સરકારી જમીન ફાળવણી માટે ગુજરાતમાં કલેક્ટર અને DDOની નાણાકીય સત્તામાં વધારો

ગુજરાત સરકારે સરકારી જમીનની ફાળવણી પ્રક્રિયાને વધુ સરળ અને ઝડપી બનાવવા માટે જિલ્લા કલેક્ટર અને જિલ્લા વિકાસ અધિકારીઓ (DDO)ની નાણાકીય સત્તામાં વધારો કરવાનો મહત્વપૂર્ણ નિર્ણય લીધો છે. રાજ્ય સરકારના જણાવ્યા અનુસાર, આ નિર્ણયથી ઈન્ફ્રાસ્ટ્રક્ચર, ઔદ્યોગિક વિકાસ, ગ્રામ્ય વિકાસ અને જનકલ્યાણ સાથે જોડાયેલી યોજનાઓને ઝડપથી અમલમાં મૂકવામાં મદદ મળશે.

મુખ્યમંત્રી ભૂપેન્દ્ર પટેલે જણાવ્યું કે, નાણાકીય સત્તામાં વધારો કરવાનો નિર્ણય ‘ઈઝ ઓફ ડૂઈંગ બિઝનેસ’ને વધુ મજબૂત બનાવવા અને નાની-મોટી બાબતો માટે ગાંધીનગર સુધીની પ્રક્રિયા ઘટાડવાના પ્રયાસનો ભાગ છે.

નવી વ્યવસ્થા હેઠળ રાજ્ય સરકારના બોર્ડ અને નિગમોને બે હેક્ટર સુધી જમીન ફાળવણી માટે કલેક્ટરની નાણાકીય મર્યાદા ₹15 લાખથી વધારીને ₹1 કરોડ કરવામાં આવી છે. કેન્દ્ર સરકારના વિભાગો માટે એક હેક્ટર સુધીની મર્યાદા ₹15 લાખથી વધારીને ₹50 લાખ કરાઈ છે. સરકારી કર્મચારીઓ અને અન્ય વ્યક્તિઓ માટે રહેણાંક જમીનની મર્યાદા ₹1 લાખથી વધારીને ₹20 લાખ કરવામાં આવી છે.

સહકારી હાઉસિંગ સોસાયટીઓ માટે આ મર્યાદા ₹6 લાખથી વધારીને ₹50 લાખ કરાઈ છે. જ્યારે હરાજી દ્વારા વ્યાવસાયિક જમીન ફાળવણીની મર્યાદા ₹1 લાખથી વધારીને ₹5 લાખ કરવામાં આવી છે.

ગામતળના પ્લોટ માટે DDOની સત્તામાં પણ વધારો કરાયો છે. સરકારના જણાવ્યા મુજબ, હવે વધુ કેસોનો નિકાલ જિલ્લા સ્તરે જ થઈ શકશે, જેથી મંજૂરીની પ્રક્રિયામાં વિલંબ ઘટશે અને સરકારી જમીન ફાળવણી ઝડપથી થઈ શકશે.