દેશભરમાં હવામાનનો મિજાજ અચાનક બદલાઈ ગયો છે. ભારતીય હવામાન વિભાગ (IMD)એ દિલ્હી, ઉત્તર પ્રદેશ, બિહાર, મધ્ય પ્રદેશ સહિત 13 રાજ્યોમાં ભારે વરસાદ, તેજ પવન અને વીજળી પડવાની ચેતવણી જાહેર કરી છે. આગામી 24થી 48 કલાક દરમિયાન અનેક વિસ્તારોમાં 70 કિમી પ્રતિ કલાકની ઝડપે પવન ફૂંકાવાની શક્યતા વ્યક્ત કરવામાં આવી છે.

દિલ્હી-એનસીઆરમાં ગુરુવારે સાંજે અચાનક વાતાવરણમાં મોટો ફેરફાર જોવા મળ્યો હતો. દિવસભરની ગરમી અને ઉકળાટ બાદ આકાશમાં ઘેરા વાદળો છવાઈ ગયા અને ભારે પવન સાથે વરસાદ શરૂ થયો હતો. IMDએ રાજધાની માટે રેડ એલર્ટ જાહેર કરીને લોકોને જરૂરી ન હોય તો ઘરની બહાર ન નીકળવાની સલાહ આપી છે. હવામાન વિભાગના જણાવ્યા અનુસાર કેટલાક વિસ્તારોમાં પવનની ઝડપ 80થી 90 કિમી પ્રતિ કલાક સુધી પહોંચી શકે છે.

ઉત્તર પ્રદેશમાં પણ વરસાદ અને આંધીનું ડબલ એટેક જોવા મળી શકે છે. આગ્રા, મથુરા, ઝાંસી, ગોરખપુર, બલિયા, દેવરિયા અને સોનભદ્ર સહિતના જિલ્લાઓમાં ભારે વરસાદ અને તોફાની પવનની આગાહી કરવામાં આવી છે. બીજી તરફ બિહારમાં પટણા, ગયા, દરભંગા, સમસ્તીપુર, પૂર્ણિયા અને કટિહારમાં વજ્રપાત અને તેજ પવનનું જોખમ વધ્યું છે.

ઝારખંડમાં ટૂંક સમયમાં ચોમાસું પ્રવેશ કરે તેવી શક્યતા છે. રાંચી, દુમકા, દેવઘર અને સિંહભૂમ સહિતના વિસ્તારોમાં ભારે વરસાદનું એલર્ટ આપવામાં આવ્યું છે. પશ્ચિમ બંગાળમાં પણ કોલકાતા સહિત અનેક જિલ્લાઓમાં ભારે વરસાદ અને 65 કિમી પ્રતિ કલાકની ઝડપે પવન ફૂંકાવાની આગાહી કરવામાં આવી છે.

હવામાન નિષ્ણાતોના જણાવ્યા મુજબ હરિયાણા અને આસપાસ સર્જાયેલા સાયક્લોનિક સર્ક્યુલેશન તેમજ સક્રિય પશ્ચિમી વિક્ષોભના કારણે ઉત્તર ભારતના હવામાનમાં આ મોટો ફેરફાર જોવા મળી રહ્યો છે. સાથે જ ચોમાસું હવે મહારાષ્ટ્ર, ગોવા અને પૂર્વીય ભારત તરફ ઝડપથી આગળ વધી રહ્યું છે.

IMDએ ખેડૂતો, માછીમારો અને ખુલ્લા વિસ્તારોમાં કામ કરતા લોકોને ખાસ સાવચેતી રાખવાની અપીલ કરી છે. ભારે પવનને કારણે વૃક્ષો ધરાશાયી થવા, વીજ પુરવઠો ખોરવાવા અને વાહન વ્યવહાર પ્રભાવિત થવાની શક્યતા વ્યક્ત કરવામાં આવી છે.