અમદાવાદ: ભારતના માનનીય રાષ્ટ્રપતિ શ્રીમતી દ્રૌપદી મુર્મુ આજે તેમના ત્રણ દિવસીય ગુજરાત પ્રવાસના હેતુથી અમદાવાદ એરપોર્ટ પર આવી પહોંચ્યા હતા. રાષ્ટ્રપતિના આગમન પ્રસંગે એરપોર્ટ પર રાજ્યના પ્રોટોકોલ મુજબ તેમનું ખૂબ જ ઉષ્માભર્યું અને ગરિમાપૂર્ણ સ્વાગત કરવામાં આવ્યું હતું. રાષ્ટ્રપતિના સ્વાગત માટે એરપોર્ટ પર રાજ્યપાલ આચાર્ય દેવવ્રત, મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવી વિશેષ રૂપે ઉપસ્થિત રહ્યા હતા. આ મહાનુભાવોએ પુષ્પગુચ્છ અર્પણ કરી રાષ્ટ્રપતિને આવકાર્યા હતા.

ઉચ્ચ અધિકારીઓની ઉપસ્થિતિ

આ પ્રસંગે મંત્રી શ્રી પ્રફુલભાઈ પાનશેરિયા, મુખ્ય સચિવ શ્રી એમ. કે. દાસ, રાજ્યના ઇન્ચાર્જ પોલીસ વડા શ્રી કે.એલ.એન રાવ, એર માર્શલ શ્રી મહેતાબસિંહ દેશવાલ, જીઓસી શ્રી ગૌરવ બગ્ગા, અમદાવાદ શહેરના પોલીસ કમિશનર શ્રી જી.એસ.મલિક તથા અમદાવાદ કલેકટર શ્રી સુજીત કુમાર સહિતના ઉચ્ચ અધિકારીઓએ રાષ્ટ્રપતિશ્રીનું અભિવાદન કરી તેમને આવકાર્યાં હતાં. રાષ્ટ્રપતિ તેમના આ પ્રવાસ દરમિયાન ગુજરાતમાં વિવિધ કાર્યક્રમોમાં હાજરી આપશે, જે અંતર્ગત રાજ્યભરમાં સુરક્ષા અને વ્યવસ્થાના ચુસ્ત બંદોબસ્ત ગોઠવવામાં આવ્યા છે.