ડલાસ: ફિફા વર્લ્ડ કપ 2026માં આર્જેન્ટિનાના સુપરસ્ટાર ફૂટબોલર લિયોનેલ મેસીએ ફરી એકવાર પોતાની જાદુઈ રમતથી ચાહકોને મંત્રમુગ્ધ કરી દીધા. મેસીએ બે મહત્વપૂર્ણ ગોલ ફટકારી આર્જેન્ટિનાને ઓસ્ટ્રિયા સામે 2-0ની શાનદાર જીત અપાવી હતી. આ જીત સાથે વર્તમાન ચેમ્પિયન આર્જેન્ટિનાએ નોકઆઉટ તબક્કામાં પોતાનું સ્થાન પણ નિશ્ચિત કરી લીધું છે.

પોતાના 39મા જન્મદિવસના બે દિવસ પહેલા મેદાનમાં ઉતરેલા મેસી માટે આ મેચ યાદગાર બની રહી હતી. મેચની શરૂઆતમાં તેમને મળેલી પેનલ્ટી ચૂકાઈ ગઈ હતી, પરંતુ તેનાથી તેમનો આત્મવિશ્વાસ જરા પણ ડગ્યો નહોતો. મેસીએ 38મી મિનિટે ગોલ કરીને આર્જેન્ટિનાને મહત્વની લીડ અપાવી હતી. ત્યારબાદ ઇન્જરી ટાઇમમાં વધુ એક ગોલ ફટકારી ટીમની જીત પર મહોર મારી હતી.

આ મુકાબલો મેસી માટે અનેક રીતે ઐતિહાસિક સાબિત થયો. તેમણે વર્લ્ડ કપમાં પોતાના 17મા અને 18મા ગોલ નોંધાવી ટૂર્નામેન્ટના ઇતિહાસમાં સૌથી વધુ ગોલ કરનાર ખેલાડી બનવાનો ગૌરવ મેળવ્યો. આ અગાઉ આ રેકોર્ડ જર્મનીના પૂર્વ સ્ટ્રાઇકર મિરોસ્લાવ ક્લોઝના નામે હતો, જેમણે 16 ગોલ કર્યા હતા.

હવે વર્લ્ડ કપમાં સૌથી વધુ ગોલ કરનાર ખેલાડીઓની યાદીમાં મેસી ટોચના સ્થાને પહોંચી ગયા છે. તેમની પાછળ ક્લોઝ (16) અને બ્રાઝિલના રોનાલ્ડો (15)નો નંબર આવે છે. જ્યારે ફ્રાન્સના કિલિયન એમ્બાપ્પે અને જર્મનીના ગર્ડ મુલર 14-14 ગોલ સાથે આગળના સ્થાને છે.

મેસીએ વધુ એક અનોખો રેકોર્ડ પણ પોતાના નામે કર્યો. તેઓ સતત છ વર્લ્ડ કપ મેચોમાં ગોલ કરનાર માત્ર ત્રીજા ખેલાડી બન્યા છે. આ પહેલાં ફ્રાન્સના જસ્ટ ફોંટેન અને બ્રાઝિલના જાયરઝિન્હોએ આ સિદ્ધિ હાંસલ કરી હતી.

મેચની શરૂઆતથી જ આર્જેન્ટિનાએ આક્રમક રમત દર્શાવી હતી અને અનેક તક સર્જી હતી. જોકે પેનલ્ટી ચૂકી જતાં ટીમની લય થોડા સમય માટે ખોરવાઈ હતી. ઓસ્ટ્રિયાએ તેનો લાભ ઉઠાવવાનો પ્રયાસ કર્યો, પરંતુ આર્જેન્ટિનાના મજબૂત ડિફેન્સ સામે તે સફળ થઈ શક્યું નહોતું.

ત્યારબાદ મેસી અને થિયાગો અલ્માડા વચ્ચે શાનદાર તાલમેલ જોવા મળ્યો હતો. બંને ખેલાડીઓએ મળીને સુંદર મૂવ તૈયાર કર્યો, જેને મેસીએ ગોલમાં ફેરવી ટીમને 1-0ની લીડ અપાવી હતી.

હાફટાઇમ સુધી આર્જેન્ટિના 1-0થી આગળ હતું. બીજા હાફમાં પણ ટીમે રમત પર પોતાનું પ્રભુત્વ જાળવી રાખ્યું. ઓસ્ટ્રિયાએ વાપસીના પ્રયાસો કર્યા, પરંતુ આર્જેન્ટિનાના મજબૂત ડિફેન્સ અને મેસીની શાનદાર ફોર્મ સામે તેની એક પણ ચાલ સફળ થઈ નહોતી.

મેચના અંતિમ ક્ષણોમાં મેસીએ ફરી કમાલ દેખાડ્યો અને 90+5મી મિનિટે ગોલ કરીને સ્કોર 2-0 કર્યો. આ સાથે આર્જેન્ટિનાએ સતત બીજી જીત નોંધાવી ગ્રુપ-જેમાંથી અંતિમ 32માં પ્રવેશ મેળવી લીધો.

મેસીના ઐતિહાસિક પ્રદર્શનથી સજ્જ આ મુકાબલો સંપૂર્ણપણે તેમના નામે રહ્યો હતો. તેમણે માત્ર પોતાની ટીમને જીત અપાવી નહીં, પરંતુ વર્લ્ડ કપના ઇતિહાસમાં વધુ એક સુવર્ણ અધ્યાય પણ ઉમેર્યો.