ટોરોન્ટો ટોરોન્ટોમાં રમાયેલા ફિફા વર્લ્ડ કપ 2026ના ગ્રુપ-ઈના રોમાંચક મુકાબલામાં જર્મનીએ કોટ ડી આઇવરને 2-1થી પરાજય આપીને નોકઆઉટ તબક્કામાં પોતાનું સ્થાન નિશ્ચિત કર્યું છે. મેચમાં જર્મની માટે ડેનિઝ ઉન્દાવ હીરો સાબિત થયા હતા, જેમણે બે ગોલ ફટકારી ટીમને મહત્વપૂર્ણ જીત અપાવી હતી.

મુકાબલાની શરૂઆતમાં જ જર્મનીએ આક્રમક રમત બતાવી હતી. કાઈ હાવર્ટ્ઝને ગોલ કરવાની સારી તક મળી હતી, પરંતુ તેમનો હેડર ક્રોસબારની ઉપરથી પસાર થયો હતો. ત્યારબાદ જોશુઆ કિમિખના સુંદર ક્રોસ પર પણ હાવર્ટ્ઝ ગોલ કરવામાં નિષ્ફળ રહ્યા હતા, કારણ કે કોટ ડી આઇવરના ગોલકીપર યાહિયા ફોફાનાએ શાનદાર બચાવ કર્યો હતો.

પ્રથમ હાફ દરમિયાન કોટ ડી આઇવરે અસરકારક જવાબી હુમલો કર્યો હતો. યાન ડિયોમાંડેના ક્રોસ બાદ સર્જાયેલા મોકાનો લાભ ઉઠાવી કેસીએ ગોલ ફટકારતા ટીમને 1-0ની લીડ અપાવી હતી.

બીજા હાફમાં જર્મનીના કોચ જુલિયન નાગેલ્સમાને મહત્વપૂર્ણ ફેરફાર કરતાં નદીમ અમીરી અને ડેનિઝ ઉન્દાવને મેદાનમાં ઉતાર્યા હતા. આ નિર્ણય મેચનો ટર્નિંગ પોઈન્ટ સાબિત થયો હતો. મેદાનમાં આવ્યા બાદ માત્ર આઠ મિનિટમાં જ ઉન્દાવે ગોલ ફટકારી સ્કોર 1-1થી બરાબર કર્યો હતો.

મેચ ડ્રો તરફ આગળ વધી રહ્યો હતો ત્યારે સ્ટોપેજ ટાઈમમાં લુકાસ નેમેચાના સુંદર પાસ પર ઉન્દાવે પોતાનો બીજો અને નિર્ણાયક ગોલ નોંધાવ્યો હતો. આ ગોલ સાથે જર્મનીએ 2-1થી જીત મેળવી હતી.

ઉન્દાવ માટે આ પ્રદર્શન ખાસ રહ્યું હતું, કારણ કે જર્મની માટેની તેમની છેલ્લી આઠ મેચોમાં આ તેમનો નવમો ગોલ રહ્યો હતો. આ જીત સાથે જર્મનીએ રાઉન્ડ ઓફ 32માં સ્થાન મેળવી આગળની સફર માટે મજબૂત દાવેદારી નોંધાવી છે.