દેવભૂમિ દ્વારકા: ગુજરાતનો દરિયાકાંઠો ફરી એકવાર નશાના કારોબારને લઈને ચર્ચામાં આવ્યો છે. દેવભૂમિ દ્વારકા જિલ્લાના કલ્યાણપુર નજીક દરિયાકાંઠેથી પોલીસે મોટી કાર્યવાહી કરતા કરોડોની કિંમતનું ચરસ ઝડપી પાડ્યું છે. બિનવારસી હાલતમાં મળી આવેલા આ જથ્થાને પગલે સુરક્ષા એજન્સીઓ સતર્ક થઈ ગઈ છે.

બિનવારસી પેકેટમાંથી મળ્યું કરોડોનું ચરસ
મળતી માહિતી મુજબ, કલ્યાણપુર પોલીસને દરિયાકાંઠાના વિસ્તારમાં પેટ્રોલિંગ દરમિયાન શંકાસ્પદ પેકેટો મળી આવ્યા હતા. જેની તપાસ કરતા તેમાંથી 4.548 કિલો ચરસનો જથ્થો મળી આવ્યો હતો. આ જથ્થાની આંતરરાષ્ટ્રીય બજાર કિંમત અંદાજે ₹2.27 કરોડ જેટલી હોવાનું માનવામાં આવે છે. દરિયામાં તણાઈને આ પેકેટો કાંઠે આવ્યા હોવાની આશંકા વચ્ચે પોલીસે તપાસનો ધમધમાટ તેજ કર્યો છે.

અજાણ્યા ઈસમો સામે NDPS એક્ટ હેઠળ ગુનો
આ મામલે કલ્યાણપુર પોલીસ સ્ટેશનમાં અજાણ્યા ઈસમો વિરુદ્ધ NDPS એક્ટ હેઠળ ગુનો નોંધવામાં આવ્યો છે. પોલીસ એ જાણવાનો પ્રયાસ કરી રહી છે કે આ નશાનો જથ્થો ક્યાંથી આવ્યો અને તેનો અસલી મકસદ શું હતો? શું કોઈ મોટી ડ્રગ્સ કાર્ટેલ આ પાછળ સક્રિય છે કે કેમ, તે દિશામાં પણ તપાસના ચક્રો ગતિમાન કર્યા છે.

દરિયાકાંઠે સુરક્ષા વ્યવસ્થા સઘન કરાઈ
આટલી મોટી માત્રામાં ડ્રગ્સ મળી આવતા જ પોલીસ અને સુરક્ષા એજન્સીઓએ આસપાસના તમામ દરિયાકાંઠાના વિસ્તારોમાં ચેકિંગ વધારી દીધું છે. સ્થાનિક પોલીસ સહિતની એજન્સીઓ દ્વારા દરિયાકાંઠે સઘન તપાસ શરૂ કરવામાં આવી છે જેથી અન્ય કોઈ શંકાસ્પદ જથ્થો છુપાયેલો હોય તો તેને શોધી શકાય.