Anupam Singh Gehlot Meeting with Anti Corruption Committee: અમદાવાદ શહેરના નવા પોલીસ કમિશનર તરીકે નિયુક્ત થયેલા અનુપમ સિંહ ગહલોત સાથે  એન્ટી કરપ્શન કમિટી (ભ્રષ્ટાચાર નિમૂલન સમિતિ)ના ગુજરાત પ્રદેશ અને રાષ્ટ્રીય પદાધિકારીઓએ સૌજન્ય મુલાકાત કરી હતી. આ મુલાકાત દરમિયાન નવા કાર્યકાળ માટે શુભેચ્છાઓ પાઠવવા સાથે શહેરમાં કાયદો અને વ્યવસ્થાને વધુ મજબૂત બનાવવા તેમજ ભ્રષ્ટાચારમુક્ત સમાજના નિર્માણ માટે પરસ્પર સહયોગ અંગે મહત્વપૂર્ણ ચર્ચા કરવામાં આવી હતી.

સમિતિના પ્રતિનિધિઓએ જણાવ્યું હતું કે પોલીસ તંત્ર અને સામાજિક સંસ્થાઓ વચ્ચે સંકલન જેટલું મજબૂત હશે, તેટલું સમાજમાં પારદર્શિતા, વિશ્વાસ અને કાયદાનું શાસન વધુ અસરકારક રીતે અમલમાં આવી શકશે. જનહિતના કાર્યોમાં પોલીસ વિભાગને સતત સહયોગ આપવાની તેમની પ્રતિબદ્ધતા પણ વ્યક્ત કરવામાં આવી હતી. મુલાકાત દરમિયાન શહેરમાં આગામી અષાઢી બીજની ભગવાન જગન્નાથજીની રથયાત્રાને લઈને પણ ચર્ચા કરવામાં આવી હતી. એન્ટી કરપ્શન કમિટીના હોદ્દેદારોએ જણાવ્યું હતું કે રથયાત્રા દરમિયાન શાંતિપૂર્ણ માહોલ જળવાઈ રહે અને પોલીસ તંત્રને જરૂરી સહકાર મળી રહે તે માટે સમિતિ સંપૂર્ણ સહયોગ આપશે.

સમિતિના પ્રતિનિધિઓએ નવા પોલીસ કમિશનરના નેતૃત્વમાં અમદાવાદ શહેરમાં કાયદો-વ્યવસ્થા વધુ મજબૂત બનશે અને ભ્રષ્ટાચાર વિરોધી અભિયાનને પણ નવી દિશા મળશે તેવી આશા વ્યક્ત કરી હતી. આ મુલાકાત સૌહાર્દપૂર્ણ વાતાવરણમાં યોજાઈ હતી, જેમાં શહેરના હિત, કાયદાનું પાલન અને જનસુરક્ષા જેવા મુદ્દાઓ પર પરસ્પર વિચારોની આપ-લે કરવામાં આવી હતી.