અમદાવાદ:  અમદાવાદ આગામી વર્ષોમાં વૈશ્વિક રમતગમતના કેન્દ્ર તરીકે ઉભરી રહ્યું છે. કોમનવેલ્થ ગેમ્સ 2030 અને સંભવિત ઓલિમ્પિક 2036ની તૈયારીઓ વચ્ચે હવે અમદાવાદને વધુ એક પ્રતિષ્ઠિત આંતરરાષ્ટ્રીય રમતોત્સવની યજમાની મળવા જઈ રહી છે. વર્ષ 2029માં અમદાવાદમાં વર્લ્ડ પોલીસ એન્ડ ફાયર ગેમ્સનું આયોજન કરવામાં આવશે, જેને ધ્યાનમાં રાખીને ગુજરાત સરકારે તૈયારીઓનો પ્રારંભ કરી દીધો છે. રાજ્યના ગૃહ વિભાગે આ મેગા ઇવેન્ટના આયોજન માટે જરૂરી પ્રાથમિક વ્યવસ્થાઓ ઉભી કરવા રૂ.10 કરોડના ખર્ચને મંજૂરી આપી છે. આ રકમનો ઉપયોગ આયોજન સંબંધિત વિવિધ કામગીરી, સંકલન અને વ્યવસ્થાપન માટે કરવામાં આવશે.

સ્પેશિયલ પર્પઝ વ્હિકલ દ્વારા થશે આયોજન
આંતરરાષ્ટ્રીય સ્તરની આ રમતોત્સવને સફળ બનાવવા માટે અગાઉથી જ એક સ્પેશિયલ પર્પઝ વ્હિકલ (SPV)ની રચના કરવામાં આવી છે. આ સંસ્થા સમગ્ર આયોજન, નાણાકીય વ્યવસ્થાપન, ટેકનિકલ સંકલન અને વિવિધ વિભાગો વચ્ચેના સમન્વયની જવાબદારી સંભાળશે. સરકાર દ્વારા મંજૂર કરવામાં આવેલી રકમનો ઉપયોગ રમતોત્સવ માટેની વ્યૂહરચના તૈયાર કરવા, આંતરરાષ્ટ્રીય સંસ્થાઓ સાથે સંવાદ સ્થાપવા અને આયોજનની કામગીરીને ગતિ આપવા માટે કરવામાં આવશે.

સુરક્ષા, તબીબી સેવા અને પરિવહન પર ખાસ ધ્યાન
વર્લ્ડ પોલીસ એન્ડ ફાયર ગેમ્સમાં વિશ્વના અનેક દેશોમાંથી હજારો ખેલાડીઓ, અધિકારીઓ અને પ્રતિનિધિઓ ભાગ લે તેવી સંભાવના છે. આને ધ્યાનમાં રાખીને સુરક્ષા, પરિવહન, તબીબી સેવા, સ્વયંસેવકોની નિમણૂક, આતિથ્ય વ્યવસ્થા અને અન્ય લોજિસ્ટિક સપોર્ટ માટે વિશેષ આયોજન કરવામાં આવશે. આ ઉપરાંત રમતોત્સવના ભવ્ય ઉદ્ઘાટન અને સમાપન સમારોહ માટે પણ અલગથી આયોજન કરવામાં આવશે, જેથી ગુજરાતની સંસ્કૃતિ અને આધુનિકતા વિશ્વ સમક્ષ પ્રદર્શિત કરી શકાય.

આંતરરાષ્ટ્રીય સંસ્થાઓ સાથે થશે સંકલન
આ ગેમ્સના સફળ આયોજન માટે કેલિફોર્નિયા પોલીસ એથ્લેટિક્સ ફેડરેશન સહિત વિવિધ રાષ્ટ્રીય અને આંતરરાષ્ટ્રીય પોલીસ, ફાયર અને રમતગમત સંસ્થાઓ સાથે સંકલન કરવામાં આવશે. આયોજન દરમિયાન પ્રાયોજકો સાથેના સંબંધો, બ્રાન્ડિંગ અને ઈન્ટેલેક્ચ્યુઅલ પ્રોપર્ટી અધિકારોનું સંરક્ષણ પણ સુનિશ્ચિત કરવામાં આવશે.

તમામ પ્રક્રિયાનું થશે દસ્તાવેજીકરણ
ગેમ્સ સંબંધિત દરેક પ્રવૃત્તિનું દસ્તાવેજીકરણ કરવામાં આવશે. સ્પર્ધાઓ યોજાનારી જગ્યાઓની ક્ષમતા, સુવિધાઓ અને ટેકનિકલ માપદંડોની પણ સમીક્ષા કરવામાં આવશે. આયોજનની ગુણવત્તા જાળવવા માટે જરૂરિયાત મુજબ થર્ડ-પાર્ટી એજન્સીની નિમણૂક પણ કરવામાં આવી શકે છે. સરકારી માર્ગદર્શિકા મુજબ ખરીદી અને સેવાઓ માટે Government e-Marketplace (GeM) પોર્ટલની પ્રક્રિયાનું પાલન કરવામાં આવશે.

ગુજરાતના સ્પોર્ટ્સ ઈન્ફ્રાસ્ટ્રક્ચરને મળશે નવી ઓળખ
રમતગમત ક્ષેત્રે ગુજરાત સતત આગળ વધી રહ્યું છે. કોમનવેલ્થ ગેમ્સ અને ઓલિમ્પિકની સંભાવિત યજમાનીને ધ્યાનમાં રાખીને રાજ્યમાં મોટા પાયે રમતગમતના માળખાકીય વિકાસના કામો ચાલી રહ્યા છે. તાજેતરમાં જ રાજ્ય સરકારે અમદાવાદમાં અદ્યતન સ્પોર્ટ્સ ઈન્જરી અને સ્પાઈન સેન્ટર સ્થાપવાની જાહેરાત કરી હતી, જેના માટે અંદાજે રૂ.295 કરોડના ખર્ચનો અંદાજ છે. હવે વર્લ્ડ પોલીસ એન્ડ ફાયર ગેમ્સના આયોજનથી શહેરને વધુ એક વૈશ્વિક ઓળખ મળવાની શક્યતા છે.

ગુજરાત માટે કેમ મહત્વપૂર્ણ છે આ ગેમ્સ?
વર્લ્ડ પોલીસ એન્ડ ફાયર ગેમ્સ માત્ર રમતોત્સવ નથી, પરંતુ તે સુરક્ષા અને ઇમરજન્સી સેવાઓ સાથે જોડાયેલા કર્મચારીઓ માટેનું વૈશ્વિક મંચ છે. આ આયોજનથી ગુજરાતમાં રમતગમત, પર્યટન, હોટેલ ઉદ્યોગ, પરિવહન અને સ્થાનિક અર્થતંત્રને પણ મોટો લાભ મળી શકે છે. વર્ષ 2029માં યોજાનારી આ ગેમ્સ અમદાવાદને આંતરરાષ્ટ્રીય રમતગમતના નકશા પર વધુ મજબૂત રીતે સ્થાપિત કરશે અને આગામી કોમનવેલ્થ તથા ઓલિમ્પિક માટેની તૈયારીઓને પણ નવી ગતિ આપશે.