સાણંદ: રાજ્ય સરકાર દ્વારા આરોગ્ય સેવાઓને વધુ મજબૂત બનાવવા કરોડો રૂપિયાનું બજેટ ફાળવવામાં આવે છે, પરંતુ સાણંદ સિવિલ હોસ્પિટલની હાલત જોતા અનેક ગંભીર સવાલો ઉભા થઈ રહ્યા છે. અમારી ટીમ દ્વારા કરવામાં આવેલા સ્ટિંગ ઓપરેશન દરમિયાન હોસ્પિટલની ચોંકાવનારી અને બેદરકારીભરી સ્થિતિ સામે આવી છે, જે આરોગ્ય તંત્રની કામગીરી પર પ્રશ્નાર્થ ઊભો કરે છે.

સાણંદ સિવિલ હોસ્પિટલ હાલ લગભગ બંધ હાલતમાં જોવા મળી રહી છે. હોસ્પિટલના મુખ્ય વિભાગોમાં કોઈ સારવારની કામગીરી જોવા મળી નહોતી, જ્યારે બીજી તરફ હોસ્પિટલ માટે ખરીદવામાં આવેલા લાખો રૂપિયાના સાધનો ખુલ્લામાં કચરાની જેમ પડેલા જોવા મળ્યા હતા. પ્રજાના ટેક્સના નાણાંથી ખરીદાયેલા આ સાધનોનો ઉપયોગ થવાને બદલે તે ધૂળ ખાઈ રહ્યા છે.

સ્ટિંગ દરમિયાન હોસ્પિટલની બહાર એસી યુનિટ, મેડિકલ સાધનો, હોસ્પિટલના ખાટલા, ઇલેક્ટ્રિક સાધનો અને અન્ય સરકારી સંપત્તિ બિનજરૂરી રીતે પડેલી જોવા મળી હતી. યોગ્ય જાળવણીના અભાવે આ સાધનો બગડી રહ્યા હોવાનું પણ સ્પષ્ટ દેખાઈ રહ્યું હતું. કરોડો રૂપિયાના સરકારી ખર્ચ બાદ પણ આ સ્થિતિ સામે આવતાં હવે પ્રજાના નાણાંનો બગાડ થઈ રહ્યો હોવાના આક્ષેપો ઉઠી રહ્યા છે.

હોસ્પિટલનું બિલ્ડિંગ પણ અત્યંત જર્જરિત હાલતમાં જોવા મળ્યું. અનેક જગ્યાએ છતમાંથી પ્લાસ્ટર તૂટી પડ્યું છે, દિવાલોમાં તિરાડો પડી ગઈ છે અને ભેજના કારણે આખું માળખું ખખડી રહ્યું છે. દર્દીઓ અને સ્ટાફ માટે જોખમ સર્જાય તેવી સ્થિતિ હોવા છતાં જરૂરી મરામત કે સુધારાના કોઈ ખાસ પ્રયાસો નજરે પડતા નથી.

બીજી બાજુ,  સ્થાનિક લોકોનું કહેવું છે કે હોસ્પિટલ માટે વર્ષોથી કરોડો રૂપિયાનો ખર્ચ કરવામાં આવ્યો છે, પરંતુ તેનો લાભ સામાન્ય લોકોને મળી રહ્યો નથી. હોસ્પિટલમાં જરૂરી સુવિધાઓ હોવા છતાં તેનો યોગ્ય ઉપયોગ થતો નથી. કેટલાક લોકોએ તો એવો પણ આક્ષેપ કર્યો કે ઘણી વખત ડોક્ટરો અને આરોગ્ય કર્મચારીઓની હાજરી અંગે પણ પ્રશ્નો ઉભા થાય છે.

એક તરફ સાણંદ સિવિલ હોસ્પિટલનું બિલ્ડિંગ જર્જરિત હાલતમાં ઊભું છે, જ્યાં દર્દીઓને સમયસર સારવાર તો દૂર, ડોક્ટરો પણ નિયમિત રીતે હાજર ન હોવાના આક્ષેપો સામે આવી રહ્યા છે. બીજી તરફ હોસ્પિટલ માટે ખરીદવામાં આવેલા લાખો રૂપિયાના મેડિકલ સાધનો બહાર ખુલ્લામાં ધૂળ ખાતા અને કબાડની સ્થિતિમાં પડેલા જોવા મળી રહ્યા છે. આ સમગ્ર સ્થિતિ પ્રજાના ટેક્સના રૂપિયાનો ખુલ્લેઆમ બગાડ થતો હોવાનો સવાલ ઊભો કરે છે. સ્થાનિકોનો આક્ષેપ છે કે જ્યારે દર્દીઓ સારવાર માટે હોસ્પિટલ પહોંચે છે ત્યારે તેમને ડોક્ટરો ઉપલબ્ધ ન હોવાને કારણે અમદાવાદની સિવિલ હોસ્પિટલ અથવા સોલા સિવિલ હોસ્પિટલમાં રિફર કરવામાં આવે છે. એક તરફ આરોગ્ય સેવાઓના અભાવે દર્દીઓ મુશ્કેલી ભોગવી રહ્યા છે અને બીજી તરફ કરોડો રૂપિયાના સરકારી સંસાધનો બિનઉપયોગી હાલતમાં પડ્યા છે, જે સમગ્ર આરોગ્ય તંત્રની કામગીરી સામે ગંભીર પ્રશ્નો ઉભા કરે છે.

સૌથી મહત્વની બાબત એ છે કે હોસ્પિટલ બંધ હાલતમાં હોવા છતાં તેને ફરી કાર્યરત બનાવવા માટે કોઈ ગંભીર પ્રયાસો થઈ રહ્યા હોય તેવું દેખાતું નથી. એક તરફ સામાન્ય લોકોને સારવાર માટે અમદાવાદ અને અન્ય શહેરોની હોસ્પિટલોમાં ધક્કા ખાવા પડે છે, જ્યારે બીજી તરફ સાણંદ જેવી જગ્યાએ સરકારી હોસ્પિટલના કરોડોના સાધનો ઉપયોગ વગર પડ્યા છે.

આ સમગ્ર સ્થિતિ એ પ્રશ્ન ઉભો કરે છે કે આખરે પ્રજાના ટેક્સના કરોડો રૂપિયાનો જવાબદાર કોણ? જો હોસ્પિટલ શરૂ જ ન થવાની હોય તો લાખો-કરોડોના સાધનો ખરીદવાનો શું અર્થ? હવે સ્થાનિક લોકો તંત્ર પાસેથી જવાબ અને કાર્યવાહી બંનેની માંગ કરી રહ્યા છે. હાલ જોવાનું એ રહેશે કે આરોગ્ય વિભાગ અને જવાબદાર અધિકારીઓ આ મામલે શું પગલાં ભરે છે અને સાણંદ સિવિલ હોસ્પિટલને ફરી કાર્યરત બનાવવા માટે કોઈ ચોક્કસ કાર્યવાહી કરવામાં આવે છે કે નહીં.