PM Modi Sanand Semiconductor Plant: વડાપ્રધાન નરેન્દ્ર મોદીએ ગુજરાતના સાનંદ ખાતે શરૂ થયેલી CG SEMI OSAT સેમિકન્ડક્ટર ફેસિલિટીમાં કાર્યરત મહિલા કર્મચારીઓની પ્રશંસા કરતાં જણાવ્યું કે ભારતની યુવા શક્તિ દેશને ટેક્નોલોજી ક્ષેત્રે નવી ઊંચાઈએ પહોંચાડી રહી છે. ખાસ કરીને દૂરદરાજના અને આદિવાસી વિસ્તારોમાંથી આવેલી યુવતીઓ સેમિકન્ડક્ટર ઉદ્યોગમાં મહત્વપૂર્ણ યોગદાન આપી રહી છે તે દેશ માટે ગૌરવની બાબત હોવાનું તેમણે જણાવ્યું.

વડાપ્રધાન મોદીએ સોશિયલ મીડિયા પ્લેટફોર્મ X પર પોસ્ટ કરીને જણાવ્યું કે સાનંદના નવા સેમિકન્ડક્ટર પ્લાન્ટની મુલાકાત દરમિયાન કર્મચારીઓ સાથેની તેમની મુલાકાત સૌથી યાદગાર ક્ષણોમાંથી એક હતી. તેમણે જણાવ્યું કે પ્લાન્ટમાં કાર્યરત અનેક મહિલાઓ દેશના અંતરિયાળ અને આદિવાસી વિસ્તારોમાંથી આવે છે અને તેમણે વિશેષ તાલીમ મેળવીને સેમિકન્ડક્ટર ટેક્નોલોજીમાં કુશળતા હાંસલ કરી છે.

ગામડાંની દીકરીઓ બની રહી છે ટેક્નોલોજી ક્ષેત્રની શક્તિ
પ્લાન્ટમાં કાર્યરત એક મહિલા કર્મચારીએ વડાપ્રધાનને જણાવ્યું કે તેમના ગામમાં પહેલાં દીકરીઓને ઉચ્ચ અભ્યાસ માટે બહાર મોકલવાની પરંપરા નહોતી, પરંતુ હવે તેમની નોકરી અને સફળતાને કારણે લોકોની માનસિકતા બદલાઈ રહી છે. ગામની અન્ય યુવતીઓ પણ હવે ટેક્નિકલ ક્ષેત્રમાં કારકિર્દી બનાવવા માટે પ્રેરિત થઈ રહી છે.

દેશના વિવિધ રાજ્યોના યુવાનોને મળી તક
મોદીએ જમ્મુ-કાશ્મીરના કર્મચારી કૌશલ કુમાર સાથે પણ વાતચીત કરી હતી. ઉપરાંત ઝારખંડની એક મહિલા કર્મચારીએ જણાવ્યું કે ITI અભ્યાસ બાદ તેમને CG SEMIમાં તક મળી અને હવે તેમને વિદેશમાં તાલીમ લેવાની તક પણ પ્રાપ્ત થઈ છે.

₹7,500 કરોડના રોકાણથી તૈયાર થયો પ્લાન્ટ
સાનંદમાં સ્થાપિત CG SEMI OSAT ફેસિલિટી લગભગ ₹7,500 કરોડના રોકાણથી વિકસાવવામાં આવી છે. ઇન્ડિયા સેમિકન્ડક્ટર મિશન હેઠળ ઉત્પાદન શરૂ કરનાર આ દેશની ત્રીજી સેમિકન્ડક્ટર મેન્યુફેક્ચરિંગ યુનિટ છે. અહીં ઓટોમોબાઇલ, ઇન્ડસ્ટ્રિયલ અને કન્ઝ્યુમર ઇલેક્ટ્રોનિક્સ ક્ષેત્ર માટે જરૂરી ચિપ્સનું પેકેજિંગ અને ટેસ્ટિંગ કરવામાં આવશે.

સેમિકન્ડક્ટર ઇકોસિસ્ટમ મજબૂત બનશે
વડાપ્રધાન મોદીએ જણાવ્યું કે ભારતનું લક્ષ્ય ચિપ ડિઝાઇનથી લઈને ફેબ્રિકેશન, પેકેજિંગ અને ટેસ્ટિંગ સુધીનો સંપૂર્ણ સેમિકન્ડક્ટર ઇકોસિસ્ટમ ઉભો કરવાનો છે. આ પ્રયાસ ભારતને વૈશ્વિક સેમિકન્ડક્ટર હબ બનાવવા તરફનું મહત્વપૂર્ણ પગલું સાબિત થશે.