઈના રાજીનામાને સત્તાવાર રીતે મંજૂરી આપી દીધી છે. ભાજપ દ્વારા જારી કરાયેલી એક અખબારી યાદી અનુસાર, અન્નામલાઈએ પક્ષના પ્રાથમિક સભ્યપદ પરથી રાજીનામું આપી દીધું છે. ભાજપના રાષ્ટ્રીય અધ્યક્ષ શ્રી નીતિન નવીને તાત્કાલિક અસરથી તેમનું રાજીનામું સ્વીકારી લીધું છે.

ભાજપના રાષ્ટ્રીય મહાસચિવ અને મુખ્યાલયના પ્રભારી અરુણ સિંહ દ્વારા હસ્તાક્ષરિત આ પ્રેસ રિલીઝ સ્પષ્ટ કરે છે કે કે. અન્નામલાઈ હવે ભારતીય જનતા પાર્ટીના પ્રાથમિક સભ્ય નથી. પત્રમાં લખ્યું છે કે, "ભારતીય જનતા પાર્ટીના રાષ્ટ્રીય અધ્યક્ષ, માનનીય શ્રી નીતિન નવીને તમિલનાડુના ભૂતપૂર્વ રાજ્ય અધ્યક્ષ શ્રી કે. અન્નામલાઈ દ્વારા પાર્ટીના પ્રાથમિક સભ્યપદ પરથી રાજીનામું સ્વીકાર્યું છે."

દિલ્હીમાં ભાજપના નેતાઓને મળ્યા
અન્નામલાઈએ 2 જૂનના રોજ ભાજપના રાષ્ટ્રીય અધ્યક્ષ નીતિન નવીન અને રાષ્ટ્રીય મહાસચિવ (સંગઠન) બીએલ સંતોષને મળ્યા હતા. આ પછી તરત જ, તેમણે ગૃહમંત્રી અમિત શાહ સાથે એક અલગ ગુપ્ત બેઠક યોજી. અમિત શાહ અને નીતિન નવીન સહિત ભાજપના તમામ ટોચના નેતાઓ સાથેની આ મુલાકાતમાં, અન્નામલાઈએ ખૂબ જ સૌહાર્દપૂર્ણ વાતાવરણમાં પાર્ટી છોડવાની ઇચ્છા વ્યક્ત કરી હતી. બેઠક પછી, અન્નામલાઈ તમિલનાડુ પાછા ફરવાના હતા. તેઓ દિલ્હી એરપોર્ટ માટે રવાના થઈ ગયા હતા અને ફ્લાઇટ પકડવાના હતા ત્યારે અચાનક ભાજપ હાઈકમાન્ડ દ્વારા તેમને પાછા બોલાવવામાં આવ્યા. ભાજપના ટોચના નેતાઓએ અન્નામલાઈને રોકવા અને તેમને પાર્ટી છોડવાનો નિર્ણય પાછો ખેંચવા માટે સમજાવવાનો છેલ્લો પ્રયાસ કર્યો, પરંતુ અન્નામલાઈ તેમના નિર્ણય પર અડગ રહ્યા અને અંતે ભાજપ મુખ્યાલય તરફથી તેમનું રાજીનામું સ્વીકારતી એક પ્રેસ રિલીઝ બહાર પાડવામાં આવી.