હાંસોટની પંડવાઈ સુગર ફેક્ટરીની ચૂંટણીનું જાહેરનામું પ્રસિદ્ધ, 5 સપ્ટેમ્બરે મતદાન

Pandvai Sugar Factory Election: હાંસોટ તાલુકામાં આવેલી શ્રી ખેડૂત સહકારી ખાંડ ઉદ્યોગ મંડળી એટલે કે પંડવાઈ સુગર ફેક્ટરીની વ્યવસ્થાપક સમિતિની ચૂંટણીને લઈને જાહેરનામું પ્રસિદ્ધ કરવામાં આવ્યું છે. કુલ 15 બેઠકો માટે યોજાનારી આ ચૂંટણીને લઈને સહકારી ક્ષેત્રમાં રાજકીય ગરમાવો જોવા મળી શકે છે.

5 સપ્ટેમ્બરે મતદાન
જાહેરનામા મુજબ પંડવાઈ સુગર ફેક્ટરીની વ્યવસ્થાપક સમિતિની ચૂંટણી માટે 5 સપ્ટેમ્બર, 2026ના રોજ મતદાન યોજાશે. મતદાનનો સમય સવારે 8 વાગ્યાથી સાંજના 5 વાગ્યા સુધી રહેશે. ચૂંટણીની સમગ્ર પ્રક્રિયા માટે કાર્યક્રમ જાહેર થતાં હવે સંભવિત ઉમેદવારો અને સહકારી ક્ષેત્રના આગેવાનોમાં દોડધામ શરૂ થશે.

19થી 22 ઓગસ્ટ સુધી ઉમેદવારી પત્ર ભરાશે
ચૂંટણી કાર્યક્રમ અનુસાર ઉમેદવારી પત્ર મેળવવા અને રજૂ કરવાની પ્રક્રિયા 19 ઓગસ્ટથી 22 ઓગસ્ટ, 2026 સુધી રહેશે. ત્યારબાદ 22 ઓગસ્ટે ઉમેદવારી પત્રોની ચકાસણી કરવામાં આવશે. માન્ય ઉમેદવારી પત્રોની યાદી પ્રસિદ્ધ થયા બાદ ઉમેદવારી પાછી ખેંચવાની પ્રક્રિયા 25 ઓગસ્ટ, 2026 સુધી ચાલશે. 25 ઓગસ્ટ બાદ અંતિમ ઉમેદવારોની યાદી જાહેર કરવામાં આવશે.

6 સપ્ટેમ્બરે મતગણતરી
મતદાન પૂર્ણ થયા બાદ 6 સપ્ટેમ્બર, 2026ના રોજ સવારે 8 વાગ્યાથી મતગણતરી શરૂ કરવામાં આવશે. મતગણતરી માટે હાંસોટ મામલતદાર કચેરી ખાતે વ્યવસ્થા કરવામાં આવી છે.

ઈશ્વરસિંહ પટેલ ચેરમેન હોવાથી ચૂંટણી બની પ્રતિષ્ઠાનો જંગ
પંડવાઈ સુગર ફેક્ટરીના વર્તમાન ચેરમેન તરીકે રાજ્યના જળ સંપત્તિ મંત્રી ઈશ્વરસિંહ પટેલ જવાબદારી સંભાળી રહ્યા છે. જેના કારણે આ ચૂંટણીને ખાસ મહત્વ મળી રહ્યું છે. 15 બેઠકો માટે યોજાનારી ચૂંટણીમાં કોણ મેદાનમાં ઉતરે છે અને કયા જૂથ વચ્ચે સીધી ટક્કર થાય છે તેના પર સહકારી ક્ષેત્રની સાથે રાજકીય વર્તુળોની પણ નજર રહેશે. આ ચૂંટણીના પરિણામો પંડવાઈ સુગર ફેક્ટરીના આગામી સંચાલન માટે મહત્વપૂર્ણ બની શકે છે.

• કુલ બેઠકો: 15
• ઉમેદવારી પત્ર: 19થી 22 ઓગસ્ટ, 2026
• ચકાસણી: 22 ઓગસ્ટ, 2026
• ઉમેદવારી પરત ખેંચવાની અંતિમ તારીખ: 25 ઓગસ્ટ, 2026
• મતદાન: 5 સપ્ટેમ્બર, 2026
• મતદાનનો સમય: સવારે 8થી સાંજે 5 વાગ્યા સુધી
• મતગણતરી: 6 સપ્ટેમ્બર, 2026
• મતગણતરી સ્થળ: હાંસોટ મામલતદાર કચેરી