ગાંધીનગર: કોમનવેલ્થ ગેમ્સ 2030ને સફળ બનાવવા માટે NCC ડિરેક્ટોરેટ ગુજરાતે મહત્વપૂર્ણ પહેલ શરૂ કરી છે. 17 જૂન 2026ના રોજ NCC ડિરેક્ટોરેટ ગુજરાતના એડિશનલ ડિરેક્ટર જનરલ (ADG) એ રાજ્યના મુખ્યમંત્રી ભૂપેન્દ્ર પટેલ સાથે મુલાકાત કરીને કોમનવેલ્થ ગેમ્સ 2030 માટેનો વિશેષ એક્શન પ્લાન (Action Plan) રજૂ કરી હતી. આ મુલાકાત દરમિયાન NCC કેડેટ્સને ગેમ્સના પ્રારંભિક આયોજનથી લઈને અમલીકરણ સુધી સક્રિય રીતે જોડવાનો પ્રસ્તાવ રજૂ કરવામાં આવ્યો હતો. મુખ્યમંત્રીએ આ વિચારને આવકારતા જણાવ્યું કે NCC કેડેટ્સ શિસ્ત, નેતૃત્વ અને સેવાભાવના ઉત્તમ ઉદાહરણ છે અને તેમની ભૂમિકા ગેમ્સના સફળ આયોજનમાં અત્યંત મહત્વપૂર્ણ સાબિત થશે.

NCC કેડેટ્સ બનશે આયોજનનો મહત્વનો હિસ્સો
મુખ્યમંત્રી ભૂપેન્દ્ર પટેલે કહ્યું કે NCC કેડેટ્સ માત્ર યુવાનો નથી, પરંતુ દેશના ભવિષ્યના જવાબદાર નેતાઓ છે. તેમની શિસ્ત, કાર્યક્ષમતા અને સંકલન ક્ષમતા જેવા ગુણો કોમનવેલ્થ ગેમ્સ જેવા આંતરરાષ્ટ્રીય આયોજનમાં ઉપયોગી સાબિત થશે.

ટેક્નોલોજી આધારિત તાલીમ પર ભાર
મુલાકાત દરમિયાન મેજર જનરલ બિમલ મોંગા, SM, VSM એ મુખ્યમંત્રીને NCC ડિરેક્ટોરેટ ગુજરાતની વિવિધ પ્રવૃત્તિઓ અંગે માહિતી આપી હતી. તેમણે સાયબર ડિફેન્સ, ડ્રોન ઓપરેશન્સ, ડિજિટલ લીડરશિપ, આર્ટિફિશિયલ ઇન્ટેલિજન્સ (AI) અને ડિઝાસ્ટર રિસ્પોન્સ જેવા આધુનિક ક્ષેત્રોમાં NCC કેડેટ્સને આપવામાં આવતી તાલીમ અંગે વિસ્તૃત માહિતી રજૂ કરી.

‘વિકસિત ભારત’ માટે યુવાનોને તૈયાર કરવાનો સંકલ્પ
મુખ્યમંત્રી ટેક્નોલોજી આધારિત તાલીમ અને યુવાનોને ભવિષ્ય માટે તૈયાર કરવાની પહેલથી ખાસ પ્રભાવિત થયા હતા. તેમણે NCC ગુજરાતના પ્રયાસોની પ્રશંસા કરતાં જણાવ્યું કે આવા કાર્યક્રમો રાજ્યના યુવાનોને શિસ્તબદ્ધ અને ટેક્નોલોજીકલ રીતે સક્ષમ નેતાઓ તરીકે વિકસાવવામાં મહત્વપૂર્ણ ભૂમિકા ભજવશે. તેમણે વિશ્વાસ વ્યક્ત કર્યો કે NCC કેડેટ્સ ‘સશક્ત અને વિકસિત ભારત’ના નિર્માણમાં આગેવાની લેશે અને કોમનવેલ્થ ગેમ્સ 2030માં પણ દેશનું ગૌરવ વધારશે.